ఇల్లు కూల్చాక.. వెక్కిరించిన ఇందిరమ్మ

నిర్మల్‌ జిల్లా లక్ష్మణచాంద మండలం న్యూ కంజర్‌కు చెందిన కొండూరు సాయవ్వకు ఇందిరమ్మ ఇల్లు మంజూరైనట్టు జూన్‌ 5న అధికారులు మంజూరుపత్రం అందజేశారు.

• ఉన్న ఇల్లు పోయింది.. కొత్త ఇల్లు దిక్కులేదు..
• ఇందిరమ్మ పథకం కింద మంజూరు పత్రం ఇచ్చారు
• అధార్‌ నంబర్‌ మ్యాచింగ్‌ కావడం లేదంటూ ఆపేశారు
• పక్షం రోజులుగా పట్టించుకోని అధికారులు

లక్ష్మణచాంద, జూలై 28: నిర్మల్‌ జిల్లా లక్ష్మణచాంద మండలం న్యూ కంజర్‌కు చెందిన కొండూరు సాయవ్వకు ఇందిరమ్మ ఇల్లు మంజూరైనట్టు జూన్‌ 5న అధికారులు మంజూరుపత్రం అందజేశారు. అధికారుల సూచనమేరకు ఇంటి నిర్మాణం కోసం పాత ఇంటిని కూలగొట్టింది. తీరా అధికారులు మంజూరు పత్రంలో ఆధార్‌ నంబర్‌ తప్పుగా ఉందని, ఇంటి క్యాప్చరింగ్‌, ఆన్‌లైన్‌లో నమోదు కుదరదని తేల్చి చెప్పారు.

కొత్త ఇల్లు మంజూరైందని ఉన్న ఇంటిని కూలగొట్టుకున్నానని, తనకు న్యాయం చేయాలని 15 రోజులుగా ఆమె అధికారులను ప్రాధేయపడుతున్నా పట్టించుకోవడంలేదు. ఈ విషయమై.. గృహనిర్మాణ శాఖ ఏఈ అక్షయను వివరణ కోరగా.. ఆధార్‌ నంబర్‌ మార్చడం కుదరడంలేదని వెల్లడించారు.