Visit:
డోర్నకల్‌, నవంబర్‌ 30 : స్థానిక సంస్థల ఎన్నికల్లో బీఆర్‌ఎస్‌ అభ్యర్థుల గెలుపు ఖాయమని మాజీ మంత్రి సత్యవతిరాథోడ్‌ అన్నారు. ఆదివారం ఆమె మహబూబాబాద్‌ జిల్లా డోర్నకల్‌ పట్టణంలో విలేకరుల సమావేశంలో మాట్లాడారు. కాంగ్రెస్‌ పార్టీకి స్థానిక సంస్థల ఎన్నికల్లో ఓటు అడిగే హక్కు లేదన్నారు. డోర్నకల్‌, మహబూబాబాద్‌ నియోజకవర్గంలో అభివృద్ధి శూన్యమన్నారు. కాంగ్రెస్‌ ప్రభుత్వం అధికారంలోకి వచ్చి రెండేళ్లవుతున్నా ప్రజలకు ఇచ్చిన హామీలను ఒక్కటి కూడా నెరవేర్చలేదన్నారు. మహలక్ష్మి పథకం రూ.2,500, రైతు భరోసా రూ.15వేలు, కల్యాణలక్ష్మి తులం బంగారం, రెట్టింపు పింఛన్ల ఇప్పటివరకు ఇవ్వలేదన్నారు.
ఎన్నికల కోసమే మహిళలకు చీరెలు పంపిణీ చేశారని అన్నారు. బీసీలకు 42శాతం రిజర్వేషన్‌ ఇస్తామని కాంగ్రెస్‌ ప్రభుత్వం మోసం చేసిందన్నారు. స్థానిక సంస్థల ఎన్నికల్లో మహబూబాబాద్‌ జిల్లాలో ఒక్క సీటు కూడా బీసీలకు రాలేదన్నారు. ఎమ్మెల్యేలు రాంచంద్రూనాయక్‌, మురళీ నాయక్‌ స్థానిక సంస్థల ఎన్నికల్లో ప్రజలను ఏవిధంగా ఓటు అడుగుతారో చెప్పాలన్నారు. చుట్టం చూపులా నియోజకవర్గానికి వచ్చే ఎమ్మెల్యే రాంచంద్రూనాయక్‌ డోర్నకల్‌ నియోజకవర్గం గురించి ఏం తెలుసన్నారు.
టీపీసీసీ అధ్యక్షుడు మహేశ్‌కుమార్‌గౌడ్‌కు కేసీఆర్‌ను విమర్శించే హక్కు లేదన్నారు. ఇప్పటికైనా కళ్లు తెరిచి డోర్నకల్‌ ప్రజలకు అభివృద్ధి పథకాలు అందించాలన్నారు. ఈ కార్యక్రమంలో మాజీ జడ్పీ చైర్‌పర్సన్‌ అంగోత్‌ బిందు, మాజీ సర్పంచ్‌ బానోత్‌ పాండూనాయక్‌, బీఆర్‌ఎస్‌ నాయకులు మాన్యుపాట్నీ, కాలా యశోధర్‌ జైన్‌, రాంభద్రం, రఘు, చంటి, శ్రీనివాస్‌, హూన్యానాయక్‌ పాల్గొన్నారు.
