సచివాలంలో ‘ఫేషియల్‌’ అటెండెన్స్‌

సచివాలయ ఉద్యోగులకు నేటి నుంచి నూతన హాజరు వ్యవస్థ అమల్లోకి రానున్నది. ప్రభుత్వ ఉద్యోగులతోపాటు కాంట్రాక్ట్‌, ఔట్‌సోర్సింగ్‌ ఉద్యోగులకు ఫేషియల్‌ రికగ్నైజేషన్‌ అటెండెన్స్‌ విధానం అమలుచేస్తామని సీఎస్‌ ఇటీవల ఆదేశాలు జారీ చేసిన సంగతి తెలిసిందే.

• నేటి నుంచి అమల్లోకి.. ఉద్యోగుల అసంతృప్తి

హైదరాబాద్‌, నవంబర్‌ 21 (నమస్తే తెలంగాణ) : సచివాలయ ఉద్యోగులకు నేటి నుంచి నూతన హాజరు వ్యవస్థ అమల్లోకి రానున్నది. ప్రభుత్వ ఉద్యోగులతోపాటు కాంట్రాక్ట్‌, ఔట్‌సోర్సింగ్‌ ఉద్యోగులకు ఫేషియల్‌ రికగ్నైజేషన్‌ అటెండెన్స్‌ విధానం అమలుచేస్తామని సీఎస్‌ ఇటీవల ఆదేశాలు జారీ చేసిన సంగతి తెలిసిందే. ఈ మేరకు శుక్రవారం నుంచి రిజిస్ట్రేషన్‌ ప్రారంభం కానున్నది. అయితే ఈ విధానంపై ఉద్యోగులు అసంతృప్తి వ్యక్తం చేస్తున్నారు. కనీసం ఉద్యోగులతోనో, ఉద్యోగ సంఘాల ప్రతినిధులతోనో ఎందుకు సంప్రదించలేదని ప్రశ్నిస్తున్నారు. ఈ హాజరు విధానంతో తమకు ఎదురయ్యే సమస్యలను ఎలా పరిష్కరిస్తారో చెప్పాలని డిమాండ్‌ చేస్తున్నారు.

ఉద్యోగుల అభ్యంతరాలు..

• సచివాలయ ఉద్యోగులు కొన్నిసార్లు కోర్టు పనిమీదనో, అసెంబ్లీ విధుల్లో భాగంగానో, మంత్రులు, ఉన్నతాధికారుల ఆదేశం మేరకో ఆలస్యమైతదని చెప్తున్నారు.
• అనేక సందర్భాల్లో రెండు, మూడు గంటలు అదనంగా ఆఫీస్‌లో ఉండాల్సి వస్తుందని, ముఖ్యంగా అసెంబ్లీ సమావేశాల సందర్భంలో అర్ధరాత్రి వరకూ ఉండాల్సి వస్తుందన్నారు. ఇలాంటి సందర్భాల్లో ఈ విధానాన్ని ఎలా సర్దుబాటు చేస్తారో చెప్పలేదన్నారు.
• కొన్నిసార్లు సెలవు రోజుల్లోనూ పని చేయాల్సి వస్తున్నదని చెప్తున్నారు. దానికి కొత్త విధానంలో ఏదైనా ప్రతిఫలం ఇస్తారా? అని ప్రశ్నిస్తున్నారు.
• ఉద్యోగులంతా సమానమే అయితే సచివాయలంలో పనిచేసే ఆలిండియా సర్వీసెస్‌ అధికారులకు కూడా దీనిని వర్తింపజేస్తారా? అని ప్రశ్నిస్తున్నారు.
• ఈ విధానాన్ని సచివాలయానికే పరిమితం చేస్తారా? జిల్లాలకు కూడా విస్తరిస్తారా? అనేది స్పష్టత ఇవ్వాలని డిమాండ్‌ చేస్తున్నారు.
• ప్రభుత్వం తమను సంప్రదించి ఉంటే ఈ విషయాలపై స్పష్టత కోరేవాళ్లమని చెప్తున్నారు.
• ప్రభుత్వ ఆదేశాలు పాటించేందుకు అభ్యంతరం లేదని, అయితే ఏకపక్షంగా నిర్ణయించినందుకే అభ్యంతరం తెలుపుతున్నామంటున్నారు. ఇప్పటికైనా ఉద్యోగులతో సంప్రదింపులు జరిపి అనుమానాలు నివృత్తి చేశాకే అమలు చేయాలని డిమాండ్‌ చేస్తున్నారు.