టీచరమ్మలే అధికం!.. గత నాలుగేండ్లుగా వరుసగా పెరుగుదల

అమ్మే ఆది గురువు అంటారు. ఇప్పుడు మలిగురువు కూడా అమ్మలే సుస్థిరస్థానం పొందుతున్నారు. పంతులమ్మలుగా అధికంగా అమ్మలే స్థానం సంపాదించారు.

• ఏటా పెరుగుతున్న మహిళా టీచర్ల సంఖ్య
• దేశంలోని అత్యధిక రాష్ర్టాల్లో ఇదే పరిస్థితి
• రాష్ట్రంలోనూ 63 శాతం ఉపాధ్యాయినులు

హైదరాబాద్‌, ఆగస్టు 15 (నమస్తే తెలంగాణ): అమ్మే ఆది గురువు అంటారు. ఇప్పుడు మలిగురువు కూడా అమ్మలే సుస్థిరస్థానం పొందుతున్నారు. పంతులమ్మలుగా అధికంగా అమ్మలే స్థానం సంపాదించారు. దేశంతోపాటు ఇటు రాష్ట్రంలోని పిల్లలకు విద్యాబుద్ధులు నేర్పించేవారిలో అత్యధికంగా మహిళా టీచర్లే ఉన్నారు. రాష్ట్రంలోని మొత్తం ఉపాధ్యాయుల్లో 63 శాతం మహిళా టీచర్లే ఉండటం గమనార్హం. 2020-21లో రాష్ట్రంలో మహిళా టీచర్ల సంఖ్య 1.92 లక్షలు ఉండగా, 2023-24కు వచ్చేసరికి ఆ సంఖ్య 2.15 లక్షలకు చేరింది. ఇలా ఏటేటా ఉపాధ్యాయ వృత్తిలో మహిళల ఆధిక్యత పెరుగుతున్నది. దేశవ్యాప్తంగా వివిధ కేంద్రపాలిత ప్రాంతాలు, రాష్ర్టాల్లో 80-60శాతం మహిళా టీచర్లే ఉన్నట్టు కేంద్రం ఇటీవల విడుదల చేసిన గణాంకాలు వెల్లడిస్తున్నాయి.

మహిళా టీచర్ల ఆధిక్యత ఒక్క మన రాష్ట్రానికే పరిమితం కాలేదు. జాతీయస్థాయిలో విద్యాబోధనలో మహిళలే ముందు ఉన్నారు. పరిస్థితిని చూస్తుంటే ఉపాధ్యాయ వృత్తి రాబోయే రోజుల్లో మహిళలే అత్యధికంగా వృత్తిలో ఉండే రోజులు దగ్గరలోనే ఉన్నాయనిపిస్తున్నది. కేంద్రపాలిత ప్రాంతమైన చండీగఢ్‌లో మొత్తం 10 వేల మంది పనిచేస్తుండగా, వీరిలో 8,248 మంది మహిళా టీచర్లే. అంటే 80 శాతం మహిళా టీచర్లే ఉన్నారన్న మాట. అక్కడ పురుషులు 1,989 మంది మాత్రమే పనిచేస్తున్నారు.

ఢిల్లీలో 1.60 లక్షల ఉపాధ్యాయులు ఉంటే 1.17 లక్షల మంది మహిళా టీచర్లే పనిచేస్తున్నారు. గోవాలో 14 వేల మందికి 11 వేల మంది, కేరళలో 2.91 లక్షల టీచర్లకు, 2.35 లక్షల మంది మహిళలే. కర్ణాటక, మహారాష్ట్ర, మధ్యప్రదేశ్‌, తమిళనాడు రాష్ర్టాల్లో మహిళలే ఉపాధ్యాయ వృత్తిని ఏలేస్తున్నారు. కొన్ని రాష్ర్టాల్లో మాత్రం ఈ పరిస్థితి మరోలా ఉన్నది. కొన్ని రాష్ట్రాల్లో టీచర్‌ ప్రొఫెషన్‌లో పురుషులే ఎక్కువగా ఉన్నారు.

పురుష టీచర్ల అధికంగా ఉన్న రాష్ర్టాలివే..

• 2023-24 గణాంకాల ఆధారంగా అస్సాంలో మొత్తం 3.42 లక్షల మంది ఉపాధ్యాయులు ఉంటే పురుష టీచర్లే అధికంగా ఉన్నారు. 1.93 లక్షల మంది పురుష టీచర్లు ఉంటే, మహిళా టీచర్ల సంఖ్య 1.48 లక్షలుగా ఉన్నది.
• బీహార్‌లో మొత్తం 6.57 లక్షల మంది టీచర్లు ఉంటే 3.78 లక్షల మంది పురుషులు, 2.78లక్షల మంది మహిళా టీచర్లు ఉన్నారు.
• రాజస్థాన్‌లో 7.75 లక్షల మంది టీచర్లు ఉండగా, పురుషులు 4.55 లక్షల మంది, మహిళలు 3.20 లక్షల మంది ఉన్నారు.
• ఉత్తరప్రదేశ్‌లో 15.38 లక్షల టీచర్లు ఉంటే, 7.91లక్షల పురుషులే. మహిళలు 7.46 లక్షలతో కాస్త వెనుకబడ్డారు.
• పశ్చిమబెంగాల్‌లో 5.76 లక్షల మంది టీచర్లు ఉంటే, పురుషలు 3.21లక్షల మంది, 2.55 లక్షల మంది మహిళలు ఉన్నారు.
• ఒడిశా రాష్ట్రంలో 3.33 లక్షల మంది టీచర్లు పనిచేస్తుండగా, 1.74లక్షల మంది పురుషులు, 1.60లక్షల మంది మహిళలు పని చేస్తున్నారు.

రాష్ట్రంలో పురుష, మహిళా ఉపాధ్యాయుల వివరాలు

• రాష్ట్రంలోని మొత్తం ఉపాధ్యాయుల్లో 63 శాతం మహిళా టీచర్లే
• 2020-21తో పోల్చితే 2023-24లో పురుష, మహిళా టీచర్ల సంఖ్యలో అంతరం 50% పెరిగింది