DSC | తొలి వేతనం రెండు నెలలు ఆలస్యం.. డీఎస్సీ-24 టీచర్లకు ఆదిలోనే నిరాశ!

డీఎస్సీ-2024లో ఉద్యోగం సాధించి, కొత్తగా కొలువులో చేరిన టీచర్లకు వేతన కష్టం వచ్చి పడింది. ఉద్యోగంలో చేరి రెండు నెలలైనా కొన్ని జిల్లాల్లో ఇంకా వారికి తొలి వేతనం అందలేదు. టీచర్ల నియామకపు తేదీపై ప్రభుత్వం నుంచి స్పష్టత కొరవడటంతో జీతాల చెల్లింపు సందిగ్ధంలో పడింది. డీఎస్సీ-2024లో ఎంపికైన 10 వేలకుపైగా టీచర్లకు అక్టోబర్‌ 10వ తేదీతో అపాయింట్‌మెంట్‌ ఆర్డర్లు ఇచ్చారు.

• అక్టోబర్‌ 10 నుంచి జీతం ఇస్తామన్న విద్యాశాఖ
• పనిచేయని కాలానికి ఎలా ఇవ్వాలంటున్న ‘ట్రెజరీ’

DSC | హైదరాబాద్‌, డిసెంబర్‌ 5 (నమస్తే తెలంగాణ) : డీఎస్సీ-2024లో ఉద్యోగం సాధించి, కొత్తగా కొలువులో చేరిన టీచర్లకు వేతన కష్టం వచ్చి పడింది. ఉద్యోగంలో చేరి రెండు నెలలైనా కొన్ని జిల్లాల్లో ఇంకా వారికి తొలి వేతనం అందలేదు. టీచర్ల నియామకపు తేదీపై ప్రభుత్వం నుంచి స్పష్టత కొరవడటంతో జీతాల చెల్లింపు సందిగ్ధంలో పడింది. డీఎస్సీ-2024లో ఎంపికైన 10 వేలకుపైగా టీచర్లకు అక్టోబర్‌ 10వ తేదీతో అపాయింట్‌మెంట్‌ ఆర్డర్లు ఇచ్చారు. ఆ తర్వాత వారం రోజులకు జిల్లాల్లో కౌన్సెలింగ్‌ నిర్వహించి పోస్టింగ్స్‌ ఇచ్చారు. దీంతో కొంతమంది టీచర్లు అక్టోబర్‌ 15న, మరికొందరు అక్టోబర్‌ 17న పాఠశాలల్లో చేరారు. ఒక తేదీతో రిక్రూటై, మరో తేదీన పోస్టింగ్‌ చేతికందడంతో వేతనాల చెల్లింపునకు సాంకేతిక సమస్యలు వచ్చిపడ్డాయి. కొత్త టీచర్లకు అక్టోబర్‌ 10 నుంచి వేతనాలిస్తామని విద్యాశాఖ ప్రకటించగా, పనిచేయని కాలానికి వేతనాలు ఎలా ఇవ్వాలంటూ ట్రెజరీ అధికారులు అభ్యంతరాలు వ్యక్తంచేశారు. దీంతో విద్యాశాఖ అధికారులు ఆర్థికశాఖ నుంచి స్పష్టత కోరారు. జాయినింగ్‌ తేదీని 10వ తేదీగా పరిగణించి, అదే తేదీ నుంచి వేతనం చెల్లించేందుకు ఆర్థికశాఖ అనుమతి కోరారు. ఈ ఫైల్‌ డిప్యూటీ సీఎం భట్టి విక్రమార్క పేషీకి చేరింది. డిప్యూటీ సీఎం అందుబాటులో లేకపోవడం, డిసెంబర్‌ 3వ తేదీ దాటిపోవడంతో వేతనాల చెల్లింపు పెండింగ్‌లో పడిపోయింది.

నిరాశలో కొత్త టీచర్లు

• కొన్ని జిల్లాల్లో ఎంప్లాయ్‌ ఐడీ, ప్రాన్‌ అకౌంట్లు క్రియేట్‌ కాలేదు. కొంతమందికి ఎంప్లాయ్‌ ఐడీ క్రియేట్‌ అయినా ప్రాన్‌ అకౌంట్లు క్రియేట్‌ కాలేదు. దీంతో వేతనాలు చెల్లింపునకు ఇబ్బందులొస్తున్నాయి.
• ఉమ్మడి కరీంనగర్‌ జిల్లాలకు చెందిన ఒక టీచర్‌ తొలి వేతనంతో తనకు కోచింగ్‌ ఇచ్చి, మార్గదర్శిగా నిలిచిన గురువుకు మంచి బహుమతి ఇవ్వాలన్న ఆలోచనతో ఉండగా, ఇంతవరకు తొలివేతనం అందకపోవడం అతని కోరిక తీరలేదు.
• జనగామ జిల్లాకు చెందిన మరో టీచర్‌ చాలా ఏండ్లుగా అశోక్‌నగర్‌, దిల్‌సుఖ్‌నగర్‌లో కోచింగ్‌ తీసుకుని డీఎస్సీలో కొలువు సాధించాడు. వేతనం ఇంకా రాకపోవడంతో బస్సు చార్జీలకు డబ్బులు లేక ఇబ్బంది పడుతున్నట్టు సదరు టీచర్‌ వాపోయాడు.
• హైదరాబాద్‌ జిల్లాలో కొందరు ట్రెజరీ అధికారులు కొత్త టీచర్ల వేతనాల ఫైల్‌ ప్రాసెసింగ్‌కు ఒక్కో టీచర్‌ నుంచి రూ.రెండు వేల చొప్పున వసూలు చేసినట్టు ఆరోపణలొచ్చాయి.