నిందితుల హాజరుకు ఆలస్యమెందుకైంది?.. మహాన్యూస్‌ కేసులో పోలీసులకు కోర్టు షోకాజ్‌

మహాన్యూస్‌పై దాడి కేసులో అరెస్టు చేసిన నిందితులను 24 గంటల్లోపు కోర్టు ఎదుట హాజరుపర్చలేకపోవడానికి గల కారణాలను తెలియజేయాలని నాంపల్లిలోని 17వ అదనపు చీఫ్‌ జ్యుడీషియల్‌ మేజిస్ట్రేట్‌ కోర్టు టాస్క్‌ఫోర్స్‌ వెస్ట్‌జోన్‌, జూబ్లీహిల్స్‌ పోలీసులను ఆదేశించింది.

నాంపల్లి క్రిమినల్‌ కోర్టులు, జూలై 3 (నమస్తే తెలంగాణ): మహాన్యూస్‌పై దాడి కేసులో అరెస్టు చేసిన నిందితులను 24 గంటల్లోపు కోర్టు ఎదుట హాజరుపర్చలేకపోవడానికి గల కారణాలను తెలియజేయాలని నాంపల్లిలోని 17వ అదనపు చీఫ్‌ జ్యుడీషియల్‌ మేజిస్ట్రేట్‌ కోర్టు టాస్క్‌ఫోర్స్‌ వెస్ట్‌జోన్‌, జూబ్లీహిల్స్‌ పోలీసులను ఆదేశించింది. ఈ మేరకు గురువారం వారికి షోకాజ్‌ నోటీసులు జారీచేసింది.

ఈ కేసులో నిందితులను జూన్‌ 29న అరెస్టు చేసిన టాస్క్‌ఫోర్స్‌ పోలీసులు 30వ తేదీన జూబ్లీహిల్స్‌ పోలీసులకు అప్పగించారని వారి తరఫు న్యాయవాది కోర్టు తెలిపారు. ఈ కేసులో రెండో ముద్దాయి రామచర్ల నర్సింహులు అలియాస్‌ నర్సింగ్‌, మూడో ముద్దాయి జంగయ్యను టాస్క్‌ఫోర్స్‌ వెస్ట్‌జోన్‌ పోలీసులు అంతుచూస్తామని భయభ్రాంతులకు గురిచేశారని చెప్పారు. సెక్షన్‌ 109 (1), 238 బీఎన్‌ఎస్‌ ఈ కేసుకు వర్తించవని, మిగతా సెక్షన్లు ఏడేండ్లలోపు శిక్షలున్నవేనని తెలిపారు.