చదివింది చాలు.. కొత్తవి వద్దు!

గ్రూప్‌-1 ప్రిలిమినరీ పరీక్ష తేదీ దగ్గరపడుతున్నది. పరీక్ష ముగింట్లో కొత్త అంశాల జోలికి వెళ్లకుండా, ఇప్పటి వరకు చదువుకొన్న వాటినే రివిజన్‌ చేసుకోవడం ఉత్తమమని సూచిస్తున్నారు గ్రూప్‌-1 ఉద్యోగుల సంఘం రాష్ట్ర అధ్యక్షుడు మామిండ్ల చంద్రశేఖర్‌గౌడ్‌.

• రివిజన్‌ చేయడమే ఉత్తమం
• చివరి వారం చాలా కీలకం
• లేట్‌ నైట్‌ స్టడీతో లాభం లేదు
• సినాప్సిస్‌నే ఫాలో అవ్వండి
• ఆత్మవిశ్వాసంతోనే గ్రూప్‌-1
•  గ్రూప్‌-1 ఉద్యోగుల సంఘం రాష్ట్ర అధ్యక్షుడు మామిండ్ల చంద్రశేఖర్‌గౌడ్‌ సూచనలు

హైదరాబాద్‌ సిటీబ్యూరో, అక్టోబర్‌ 9 (నమస్తే తెలంగాణ): గ్రూప్‌-1 ప్రిలిమినరీ పరీక్ష తేదీ దగ్గరపడుతున్నది. పరీక్ష ముగింట్లో కొత్త అంశాల జోలికి వెళ్లకుండా, ఇప్పటి వరకు చదువుకొన్న వాటినే రివిజన్‌ చేసుకోవడం ఉత్తమమని సూచిస్తున్నారు గ్రూప్‌-1 ఉద్యోగుల సంఘం రాష్ట్ర అధ్యక్షుడు మామిండ్ల చంద్రశేఖర్‌గౌడ్‌. ఈ నెల 16న గ్రూప్‌-1 ప్రిలిమ్స్‌ నిర్వహించనున్న నేపథ్యంలో పరీక్షార్థులకు ఆయన పలు సూచనలు చేశారు.

• ఇప్పటివరకు ప్రిపేర్‌ అయిన అంశాలను ఈ వారం రోజుల్లో మూడుసార్లు రివిజన్‌ చేయాలి.
• చివరి వారం రోజులను 3 భాగాలుగా విభజించుకోవాలి. మొదటి నాలుగు రోజులు అంశాలన్నింటినీ ఒకసారి రివిజన్‌ చేసుకోవాలి. మళ్లీ రెండు రోజుల్లో రెండోసారి పునఃశ్చరణ చేయాలి. చివరిరోజు అన్ని అంశాలను మననం చేసుకోవాలి.
• ప్రిపరేషన్‌ సమయంలో ఇప్పటికే తయారుచేసుకొన్న సినాప్సిస్‌ను మాత్రమే రివిజన్‌ చేయాలి. కొత్తఅంశాల జోలికి వెళ్లకూడదు.
• ఒక అంశాన్ని చదవగానే.. అందులోని సారాంశం మొత్తం మైండ్‌లో రివ్యూ చేసుకోండి. దీంతో సమయం ఆదా అవుతుంది. ఎక్కువగా గుర్తుంచుకొనే అవకాశం ఉంటుంది.
• తమకు తాము ఒత్తిడిని అధిగమిస్తామనే ఆత్మవిశ్వాసాన్ని పెంపొందించుకోవాలి. ఒత్తిడిని జయించినవారే విజయం సాధిస్తారు. కొత్త అంశాలను చదవకపోవడం వల్ల ఒత్తిడి నుంచి బయటపడతాం. చదివినవే రివిజన్‌ చేసినప్పుడే ఒత్తిడిని అధిగమించేందుకు వీలుంటుంది.
• రిలాక్స్‌గా ఉండాలి. రిలాక్స్‌గా ఉంటే ఏ అంశాన్నైనా అత్యంత వేగంగా అంచనా వేయగలం. పరిష్కరించగలం. అందుకే ప్రశాంతత ముఖ్యం.
• టైం మేనేజ్‌మెంట్‌ చాలా ముఖ్యం. లేట్‌ నైట్లు చదవడం వల్ల ప్రయోజనం ఉండదు. సాయంత్రం 7 గంటలలోపే డిన్నర్‌ పూర్తిచేయండి. రాత్రి 9 గంటలకు నిద్రకు ఉపక్రమించండి. తెల్లవారుజామున 4 గంటలకే నిద్రలేచి చదవడం వల్ల ఎలాంటి అంతరాయాలుండవు. పొద్దున చదవడం వల్ల ఎక్కువగా గుర్తుంచుకొనే అవకాశం ఉంటుంది.
• 150 ప్రశ్నలను నిర్ణీత సమయంలో పూర్తి చేయాలి. సమయపాలన పాటించిన వాళ్లు ప్రతి ప్రశ్నను అటెంప్ట్‌ చేస్తారు. బాగా తెలిసిన జవాబులను వెంటనే చేయండి. తెలియని వాటిని రెండు మూడుసార్లు చదివి పూర్తి చేయండి.
• నెగిటివ్‌ మార్కులు లేవు, కాబట్టి జవాబులు తెలియనివి వదిలేయ వద్దు. 150 ప్రశ్నలకు జవాబులు చేయాల్సిందే.
• ఆత్మన్యూనతా భావం, యాంకె్జైటి దరిచేరనివ్వొద్దు. ఎప్పుడూ ఉత్సాహంగా ఉండేందుకు ప్రయత్నించాలి.
• తెలిసిన ప్రశ్నలకు మొదటి దశలోనే జవాబు ఇవ్వాలి. దీంతో అభ్యర్థులకు ఆత్మవిశ్వాసం పెరుగుతుంది. సమయం ఆదా అవుతుంది. తెలియని వాటిని ముందే రాయడానికి రెండు, మూడుసార్లు చదవడం వల్ల సమయం వృథా అయ్యే అవకాశం ఉంటుంది.
• సమాధానం తెలియదని కంగారు పడొద్దు. జవాబు ఇదా? అదా? అనే సంశయం పెట్టుకోవద్దు. సమాధానం తెలియదని కంగారు పడటం కంటే.. ఒకటికి రెండుసార్లు వేగంగా ప్రశ్నను చదవాలి. అప్పుడే సరైన ఆన్సర్‌ చేయగలరు.