ఇవి చదివితే ఇంటర్‌ పాస్‌

• వెబ్‌సైట్‌లో సిద్ధంగా స్టడీ మెటీరియల్‌
• సబ్జెక్టులవారీగా మోడల్‌ ప్రశ్నపత్రాలు
• ఆవిష్కరించిన మంత్రి సబితాఇంద్రారెడ్డి

హైదరాబాద్‌, అక్టోబర్‌ 12 (నమస్తే తెలంగాణ): ఇంటర్‌ ఫస్టియర్‌ పరీక్షలకు హాజరయ్యే విద్యార్థుల సౌకర్యార్థం ఉచిత స్టడీ మెటీరియల్‌ను ఇంటర్‌బోర్డు అధికారులు అందుబాటులోకి తీసుకొచ్చారు. ప్రస్తుతం సెకండియర్‌లోని విద్యార్థులకు ఈ నెలలోనే ఫస్టియర్‌ పరీక్షలను నిర్వహించనున్న నేపథ్యంలో ఈ స్టడీ మెటీరియల్‌ రూపొందించారు. స్టడీ మెటీరియల్స్‌ను విద్యాశాఖ మంత్రి పీ సబితా ఇంద్రారెడ్డి మంగళవారం గన్‌ఫౌండ్రీలోని తన కార్యాలయంలో ఆవిష్కరించారు. పరీక్షలను ధైర్యంగా ఎదుర్కొనేందుకు ఈ స్టడీ మెటీరియల్‌ విద్యార్థులకు కరదీపికగా ఉపయోగపడుతుందని మంత్రి పేర్కొన్నారు. జంతుశాస్త్రం, వృక్షశాస్త్రం, గణితం, భౌతికశాస్త్రం, చరిత్రకు సంబంధించిన స్టడీ మెటీరియల్‌ మంగళవారం నుంచి www.tsbie.cgg.gov.in వెబ్‌సైట్‌లో అందుబాటులో ఉంటుందని చెప్పారు. మిగతా సబ్జెక్టుల స్టడీ మెటీరియల్‌ రెండు మూడు రోజుల్లో అందుబాటులో పెడతామని తెలిపారు. పరీక్షల్లో 50 శాతం చాయిస్‌ ప్రశ్నలు ఇస్తున్నామని ఇంటర్‌బోర్డు కమిషనర్‌ ఒమర్‌ జలీల్‌ పేర్కొన్నారు. అన్ని సబ్జెక్టుల మోడల్‌ ప్రశ్నపత్రాలను వెబ్‌సైట్‌లో పెట్టామని, వాటిని డౌన్‌లోడ్‌ చేసుకొని పరీక్షలకు సన్నద్ధం కావాలని సూచించారు.

ముఖ్యమైన పేపర్లలో ప్రశ్నల సరళి

• రసాయనశాస్త్రంలో సెక్షన్‌ ఏలో ఒక్కో ప్రశ్నకు 2 మార్కులు, సెక్షన్‌ బీలో 4, సెక్షన్‌ సీలో 8 మార్కుల ప్రశ్నలివ్వనున్నారు. సెక్షన్‌ ఏలో 10 ప్రశ్నలకు మొత్తం రాయాలి. సెక్షన్‌ బీలో 12 ప్రశ్నలకు 6, సెక్షన్‌ సీలో 4 ప్రశ్నలకు రెండింటికి సమాధానాలు రాయాలి.
• గణితంలో ఏ, బీ, సీ మూడు సెక్షన్లు ఉండగా.. ఏ సెక్షన్‌లో 2 మార్కులు, బీ సెక్షన్‌లో 4, సీ సెక్షన్‌లో 7 మార్కుల ప్రశ్నలుంటాయి. ఏ సెక్షన్‌లో 10 ప్రశ్నలకు అన్నింటికీ సమాధానం రాయాలి. బీ సెక్షన్‌లో 10 ప్రశ్నలకు 5, సీ సెక్షన్‌లో 10 ప్రశ్నలకు ఐదింటికి సమాధానాలివ్వాలి.
• బోటనీ ఏ సెక్షన్‌లో 2 మార్కులు, బీ సెక్షన్‌లో 4 మార్కులు, సీ సెక్షన్‌లో 8 మార్కుల ప్రశ్నలిస్తారు. ఏ సెక్షన్‌లో 10 ప్రశ్నలకు సమాధానాలు రాయాలి. బీ సెక్షన్‌లో 12 ప్రశ్నలకు 6 రాస్తే సరిపోతుంది. సీ సెక్షన్‌లో 4 ప్రశ్నల్లో రెండింటికి సమాధానాలివ్వాలి.
• భౌతికశాస్త్రంలో ఏ సెక్షన్‌లో 2, బీ సెక్షన్‌లో 4, సీ సెక్షన్‌లో 8 మార్కుల ప్రశ్నలిస్తారు. సెక్షన్‌ ఏలో పది ప్రశ్నలిస్తారు. అన్నింటికీ సమాధానం రాయాలి. బీ సెక్షన్‌లో 12 ప్రశ్నల్లో ఆరింటికి, సెక్షన్‌ సీలో 4 ప్రశ్నలకు రెండింటికి సమాధానాలివ్వాలి.
• అర్ధశాస్త్రం, రాజనీతిశాస్త్రం రెండింటిలో ఏ సెక్షన్‌లో 10, బీ సెక్షన్‌లో 5, సీ సెక్షన్‌లో 2 మార్కుల ప్రశ్నలిస్తారు. ఏ సెక్షన్‌లో 6 ప్రశ్నలకు 3, బీ సెక్షన్‌లో 16 ప్రశ్నలకు 8, సీ సెక్షన్‌లో 30 ప్రశ్నలకు 15 ప్రశ్నలకు సమాధానాలు రాయాల్సి ఉంటుంది.