బీజేపీ చట్టానికి కాంగ్రెస్‌ మద్దతు!.. ప్రైవేట్‌కు చుట్టంలా కొత్త విద్యుత్తు చట్టం! 

ప్రభుత్వ డిస్కంలకు ఉరితాడు బిగించే.. ప్రైవేట్‌ డిస్కంలకు రెడ్‌కార్పెట్‌ పరిచే కొత్త విద్యుత్తు చట్టానికి కాంగ్రెస్‌ సర్కారు పరోక్షంగా మద్దతునిస్తున్నది. బీజేపీ తెచ్చిన ప్రజా వ్యతిరేక చట్టానికి కాంగ్రెస్‌ సర్కారు వంతపాడుతున్నది.

• బీజేపీ విధానాలకు కాంగ్రెస్‌ పరోక్ష మద్దతు
• ఈ చట్టంతో అనేక నష్టాలు..డిస్కంల మనుగడకు ప్రమాదం
• ఇలాంటి చట్టంపై రాష్ట్రం గప్‌చుప్‌
• అభ్యంతరాలు కూడా వ్యక్తంచేయని వైనం

హైదరాబాద్‌, డిసెంబర్‌ 3 (నమస్తే తెలంగాణ): ప్రభుత్వ డిస్కంలకు ఉరితాడు బిగించే.. ప్రైవేట్‌ డిస్కంలకు రెడ్‌కార్పెట్‌ పరిచే కొత్త విద్యుత్తు చట్టానికి కాంగ్రెస్‌ సర్కారు (Congress Govt) పరోక్షంగా మద్దతునిస్తున్నది. బీజేపీ తెచ్చిన ప్రజా వ్యతిరేక చట్టానికి కాంగ్రెస్‌ సర్కారు వంతపాడుతున్నది. ఈ చట్టాన్ని వ్యతిరేకించకుండా… కనీసం రాష్ట్రం నుంచి అభిప్రాయాలు తెలుపకుండా పరోక్షంగా స్వాగతిస్తున్నది. విద్యుత్తు చట్టం (సవరణ)-2025 ముసాయిదాను (Electricity Amendment Bill) కేంద్ర ప్రభుత్వం విడుదల చేసింది. దాదాపు 33 రకాల సంస్కరణలను ఈ చట్టం ద్వారా ప్రతిపాదించింది. ప్రైవేట్‌ వ్యక్తులకు డిస్ట్రిబ్యూషన్‌ లైసెన్స్‌లు జారీ చేసేందుకు ఈ చట్టం వీలు కల్పించనుంది.

ఈ డ్రాఫ్ట్‌ బిల్లుపై రాష్ర్టాలు నవంబర్‌ 30లోపు తమ అభిప్రాయాలు తెలపాలని కేంద్రం గడువు విధించింది. ఈ గడువు ముగిసినప్పటికీ ఇంతవరకు తెలంగాణలోని కాంగ్రెస్‌ ప్రభుత్వం తన అభిప్రాయాన్ని వెల్లడించలేదు. ఈ చట్టాన్ని వ్యతిరేకిస్తున్నట్టు ప్రకటన చేయలేదు. ఇదే విషయంపై ఇటీవల కొందరు విలేకరులు డిప్యూటీ సీఎం భట్టి విక్రమార్కను ఆరా తీయగా, తమ అధికారుల బృందం ఈ డ్రాఫ్ట్‌పై అధ్యయనం చేస్తున్నదని తెలిపారు. కేంద్రం విధించిన గడువు కూడా ముగిసిందని, బిల్లుపై మౌనం దాల్చడం ద్వారా రాష్ట్ర ప్రభుత్వం పరోక్షంగా బీజేపీ తెచ్చిన బిల్లుకు సహకరిస్తున్నదని విద్యుత్తురంగ నిపుణులు అభిప్రాయపడుతున్నారు.

ఈ కంపెనీలకు రెడ్‌కార్పెట్‌ పరచినట్టే
ప్రైవేట్‌ రంగానికి డిస్ట్రిబ్యూషన్‌ లైసెన్స్‌లు జారీచేయడమంటే ప్రైవేట్‌ కంపెనీలకు రెడ్‌కార్పెట్‌ పరచినట్టే. ఇప్పటికే విద్యుత్తు డిస్ట్రిబ్యూషన్‌ రంగంలోకి అదానీ, టాటాపవర్‌, టోరెంట్‌, రిలయన్స్‌ వంటి కంపెనీలు ప్రవేశించాయి. టాటా పవర్‌ ముంబై, ఢిల్లీ, అజ్మీర్‌, ఒడిశా, టోరెంట్‌ పవర్‌ సూరత్‌, రిలయన్స్‌ కంపెనీ ముంబైలో సేవలందిస్తున్నాయి. ఈ చట్టం అమల్లోకి వస్తే ఈ కంపెనీలు మన దగ్గర మాదాపూర్‌, గచ్చిబౌలి వంటి ప్రాంతాల్లో డిస్ట్రిబ్యూషన్‌ లైసెన్స్‌ పొందినా ఆశ్చర్యపోనక్కర్లేదు. ప్రజల ఆస్తి అయిన డిస్కంకు చెందిన విద్యుత్తు తీగలను వాడుకునేందుకు ఒప్పుకోవాల్సిందే. ఈ చట్టంతో ప్రైవేటీకరణకు దారితీస్తుందని, డిస్కంల మనుగడపై ప్రతికూల ప్రభావం చూపుతుందన్న ఆందోళనలు వ్యక్తమవుతున్నాయి. ఈ డ్రాఫ్ట్‌ బిల్లును వ్యతిరేకిస్తూ జాతీయంగా విద్యుత్తు ఉద్యోగులు ఆందోళనలకు రెడీ అవుతున్నారు. 2026 జనవరి 30న చలో ఢిల్లీకి ఉద్యోగులు, ఇంజినీర్ల సంఘాలు పిలుపునిచ్చాయి.

సబ్సిడీలు ఎత్తివేస్తరు..
ప్రైవేట్‌ లైసెన్స్‌ వ్యవస్థ వస్తే విద్యుత్తు సరఫరా వ్యవస్థ మొబైల్‌లా మారిపోతుంది. ఒకే ప్రాంతంలో రెండు, మూడు విద్యుత్తు పంపిణీ కంపెనీలుంటాయి. ఫలితంగా ప్రభుత్వ డిస్కంలు కుదేలవుతాయి. ఈ బిల్లు చట్ట రూపం దాల్చితే.. రైతులకు ఉచిత విద్యుత్తు అందదు. గృహజ్యోతి వంటి పథకాలపై ఆశలు వదులుకోవాల్సిందే. సమయానికి బిల్లుల కట్టకపోతే ప్రైవేట్‌ లైసెన్స్‌దారు నిర్దాక్షిణ్యంగా కనెక్షన్‌ కట్‌చేస్తారు. ప్రీ పెయిడ్‌ మీటర్లు పెడితే ముందే రీచార్జి చేసుకోవాల్సి ఉంటుంది. ఏదైనా సమస్య తలెత్తినా.. మరమ్మతులు అవసరమైతే డిస్కంలు ఉచితంగా చేసిపెడుతున్నా యి. భవిష్యత్తులో వీటికి కూడా చార్జీలు వసూలు చేసే ప్రమాదం లేకపోలేదు. మీటర్‌ కాలిపోతే డిస్కంలే ఉచితంగా సమకూరుస్తున్నాయి. కానీ ప్రైవేటు రేపు మీటర్‌కు ఇంత అని చెప్పి వసూలు చేసినా కట్టాల్సిందే.

చట్టంలోని ముఖ్యమైనవి..

• ఒకే భౌగోళిక ప్రాంతంలో ఇప్పుడున్న డిస్కంతోపాటు ప్రైవేట్‌ సంస్థలకు డిస్ట్రిబ్యూషన్‌ లైసెన్స్‌ జారీచేస్తారు. ప్రభుత్వ డిస్కంల నెట్‌వర్క్‌ను ప్రైవేట్‌ సంస్థలు వాడుకోవచ్చు.
• రైల్వే, మెట్రో, తయారీ రంగం, కమర్షియల్‌ సెక్టార్‌ను క్రాస్‌ సబ్సిడీల నుంచి మినహాయించారు. అంటే ఇక నుంచి ఈ రంగంలోని వినియోగదారులు ఎంత విద్యుత్తు చార్జీలుంటే అంతే చెల్లించాలి. అధిక చార్జీలు చెల్లించాల్సిన అవసరముండదు.
• ఒక మెగావాట్‌ దాటిన వినియోగదారులు దేశంలో ఎక్కడి నుంచైనా ఓపెన్‌ యాక్సెస్‌లో నేరుగా కరెంట్‌ కొనుగోలు చేసుకోవచ్చు. వీలింగ్‌ చార్జీలు చెల్లిస్తే సరి.
• విద్యుత్తు చౌర్యం చేస్తే గరిష్ఠంగా ఏడాది మాత్రమే జరిమానా విధిస్తారు. ఈఆర్సీ నాలుగు నెలల్లోనే కేసులను తేల్చాలి.
• ఖర్చు ఆధారిత టారిఫ్‌ అమల్లోకి వస్తుంది. విద్యుత్తు ఉత్పత్తి, సరఫరా, నష్టాలు కలిసి వాస్తవిక చార్జీలను మాత్రమే వసూలు చేయాలి. కొందరికి అధికం, మరికొందరికి తక్కువ చార్జీలు ఉండరాదు.
• ఒక యూనిట్‌ విద్యుత్తు ఉత్పత్తి అయ్యే వ్యయాన్ని డిస్కంలు వసూలు చేసుకోవాలి. సబ్సిడీని ప్రభుత్వం ఇచ్చుకోవచ్చు.
• డిస్కంలు టారిఫ్‌ సవరణ పిటిషన్లు దాఖలు చేయలేకపోతే ఈఆర్సీలే సుమోటోగా కొత్త టారిఫ్‌ను ఖరారుచేస్తాయి.