Election Code | అమల్లోకి వచ్చిన ఎన్నికల కోడ్‌.. రాష్ట్రంలో కొత్త పథకాలు, కార్యక్రమాలకు బ్రేక్‌

లోక్‌సభ ఎన్నికలకు కేంద్ర ఎన్నికల సంఘం ఎన్నికల షెడ్యూల్‌ విడుదల చేయటంతో శనివారం నుంచి రాష్ట్రవ్యాప్తంగా ఎన్నికల కోడ్‌ అమల్లోకి వచ్చింది. జూన్‌ 6న కోడ్‌ పూర్తవుతుంది.

• కోడ్‌ కూత 80 రోజులు..
• మే 13న ఒకే దశలో రాష్ట్రంలోని 17 పార్లమెంట్‌ నియోజకవర్గాల్లో ఎన్నికలు
• కంటోన్మెంట్‌ స్థానానికీ బై ఎలక్షన్‌
• ఫలితాలకు 20 రోజుల ఎదురుచూపు
• రాష్ట్రంలో 3.30 కోట్ల మంది ఓటర్లు
• మొత్తం 35,356 పోలింగ్‌ కేంద్రాలు
• విధుల్లో 2 లక్షల ఎన్నికల సిబ్బంది
• కలెక్టర్లతో సీఈవో వీడియో కాన్ఫరెన్స్‌

Election Code | హైదరాబాద్‌, మార్చి 16 (నమస్తే తెలంగాణ): లోక్‌సభ ఎన్నికలకు కేంద్ర ఎన్నికల సంఘం ఎన్నికల షెడ్యూల్‌ విడుదల చేయటంతో శనివారం నుంచి రాష్ట్రవ్యాప్తంగా ఎన్నికల కోడ్‌ అమల్లోకి వచ్చింది. జూన్‌ 6న కోడ్‌ పూర్తవుతుంది. అంటే.. మొత్తం 80 రోజుల పాటు రాష్ట్రంలో ఎన్నికల నిబంధనలు అమ ల్లో ఉంటాయి. రాష్ట్రంలో మే 13న ఎన్నికలు పూర్తవుతున్నా, జూన్‌ 4న ఓట్లను లెక్కించనున్నారు. రాష్ట్రం లో మొత్తం 17 లోక్‌సభ నియోజకవర్గాలు ఉన్నాయి. ఇందులో రెండు ఎస్టీ, మూడు ఎస్సీ రిజర్వ్‌డ్‌. సికింద్రాబాద్‌ కంటోన్మెంట్‌ అసెంబ్లీ స్థానానికి ఉప ఎన్నిక నిర్వహించనున్నారు. రాష్ట్రంలో మొత్తం 3.30 కోట్ల మంది ఓటర్లు ఉన్నారు. వీరి కోసం 35,356 పోలింగ్‌ కేంద్రాలను ఏర్పాటు చేశారు. రాష్ట్రంలో పోలింగ్‌ బూత్‌ స్థాయి మినహా ఇతర అధికారులకు శిక్షణను పూర్తి చేశారు. ఈవీఎంల మొదటి దశ చెకింగ్‌ పూర్తయింది.

కోడ్‌ నిబంధనలు ఇవీ..

• కోడ్‌ సమయంలో మంత్రులు, ప్రజాప్రతినిధులు, ప్రభుత్వ గెస్ట్‌హౌస్‌లను వినియోగించుకోవడానికి వీల్లేదు.
• కొత్త పథకాలను ప్రారంభించవద్దు.
• ఎన్నికల సంఘం అనుమతి లేకుండా ఎన్నికల అధికారులను బదిలీ చేయరాదు.
• ప్రభుత్వ యంత్రాంగాన్ని, అధికారులను, వాహనాలను వాడటానికి వీల్లేదు.
• ప్రభుత్వ స్థలాలు, కాలేజీలు, స్కూళ్లను ప్రచారానికి వినియోగించుకోవాల్సి ఉంటే రిటర్నింగ్‌ అధికారి అనుమతి తీసుకోవాలి.
• రూ.50వేలకు మించి నగదు తీసుకెళ్లే వారు తప్పనిసరిగా ఆధారాలు తీసుకెళ్లాలి. లేకుంటే నగదును సీజ్‌ చేస్తారు.
• బంగారం, వెండి ఆభరణాలకు కూడా సరైన ఆధారాలు చూపించాలి.
• మద్యం రవాణాపై ఆంక్షలు ఉంటాయి.
• మీడియాలో రాజకీయ పార్టీలు, వ్యక్తులకు అనుకూలంగా, పక్షపాతంగా ప్రచార కథనాలపై నిషేధం.
• ఓటర్లను ప్రభావితం చేసేలా కుల, మతపరమైన వ్యాఖ్యలు చేయకూడదు. వదంతులు వ్యాప్తి చేయొద్దు. ఓటర్లకు డబ్బులు పంచడం, భయపెట్టడానికి వీల్లేదు.
• ఎన్నికల షెడ్యూల్‌ విడుదలయ్యాక అభ్యర్థులు ఆర్థిక గ్రాంట్లు ప్రకటించడం నిషేధం.
• ప్రభుత్వ, ప్రభుత్వ అనుబంధ సంస్థలలో తాతాలిక నియామకాలు చేపట్టకూడదు.
• ఎన్నికల్లో పోటీ చేసే మంత్రులు లేదా అభ్యర్థులు తమ పరిధిలోని నిధులను మంజూరు చేయకూడదు.
• అభ్యర్థులు రాజకీయ నాయకుల సమావేశాలకు మున్సిపాలిటీ బహిరంగ ప్రదేశాల్లో మీటింగులకు ఉచిత ప్రవేశం కల్పించాలి.
• ప్రభుత్వ కార్యాలయాల్లో ప్రధాని, ముఖ్యమంత్రి, మంత్రుల ఫొటోలు ఉండకూడదు. రాజకీయ నేతల పోస్టర్లు, కటౌట్‌లు, హోర్డింగులు తొలగించాలి.
• ఎన్నికల అధికారులు, సిబ్బంది బదిలీలపై పూర్తిగా నిషేధం. మంత్రులు, రాజకీయ నేతలతో అధికారుల వీడియో కాన్ఫరెన్సులు ఉండవు. లబ్ధిదారులకు ఇచ్చే పత్రాలపై ముఖ్యమంత్రి, మంత్రుల ఫొటోలు ఉండకూడదు.
• దేవాలయం, మసీదు, ప్రార్థనా స్థలాల్లో ప్రచారం చేయకూడదు.
• పోలింగ్‌ కేంద్రానికి 100 మీటర్ల దూరంలో ప్రచారం నిషిద్ధం. ఓటింగ్‌కు 48 గంటల ముందు ఎన్నికల ప్రచారం, బహిరంగసభలపై నిషేధం.
• ఉదయం 10 గంటల నుంచి సాయంత్రం 6 గంటల వరకే ప్రచారం చేయాలి.
• నిబంధనలు పాటించనివారిపై కఠిన చర్యలు ఉంటాయి.
• పార్టీల ర్యాలీలకు ఆన్‌లైన్‌లో దరఖాస్తు చేసుకోవాలి.
• నామినేషన్‌నూ ఆన్‌లైన్‌లోనూ వేసుకొనే వెసులుబాటు ఉంది.
• అభ్యర్థులు గరిష్ఠంగా రూ.95 లక్షలు ఖర్చు చేసేందుకు అవకాశం ఉన్నది.
• నామినేషన్‌ కోసం ఓసీ, ఓబీసీ అభ్యర్థులు రూ.25 వేలు, ఎస్సీ, ఎస్టీ అభ్యర్థులు రూ.12,500 డిపాజిట్‌ చెల్లించాలి.
• నామినేషన్‌ దాఖలులో భాగంగా గుర్తింపు పొందిన జాతీయ, ప్రాంతీయ పార్టీల అభ్యర్థులు నామినేషన్‌ వేసే నియోజకవర్గానికి సంబంధించిన ఒక ఓటరు ప్రతిపాదకుడిగా ఉంటే సరిపోతుంది.
• స్టార్‌ క్యాంపెయినర్లుగా రాష్ట్రంలో జాతీ య, ప్రాంతీయ పార్టీలు 40 మంది నాయకుల పేర్లను, రిజిస్ట్రర్డ్‌ పార్టీలు 20 మందిని నియమించుకునే అవకాశం కల్పించారు.
• మ్యానిఫెస్టోను తెలుగు, హిందీ, ఇంగ్లిష్‌లో ఎన్నికల సంఘానికి సమర్పించాలి.
• రాజకీయ పార్టీలు, అభ్యర్థులు టీవీలు, పత్రికలు, బహిరంగ ప్రకటనలు, ఎఫ్‌ఎంలు, సినిమాహాల్స్‌, సోషల్‌ మీడియా, వాయిస్‌ మెసేజ్‌లు, బల్క్‌ ఎస్‌ఎంఎస్‌లు, ఇలా అన్ని రకాల ప్రకటనలకు ముందుగా అనుమతి తీసుకోవాలి.

ఎన్నికల వ్యయంపై..
అభ్యర్థులు, రాజకీయ పార్టీలు చేసే వ్యయంపై కఠినంగా వ్యవహరించాలని కేంద్ర ఎన్నికల సంఘం నిర్ణయించింది. దీని కోసం వ్యయ పరిశీలకులు, సహాయ వ్యయ పరిశీలకులు, ఫ్లయింగ్‌ స్వాడ్‌లు, స్టాటిక్‌ సర్వేలైన్స్‌ బృందాలు, వీడియో సర్వేలైన్స్‌ బృందాలు, వీడియో వీవింగ్‌ బృందాలు, అకౌంటింగ్‌ బృందాలు, మీడియా సర్టిఫికేషన్‌, మానిటరింగ్‌ కమిటీ (ఎంసీఎంసీ), జిల్లా వ్యయ పరిశీలన కమిటీ (డీఈఎంసీ)లను ఏర్పాటు చేయనున్నది. వీటితో పాటు రాష్ట్ర పోలీసులు, రాష్ట్ర ఎక్సైజ్‌ డిపార్ట్‌మెంట్‌, ఇన్‌కం టాక్స్‌ డిపార్ట్‌మెంట్‌, సీబీఐసీ, డీఆర్‌ఐ, సీజీఎస్టీ, ఎస్‌జీఎస్టీ, కమర్షియల్‌ శాఖ, ఈడీ, ఎన్సీబీ, సీఐఎస్‌ఎఫ్‌, ఆర్‌పీఎఫ్‌, బీఎస్‌ఎఫ్‌, ఎస్‌ఎస్‌బీ, ఐటీబీపీ, ఐసీజీ, పోస్టల్‌, ఏఏఐ, ఆర్బీఐ, ఎస్‌ఎల్‌బీసీ, అటవీ శాఖలు అభ్యర్థుల వ్యయంపై తనిఖీలు నిర్వహిస్తాయి.

తనిఖీల నగదుపై..
బ్యాంకుల నుంచి రూ.లక్ష, అంత కంటే ఎక్కువ డ్రా చేసినా, జమ చేసినా ఆ అకౌంట్లపై నిఘా ఏర్పాటు చేయాలని ఎన్నికల సంఘం ఆదేశించింది. రూ.10 లక్షల కంటే ఎక్కువగా డ్రా చేస్తే వారి సమాచారాన్ని ఇన్‌కం టాక్స్‌ శాఖ అధికారులకు తెలపాలని సూచించింది. పోలీసులు, వివిధ శాఖల అధికారులు చేసే తనిఖీల్లో దొరికిన డబ్బును క్లియర్‌ చేయడానికి జిల్లా స్థాయిలో కమిటీని ఏర్పాటు చేశారు. సరైన ఆధారాలు చూపితే ఆ డబ్బును తిరిగి యజమానికి ఇవ్వనున్నారు.

నోడల్‌ ఆఫీసర్ల కొనసాగింపు
రాష్ట్ర నోడల్‌ ఆఫీసర్లుగా ఏడీజీలు సంజయ్‌కుమార్‌జైన్‌, మహేశ్‌ భగవత్‌ను ఎన్నికల సంఘం కొనసాగించనున్నది. లాఅండ్‌ఆర్డర్‌, ఫోర్స్‌ డిప్లాయ్‌మెంట్‌, ఎన్నికల భద్రత వంటి అంశాలకు సంబంధించి నోడల్‌ ఆఫీసర్‌ సంజయ్‌కుమార్‌ జైన్‌ను, ఎక్స్‌పెండిచర్‌ నోడల్‌ ఆఫీసర్‌గా ఏడీజీ మహేశ్‌ భగవత్‌ను కొనసాగించనున్నారు.

ఆ 13 నియోజకవర్గాల్లో..రాష్ట్రంలో మొత్తం 119 అసెంబ్లీ నియోజకవర్గాలు ఉండగా, 13 నియోజకవర్గాల్లో మినహా మిగిలిన 106 నియోజకవర్గాల్లో పోలింగ్‌ ఉదయం 7 గంటల నుంచి సాయంత్రం 5 గంటలకు జరగనున్నది. నక్సల్‌ ప్రభావిత ప్రాంతాలుగా గుర్తించిన 13 నియోజకవర్గాల్లో మాత్రం ఉదయం 7 గంటల నుంచి సాయంత్రం 4 గంటల వరకు మాత్రమే పోలింగ్‌ జరుగుతుంది.

ఓటరు గుర్తింపుకార్డు లేకుంటే..
ప్రతి ఓటరు ఓటు వేసే సమయంలో ఓటరు గుర్తింపు కార్డును చూపించాలని ఎన్నికల సంఘం స్పష్టం చేసింది. లేదంటే 12 రకాల ప్రత్యామ్నాయాల కార్డులను సూచించింది. 1) ఆధార్‌ కార్డు 2) ఉపాధిహామీ జాబ్‌ కార్డు 3) బ్యాంకులు, పోస్ట్‌ ఆఫీసులు జారీచేసే పాస్‌బుక్‌లు 4) హెల్త్‌ ఇన్సూరెన్స్‌ హెల్త్‌ కార్డు 5) డ్రైవింగ్‌ లైసెన్స్‌ 6) పాన్‌ కార్డు 7) నేషనల్‌ పాపులేషన్‌ రిజిస్ట్రార్‌ జారీచేసే స్మార్ట్‌ కార్డు 8) పాస్‌పోర్టు 9) పెన్షన్‌ డాక్యుమెంట్‌ 10) కేంద్ర, రాష్ట్ర ప్రభుత్వ శాఖలు, ప్రభుత్వరంగ సంస్థలు జారీచేసే గుర్తింపు కార్డులు, 11) ఎంపీ, ఎమ్మెల్యే, ఎమ్మెల్సీలకు జారీచేసే గుర్తింపు కార్డులు 12) యూనిక్‌ డిసెబిలీటీ ఐడీ కార్డులుఅవసరానికంటే అదనంగా ఈవీఎంలు..

రాష్ట్రంలో బ్యాలెట్‌ యూనిట్లు 71, 968 అందుబాటులో ఉన్నాయని ఎన్ని కల అధికారులు వెల్లడించారు. అవసరానికంటే 204 శాతం ఎక్కువగా ఉన్నాయ ని వివరించారు. కంట్రోల్‌ యూనిట్లు 49,692 అంటే 141 శాతం అదనం, వీవీప్యాట్లు 54,353 అంటే 154 శాతం అదనంగా ఉన్నాయని తెలిపారు.

రాష్ట్రంలో ఓటర్లు ఇలా..

• రాష్ట్రంలో ఓటర్లు ; 3,30,21,735
• పురుషులు ; 1,64,31,777
• మహిళలు ; 1,65,87,221
• థర్డ్‌ జెండర్‌ ; 2,737
• దివ్యాంగ ఓటర్లు ; 5,28,405
• 18, 19 ఏండ్ల వయస్కులు ; 8,51,853
• 20-29 ఏండ్ల వయస్కులు ; 66,27,096
• 100 ఏండ్లు పైబడిన ఓటర్లు  ; 6,292
• ఎన్నారై ఓటర్లు  ; 3,401

తెలంగాణలో ఎన్నికల షెడ్యూల్‌

• నోటిఫికేషన్‌ విడుదల : ఏప్రిల్‌ 18
• నామినేషన్‌కు చివరి తేదీ : ఏప్రిల్‌ 25
• నామినేషన్‌ల పరిశీలన : ఏప్రిల్‌ 26
• ఉపసంహరణ చివరి తేదీ : ఏప్రిల్‌ 29
• పోలింగ్‌ తేదీ : మే 13
• ఓట్ల లెక్కింపు: జూన్‌ 4

మాడల్‌ పోలింగ్‌ స్టేషన్లు

• మహిళలు నిర్వహించేవి ;597
• దివ్యాంగులు నిర్వహించేవి ; 119
• యువత నిర్వహించేవి ; 119
• మాడల్‌ పోలింగ్‌ స్టేషన్లు ; 644

పోలింగ్‌ సిబ్బంది

• ప్రిసైడింగ్‌ అధికారులు  ; 46,403
• పోలింగ్‌ ఆఫీసర్‌లు  ; -1 46,403
• పోలింగ్‌ ఆఫీసర్‌లు  ; -2 92,806
• మొత్తం పోలింగ్‌ సిబ్బంది ; 1,85,612
• మైక్రో అబ్జర్వర్లు  ; 7,169