తెలంగాణను కాదని బుందేల్‌ఖండ్‌కు.. డిఫెన్స్‌ కారిడార్‌పై కేంద్రం వివక్ష

ఏరోస్పేస్‌, రక్షణ రంగంలో దేశానికే తలమానికంగా నిలిచిన తెలంగాణపై కేంద్ర ప్రభుత్వం మరోమారు తీవ్ర వివక్ష ప్రదర్శించింది. మన రాష్ర్టానికి దక్కాల్సిన డిఫెన్స్‌ కారిడార్‌ను బుందేల్‌ఖండ్‌కు మంజూరు చేసింది.

• రాష్ర్టానికి అనుకూలతలున్నా కనికరించని మోదీ సర్కారు

హైదరాబాద్‌, జూలై 12 (నమస్తే తెలంగాణ): ఏరోస్పేస్‌, రక్షణ రంగంలో దేశానికే తలమానికంగా నిలిచిన తెలంగాణపై కేంద్ర ప్రభుత్వం మరోమారు తీవ్ర వివక్ష ప్రదర్శించింది. మన రాష్ర్టానికి దక్కాల్సిన డిఫెన్స్‌ కారిడార్‌ను బుందేల్‌ఖండ్‌కు మంజూరు చేసింది. తెలంగాణలో గతంలో ఏర్పాటైన అనేక ప్రభుత్వ రంగ సంస్థలకు తోడుగా బీఆర్‌ఎస్‌ ప్రభుత్వ హయాంలో ప్రపంచ ప్రఖ్యాత కంపెనీలు పెద్ద ఎత్తున కొలువుదీరాయి. దీన్ని దృష్టిలో పెట్టుకొని హైదరాబాద్‌-బెంగుళూరు మార్గంలో డిఫెన్స్‌ కారిడార్‌ను మంజూరు చేయాలని మన రాష్ట్రం దీర్ఘకాలం నుంచి కోరుతున్నది.

కానీ, మోదీ ప్రభుత్వం మాత్రం బీజేపీ పాలిత ఉత్తరప్రదేశ్‌లో డిఫెన్స్‌ కారిడార్‌కు మద్దతు ఇస్తున్నది. ప్రపంచస్థాయి కంపెనీల పెట్టుబడులను ఆకర్షించడం ద్వారా ఏరోస్పేస్‌, డిఫెన్స్‌ రంగంలో తెలంగాణ దేశంలోనే ఓ ప్రధాన కేంద్రంగా నిలిచింది. తద్వారా రక్షణ రంగంలో భారత్‌ స్వావలంబన సాధించేందుకు మన రాష్ట్రం ఎంతగానో దోహదపడుతున్నది. బీఆర్‌ఎస్‌ ప్రభుత్వ హయాంలో ఆదిభట్ల, మహేశ్వరం, శంషాబాద్‌ తదితర ప్రాంతాల్లో ఎస్‌ఈజెడ్‌తోపాటు ఏరోస్పేస్‌, డిఫెన్స్‌ ఇండస్ట్రియల్‌ పార్క్‌ను ఏర్పాటు చేయడం ద్వారా అనేక విదేశీ పెట్టుబడులను ఆకర్షించింది.

క్షిపణులతోపాటు రక్షణ రంగానికి అవసరమైన అనేక ఉత్పత్తులకు తెలంగాణ కేంద్రంగా ఆవిర్భవించింది. దేశీయ రక్షణ రంగ అవసరాలను తీర్చడమే కాకుండా తెలంగాణ నుంచి పలు ఉత్పత్తులు విదేశాలకు ఎగుమతి అవుతున్నాయి. బలమైన ఎకోసిస్టం, నైపుణ్యం కలిగిన మానవ వనరులు, ప్రపంచ కంపెనీల భాగస్వామ్యం తదితర అనుకూలతలు ఉన్నప్పటికీ మన రాష్ట్రం పట్ల కేంద్రం వివక్ష ప్రదర్శిస్తున్నది.

బుందేల్‌ఖండ్‌కు రక్షణ కారిడార్‌

ఏరోస్పేస్‌, డిఫెన్స్‌ రంగాల్లో తెలంగాణకు ఉన్న అనుకూలతలను గతంలో బీఆర్‌ఎస్‌ ప్రభుత్వం అనేకసార్లు కేంద్రానికి వివరించి డిఫెన్స్‌ కారిడార్‌ను మంజూరు చేయాలని కోరింది. తాజాగా సీఎం రేవంత్‌రెడ్డి నేతృత్వంలోని రాష్ట్ర బృందం మరోసారి కేంద్రమంత్రి పీయూష్‌ గోయల్‌ను కలిసి హైదరాబాద్‌-బెంగుళూరు మార్గంలో రక్షణ కారిడార్‌ను మంజూరు చేయాలని విజ్ఞప్తి చేసింది.

కానీ, తెలంగాణ వినతులను ఏమాత్రం పట్టించుకోని కేంద్రం ఇటీవల ఉత్తరప్రదేశ్‌లోని బుందేల్‌ఖండ్‌కు రక్షణ కారిడార్‌ను మంజూరు చేసింది. బుందేల్‌ఖండ్‌లో రూ. 20 వేల కోట్ల పెట్టుబడితో 3వేల ఎకరాల్లో డిఫెన్స్‌ కారిడార్‌ను ఏర్పాటు చేస్తున్నారు. అక్కడ పరిశ్రమలు నెలకొల్పేవారికి కేంద్రం భారీగా ప్రోత్సాహకాలను కల్పించడంతోపాటు 100% విదేశీ పెట్టుబడులకు అనుమతి ఇచ్చింది. బుందేల్‌ఖండ్‌ డిఫెన్స్‌ కారిడార్‌కు రూ.50 వేల కోట్ల పెట్టుబడులు ఆకర్షించడం ద్వారా 2.5లక్షల మందికి ఉద్యోగావకాశాలు కల్పించాలని నిర్ణయించారు.

డ్రోన్‌ టెక్నాలజీలో తెలంగాణ జోరు

• అన్‌మ్యాన్‌డ్‌ ఏరియల్‌ వెహికల్స్‌ (యూఏవీ) అభివృద్ధిలో తెలంగాణ దేశంలోనే ప్రధాన కేంద్రంగా ఎదుగుతున్నది.
• ‘భారత్‌ డ్రోన్‌ శక్తి-2024’ ఈవెంట్‌లో హైదరాబాద్‌కు చెందిన కంపెనీలు అత్యాధునిక యూఏవీ టెక్నాలజీని ప్రదర్శించి పలువురి ప్రశంసలు అందుకున్నాయి.
• రక్షణ రంగంతోపాటు వ్యవసాయ, వైద్య రంగాలకు అవసరమయ్యే ఏఐ సొల్యూషన్స్‌ను మారుట్‌ డ్రోన్స్‌ కంపెనీ అభివృద్ధి చేస్తున్నది.
• తెలంగాణలోని రక్షణ రంగ సంస్థలు నెక్ట్స్‌ జనరేషన్‌ డ్రోన్‌-బేస్డ్‌ నిఘా వ్యవస్థను అభివృద్ధి చేస్తున్నాయి.

రాష్ట్రంలో డిఫెన్స్‌ కారిడార్‌ ఏర్పాటుకు ఉన్న అనుకూలతలు

• డిఫెన్స్‌ రీసెర్చ్‌ అండ్‌ డెవలప్‌మెంట్‌ ఆర్గనైజేషన్‌ (డీఆర్‌డీవో) ద్వారా హైదరాబాద్‌ ఇప్పటికే భారత మిసైల్‌ హబ్‌గా ఎదిగింది.
• హైదరాబాద్‌లోని రీసెర్చ్‌ సెంటర్‌ ఇమారత్‌ (ఆర్‌సీఐ) క్షిపణులు, ఏవియానిక్స్‌ (ఎయిర్‌క్రాఫ్ట్‌లకు అవసరమయ్యే ఎలక్ట్రానిక్స్‌) ఉత్పత్తుల కేంద్రంగా అభివృద్ధి చెందింది.
• డిఫెన్స్‌ ఎలక్ట్రానిక్స్‌ రీసెర్చ్‌ ల్యాబొరేటరీ (డీఈఆర్‌ఎల్‌) ఎలక్ట్రానిక్‌ వార్‌ఫేర్‌ టెక్నాలజీని అభివృద్ధి చేస్తున్నది.
• డిఫెన్స్‌ మెటలర్జికల్‌ రీసెర్చ్‌ ల్యాబొరేటరీ (డీఎంఆర్‌ఎల్‌) రక్షణ రంగానికి అవసరమైన పరికరాలను ఉత్పత్తికి చేస్తున్నది.
• క్షిపణుల అభివృద్ధిలో భారత్‌ డైనమిక్స్‌ లిమిటెడ్‌ (బీడీఎల్‌), మిశ్ర ధాతు నిగమ్‌ (మిధానీ) కీలకపాత్ర పోషిస్తున్నాయి.
• ఆదిభట్ల ఏరోస్పేస్‌ ఎస్‌ఈజెడ్‌లోని టాటా-బోయింగ్‌ ఏరోస్పేస్‌ లిమిటెడ్‌ (టీబీఏఎల్‌) అపాచీ హెలికాప్టర్లకు అవసరమైన ఫ్యూజ్‌లేజ్‌లు సహా పలు ప్రధాన భాగాలను తయారుచేసి అంతర్జాతీయ మార్కెట్‌కు సరఫరా చేస్తున్నది.
• మహేశ్వరం వద్ద దాదాపు 1,000 ఎకరాల్లో ఏర్పాటైన ఏరోస్పేస్‌ పార్క్‌లో ఎంఆర్‌వో (మెయింటెనెన్స్‌, రిపేర్‌ అండ్‌ ఓవర్‌హాల్‌) సౌకర్యంతోపాటు ఏవియానిక్స్‌, విమానాల విడిభాగాలు తయారవుతున్నాయి.
• శంషాబాద్‌లోని జీఎంఆర్‌ ఏరోస్పేస్‌ అండ్‌ ఇండస్ట్రియల్‌ పార్క్‌లో ఎయిర్‌క్రాఫ్ట్‌ మెయింటెనెన్స్‌తోపాటు హైటెక్‌ తయారీ కేంద్రం ఉన్నది.
• ఈ ఇండస్ట్రియల్‌ పార్క్‌లో బోయింగ్‌, లాక్‌హీడ్‌ మార్టిన్‌, ఎయిర్‌బస్‌, ప్రాట్‌ అండ్‌ విట్నీ తదితర ప్రపంచ ప్రఖ్యాత ఏరోస్పేస్‌, డిఫెన్స్‌ కంపెనీలు పరిశ్రమలను ఏర్పాటు చేసి, తమ ఉత్పత్తులను ప్రపంచ మార్కెట్‌కు సరఫరా చేస్తున్నాయి.