మూడు పంచాయతీలకు నామినేషన్లు నిల్‌

మంచిర్యాల జిల్లా దండేపల్లి మండలంలోని 31 గ్రామ పంచాయతీలకుగాను 28 పంచాయతీలకు మాత్రమే ఎన్నికలు జరగనున్నాయి. గడువు ముగిసినా నామినేషన్లు దాఖలు కాకపోవడంతో వందుర్‌గూడ, గూడెం, నెల్కివెంకటాపూర్‌ పంచాయతీలు ఎన్నికలకు దూరంగా ఉండిపోనున్నాయి.

దండేపల్లి, నవంబర్‌ 29 : మంచిర్యాల జిల్లా దండేపల్లి మండలంలోని 31 గ్రామ పంచాయతీలకుగాను 28 పంచాయతీలకు మాత్రమే ఎన్నికలు జరగనున్నాయి. గడువు ముగిసినా నామినేషన్లు దాఖలు కాకపోవడంతో వందుర్‌గూడ, గూడెం, నెల్కివెంకటాపూర్‌ పంచాయతీలు ఎన్నికలకు దూరంగా ఉండిపోనున్నాయి. సర్పంచ్‌తోపాటు వార్డు సభ్యుల స్థానాలకు కూడా నామినేషన్‌లు దాఖలు కాలేదు. దీంతో ఈ గ్రామాలు ప్రత్యేకాధికారి పాలన కొనసాగనున్నది.

సర్పంచ్‌లేని ఎన్నికలు వద్దంటూ గూడెంలో..

గూడెంలో ఒక్క గిరిజనుడు లేకపోయినా సర్పంచ్‌ స్థానాన్ని ఎస్టీలకు రిజర్వు అయ్యింది. అలాగే 10 వార్డు స్థానాలకు 5 వార్డులు ఎస్టీలకు, 5 జనరల్‌కు కేటాయించారు. సర్పంచ్‌ లేని వార్డులు ఎందుకని మిగతా 5 వార్డులకు కూడా నామినేషన్‌ దాఖలు కాలేదు.గూడెం గ్రామ పంచాయతీలో గూడెం, రంగంపెల్లి గ్రామాలు ఉన్నాయి.

ప్రత్యేక పంచాయతీ వద్దంటూ వందుర్‌గూడలో..

నెల్కివెంకటాపూర్‌ పంచాయతీకి అనుబంధంగా ఉన్న వందుర్‌గూడను ప్రత్యేక పంచాయతీగా ఏర్పాటు చేసింది. ఇక్కడ 100 శాతం గిరిజనులు ఉండటంతో సర్పంచ్‌ స్థానంతోపాటు 8 వార్డులను ఎస్టీలకు రిజర్వు చేశారు. తమకు ప్రత్యేక పంచాయతీ వద్దని వందుర్‌గూడ గ్రామస్థులు గతంలో ఆందోళనలు చేశారు.147 మంది ఓటర్లు ఉన్న ఈ గూడెంలో సర్పంచ్‌ స్థానాన్ని ఎస్టీ మహిళకు కేటాయించారు. ఎవరూ నామినేషన్‌ వేయకపోవడంతో పంచాయతీ పాలకవర్గం ఏర్పడే పరిస్థితి లేదు.

ఎస్టీలకు రిజర్వు చేశారని నెల్కివెంకటాపూర్‌లో నిరసన..

వందుర్‌గూడ విడిపోవడంతో నెల్కివెంకటాపూర్‌ ప్రత్యేక పంచాయతీగా ఉండిపోయింది.ఈ సర్పంచ్‌ స్థానం ఎప్పటి నుంచో ఎస్టీలకు రిజర్వ్‌ అవుతున్నది. ఇక్కడ ఎస్టీలు లేరని పంచాయతీని జనరల్‌గా ప్రకటించి ఎన్నికలు నిర్వహించాలని స్థానికులు డిమాండ్‌ చేస్తున్నారు. ఇక్కడ మొత్తం 750 మంది ఓటర్లు ఉండగా సర్పంచ్‌ స్థానాన్ని ఎస్టీ మహిళకు కేటాయించారు.10 వార్డులకు 5 ఎస్టీలకు, 5 జనరల్‌కు కేటాయించారు. 5 జనరల్‌ వార్డులకు కూడా నామినేషన్‌లు దాఖలు కాలేదు.

చెరువు తండాలో ఎన్నికల బహిష్కరణ?

ధర్పల్లి, నవంబర్‌ 29: స్థానిక సంస్థల ఎన్నికలను బహిష్కరిస్తున్నట్టు నిజామాబాద్‌ జిల్లా ధర్పల్లి మండలం మోబిన్‌సాబ్‌ తండా పంచాయతీ పరిధిలోని చెరువు తండావాసులు ప్రకటించారు. శనివారం సమావేశమైన చెరువు తండావాసులు సర్పంచ్‌, వార్డు సభ్యుల ఎన్నికలను బహిష్కరించాలని నిర్ణయించుకుని పంచాయతీ కార్యదర్శికి సమాచారమిచ్చారు. ఒకదఫా మోబిన్‌సాబ్‌ తండా నుంచి, మరో దఫా చెరువుతండా నుంచి సర్పంచ్‌ అభ్యర్థిని ఎన్నుకోవాలని గత స్థానిక సంస్థల ఎన్నికల సందర్భంగా ఒప్పందం చేసుకున్నామని చెరువుతండా వాసులు తెలిపారు. ఒప్పందం ప్రకారం ఈ సారి తమకు సర్పంచ్‌గా అవకాశం ఇవ్వాల్సి ఉండగా, మోబిన్‌సాబ్‌ తండా వాసులు నిరాకరించారని, అందుకే ఎన్నికలను బహిష్కరిస్తున్నట్టు చెప్పారు.