ప్రభుత్వ హెచ్‌ఎం మల్టీజోనల్‌

• విద్యాపరిశోధన సంస్థల అధ్యాపకులు కూడా..
• జోనల్‌ నుంచి జిల్లా పోస్టుగా మారిన ప్రభుత్వ ఎస్‌ఏ
• ప్రభుత్వ, పంచాయతీ టీచర్లకు వేర్వేరు క్యాడర్లు
• విద్యాశాఖలో పోస్టుల పునర్వ్యవస్థీకరణ పూర్తి
• మూడు జీవోలు జారీ చేసిన రాష్ట్ర ప్రభుత్వం

హైదరాబాద్‌, ఆగస్టు 27 (నమస్తే తెలంగాణ): ఉపాధ్యాయ పోస్టుల పునర్వ్యవస్థీకరణను విద్యాశాఖ పూర్తిచేసింది. ప్రభుత్వ పాఠశాలల ప్రధానోపాధ్యాయుల పోస్టుతోపాటు అధ్యాపక పోస్టులను మల్టీజోన్‌లో చేర్చింది. మిగిలిన అన్ని రకాల ఉపాధ్యాయుల పోస్టులను జిల్లా క్యాడర్‌లోనే కొనసాగిస్తూ సీఎస్‌ సోమేశ్‌కుమార్‌ శుక్రవారం మూడు జీవోలు జారీచేశారు. పాఠశాలల్లోని బోధనా పోస్టులను జిల్లా క్యాడర్‌లో, కళాశాలల్లోని బోధనా పోస్టులను మల్టీ జోనల్‌ క్యాడర్‌లో చేర్చారు. ప్రభుత్వ, పంచాయతీరాజ్‌ టీచర్లకు వేర్వేరు క్యాడర్లను కేటాయించారు. గతంలో వీరందరికీ ఏకీకృత సర్వీసు రూల్స్‌ను అమలుచేస్త్తూ ప్రభుత్వం జారీచేసిన జీవో-124ను హై కోర్టు కొట్టేయడంతో ప్రభుత్వం ఈ నిర్ణయం తీసుకొన్నది. హైకోర్టు తుది తీర్పు వచ్చాక ఆ మేరకు ఉత్తర్వులను మారుస్తామని జీవోలో స్పష్టంగా పేర్కొన్నారు. కొత్త జిల్లాలు, జోనల్‌ విధానానికి అనుగుణంగా విద్యాశాఖ మినహా అన్నిశాఖల్లో పోస్టులను ప్రభుత్వం గత నెలలోనే పునర్వ్యవస్థీకరించింది.

విభజన ఇలా:

• ఐఏఎస్‌ఈ (ఇన్‌స్టిట్యూట్‌ ఆఫ్‌ అడ్వాన్డ్స్‌ స్టడీస్‌ ఇన్‌ ఎడ్యుకేషన్‌), రాష్ట్ర విద్యాపరిశోధన శిక్షణా సంస్థ (ఎస్సీఈఆర్టీ), కాలేజ్‌ ఆఫ్‌ టీచర్‌ ఎడ్యుకేషన్‌లలోని లెక్చరర్‌ పోస్టులు మల్టీజోన్‌లో ఉంటాయి. ఇవి గతంలో జోనల్‌ పోస్టులుగా ఉండేవి.
• ప్రభుత్వ పాఠశాల్లోని గెజిటెడ్‌ హెచ్‌ఎం గ్రేడ్‌-1, గ్రేడ్‌-2, హెచ్‌ఎం పోస్టులు మల్టీజోన్‌లోకి వెళ్లాయి. ఇవికూడా గతంలో జోనల్‌ పోస్టులుగా ఉండేవి.
• మండల పరిషత్‌, జిల్లా పరిషత్‌ పాఠశాలల్లో ఎల్‌ఎఫ్‌ఎల్‌ హెచ్‌ఎం, స్కూల్‌ అసిస్టెంట్‌, ఆర్ట్‌ అండ్‌ డ్రాయింగ్‌ టీచర్‌, క్రాఫ్ట్‌ టీచర్‌, క్రాఫ్ట్‌ ఇన్‌స్ట్రక్టర్‌, డ్యాన్స్‌ టీచర్‌, భాషా పండితులు గ్రేడ్‌-2, మాన్యువల్‌ ట్రైనింగ్‌ ఇన్‌స్ట్రక్టర్‌, ప్రీ వోకేషనల్‌ ఇన్‌స్ట్రక్టర్‌, స్వీయింగ్‌ ఇన్‌స్ట్రక్టర్‌, ఫిజికల్‌ ఎడ్యుకేషన్‌ టీచర్‌, సంస్కృతం టీచర్‌, సెకండరీ గ్రేడ్‌ టీచర్‌, స్వీయింగ్‌ టీచర్‌, వోకేషనల్‌ ఇన్‌స్ట్రక్టర్‌, వీవింగ్‌ టీచర్‌, టైలరింగ్‌ ఇన్‌స్ట్రక్టర్‌ పోస్టులు జిల్లా క్యాడర్‌లో కొనసాగుతాయి. గతంతో ఇవన్నీ జిల్లా క్యాడర్‌లోనే ఉన్నాయి.
• ప్రభుత్వ పాఠశాల్లోని ఐఈడీ రిసోర్స్‌ పర్సన్‌, లో ఫిమేల్‌ లిట్రసీ హెచ్‌ఎం (పీఎస్‌ హెచ్‌ఎం), స్కూల్‌ అసిస్టెంట్‌, క్ట్రాఫ్ట్‌ ఇన్‌స్ట్రక్టర్‌, రిసోర్స్‌ టీచర్‌, టైలరింగ్‌ ఇన్‌స్ట్రక్టర్‌, ఆర్ట్‌ అండ్‌ డ్రాయింగ్‌ టీచర్‌, క్రాఫ్ట్‌ టీచర్‌, డ్యాన్స్‌ టీచర్‌, భాషా పండితులు గ్రేడ్‌-2, మాన్యువల్‌ ట్రైనింగ్‌ ఇన్‌స్ట్రక్టర్‌ / ప్రీ వోకేషనల్‌ ఇన్‌స్ట్రక్టర్‌/ స్వీయింగ్‌ ఇన్‌స్ట్రక్టర్‌, మ్యూజిక్‌ టీచర్‌, ఫిజికల్‌ ఎడ్యుకేషన్‌ టీచర్‌, సంస్కృతం టీచర్‌, సెకండరీ గ్రేడ్‌ టీచర్‌, స్వీయింగ్‌ టీచర్‌, వొకేషనల్‌ ఇన్‌స్ట్రక్టర్‌, వీవింగ్‌ టీచర్‌, అసిస్టెంట్‌ ప్రొగ్రాం ఆఫీసర్‌ పోస్టులు జిల్లా క్యాడర్‌లో ఉండనున్నాయి.
• ప్రభుత్వ పాఠశాలల్లోని స్కూల్‌ అసిస్టెంట్‌ పోస్టు గతంలో జోనల్‌లో ఉండగా ఇప్పుడు జిల్లా పోస్టుగా మార్చారు.