Assembly Budget Session | గవర్నర్‌ నోట సర్కారు అబద్ధాలు.. హామీలన్నీ అమలు చేసినట్టు గప్పాలు

ఎన్నికల హామీలను అరకొరగా అమలుచేసి తామేదో విజయం సాధించినట్టుగా కాంగ్రెస్‌ ప్రభుత్వం గవర్నర్‌ నోట గొప్పలు పలికించింది. అసెంబ్లీ బడ్జెట్‌ సమావేశాల ప్రారంభం సందర్భంగా బుధవారం గవర్నర్‌ ప్రసంగంలో పేర్కొన్న అంశాల్లో చాలావరకు పూర్తిస్థాయిలో అమలుకాని పథకాలే ఉండటం విశేషం.

• అరకొరే అమలు అయినా గొప్పలు
• బీఆర్‌ఎస్‌ ప్రభుత్వ విజయాలూ కబ్జా
• రైతు వేదికలు కాంగ్రెస్‌ కట్టినట్టు బిల్డప్‌
• కృష్ణాలో వాటా సాధించినట్టు కటింగ్‌
• స్థిరమైన వృద్ధి.. సామాజిక న్యాయం
• ఆ దిశగా తెలంగాణ రాష్ట్రం ప్రయాణం
• అసెంబ్లీలో గవర్నర్‌ జిష్ణుదేవ్‌ ప్రసంగం
• అన్నీ అసత్యాలేనని బీఆర్‌ఎస్‌ ఆందోళన
• షేమ్‌.. షేమ్‌ అంటూ సభ్యుల నినాదాలు

Assembly Budget Session | హైదరాబాద్‌, మార్చి 12(నమస్తే తెలంగాణ): ఎన్నికల హామీలను అరకొరగా అమలుచేసి తామేదో విజయం సాధించినట్టుగా కాంగ్రెస్‌ ప్రభుత్వం గవర్నర్‌ నోట గొప్పలు పలికించింది. అసెంబ్లీ బడ్జెట్‌ సమావేశాల ప్రారంభం సందర్భంగా బుధవారం గవర్నర్‌ ప్రసంగంలో పేర్కొన్న అంశాల్లో చాలావరకు పూర్తిస్థాయిలో అమలుకాని పథకాలే ఉండటం విశేషం. గత ప్రభుత్వం సాధించిన విజయాలను సైతం ప్రస్తుత ప్రభుత్వం తమ ఖాతాలో వేసుకునే ప్రయత్నం చేయడం గమనార్హం.

• రుణమాఫీ కాలేదని రైతులు గగ్గోలు పెడుతుంటే రూ.2 లక్షల వరకు రుణమాఫీ చేసినట్టు గవర్నర్‌ ప్రసంగంలో పేర్కొన్నారు.
• రైతు భరోసా సైతం ఇంకా చాలామంది రైతులకు అందకపోయినా ఇస్తున్నట్టు చెప్పారు. మ్యానిఫెస్టోలో రైతు భరోసా కింద ఎకరాకు రూ.15 వేల చొప్పున ఇస్తామని ప్రకటించినప్పటికీ, గవర్నర్‌ ప్రసంగంలో మాత్రం రూ.12 వేలకు పెంచినట్టు పేర్కొనడం గమనార్హం.
• రైతు కూలీలకు ఇందిరమ్మ ఆత్మీయ భరోసా పథకం కింద ఏడాదికి రూ.12 వేలు సమకూర్చుతున్నట్టు చెప్పారు. ఇది ఇంతవరకు అమలుకు నోచుకోలేదు.
• బీఆర్‌ఎస్‌ హయాంలో ఏర్పాటుచేసిన రైతు వేదికలను తమ ఖాతాలో వేసుకున్నారు. అత్యాధునిక ఆడియో-విజువల్‌ మీడియా సదుపాయంతో 566 రైతు వేదికలను ఏర్పాటుచేసినట్టు పేర్కొన్నారు.
• వడ్లకు రూ.500 బోనస్‌ ఇస్తామన్నది ఎన్నికల హామీ కాగా, ఇప్పుడు సన్న వడ్లకే బోనస్‌ ఇస్తున్నట్టు చెప్పారు.
• 200 యూనిట్ల వరకూ ఉచిత విద్యుత్తు, రూ.500కే గ్యాస్‌ సిలిండర్‌ సైతం నామమాత్రంగా అమలుచేస్తూ, ప్రభుత్వం సాధించిన ఘనతగా పేర్కొన్నారు.
• సివిల్‌ సర్వీస్‌ పరీక్షల ఆశావహులకు రూ.లక్ష చొప్పున అందిస్తున్నట్టు పేర్కొన్నారు. కానీ ఇది అమలు కావడం లేదు.
• గత ప్రభుత్వం జారీచేసిన ఉద్యోగాలనే భర్తీ చేసి.. ఏడాదిలోనే 55,000 ఉద్యోగాలు కల్పించినట్టు చెప్పుకున్నది.
• ఆరోగ్యశ్రీ’ కవరేజీని రూ.5 లక్షల నుంచి రూ.10 లక్షల వరకు పెంచినట్టు పేర్కొన్నప్పటికీ, ఇది ఎక్కడా అమలవడం లేదు.
• రాష్ట్రవ్యాప్తంగా సమగ్ర సామాజిక, ఆర్థిక, విద్య, ఉపాధి, రాజకీయ, కుల సర్వే నిర్వహించినట్టు పేర్కొన్నప్పటికీ, సక్రమంగా జరగలేదనే ఆరోపణలున్నాయి.
• ఎస్సీ, ఎస్టీ, మైనారిటీ వర్గాలకు గృహనిర్మాణం, విద్య, ఉపాధి, సామాజిక భద్రత కోసం ఆర్థిక సహాయం అమలుచేస్తున్నట్టు పేర్కొన్నప్పటికీ, ఎంతమంది లబ్ధిపొందారో వివరించలేదు.
• దావోస్‌ పర్యటనలో రూ.1,78,950 కోట్ల పెట్టుబడులను ఆకర్షించినట్టు, దీనిద్వారా 49,500 మందికి ఉద్యోగాలు వస్తాయని చెప్పారు. అయితే, కాంగ్రెస్‌ ప్రభుత్వంతో ఒప్పందాలు చేసుకున్న కంపెనీల్లో చాలావరకు బీఆర్‌ఎస్‌ ప్రభుత్వంతో ఒప్పందా లు కుదుర్చుకున్నవే కావడం గమనార్హం.

కిందపేర్కొన్న పథకాలన్నింటినీ అమలుచేసినట్టుగా రేవంత్‌ ప్రభుత్వం బుధవారం అసెంబ్లీలో గవర్నర్‌తో ప్రకటన చేయించింది. మరి ఈ పథకాలు మీకు అందాయా ? మీరే చెక్‌ చేసుకోండి

• కాంగ్రెస్‌ ప్రభుత్వం రైతులకు రూ.2 లక్షల వరకు రుణమాఫీ చేసింది.
• రైతులకు 12 వేల రైతు భరోసా అందించింది.
• ఇందిరమ్మ ఆత్మీయ భరోసా కింద ఒక్కో రైతు కూలీకి ఏడాదికి రూ.12 వేలు ఇస్తున్నది.
• అత్యాధునిక ఆడియో-విజువల్‌ మీడియా సదుపాయాలతో 566 రైతు వేదికలు ఏర్పాటు చేసింది.
• పంటలకు రూ.500 బోనస్‌ ఇస్తున్నది 200 యూనిట్ల ఉచిత విద్యుత్తు ఇస్తున్నది.
• రూ.500కే గ్యాస్‌ సిలిండర్‌ ఇస్తున్నది.
• సివిల్స్‌ అభ్యర్థులకు రూ.లక్ష చొప్పున ఆర్థిక సాయం చేస్తున్నది.
• ఏడాదిలో 55 వేల ఉద్యోగాలు కల్పించింది.
• ఆరోగ్యశ్రీని రూ.10 లక్షలకు పెంచింది.
• ఎస్సీ, ఎస్టీ, మైనారిటీలకు గృహనిర్మాణం, విద్య, ఉపాధి, సామాజిక భద్రత కోసం ఆర్థిక సహాయం అందిస్తున్నది.