చలిపులి.. చదువులు గజిబిజి

రాష్ర్టాన్ని చలి వణికిస్తున్నది. కొన్ని జిల్లాల్లో 7 డిగ్రీలు, కొన్ని మండలాల్లో 6 డిగ్రీల ఉష్ణోగ్రతలు నమోదవుతున్నాయి. మారుమూల ప్రాంతాలు, అటవీజిల్లాల్లో అయితే పరిస్థితులు దారుణంగా ఉన్నాయి. మొత్తంగా చలి రాష్ర్టాన్ని గజగజ వణికిస్తున్నది.

• బడులకు వెళ్లేందుకు జంకుతున్న చిన్నారులు
• తగ్గుతున్న విద్యార్థుల హాజరుశాతం

హైదరాబాద్‌, డిసెంబర్‌ 24 (నమస్తే తెలంగాణ) : రాష్ర్టాన్ని చలి వణికిస్తున్నది. కొన్ని జిల్లాల్లో 7 డిగ్రీలు, కొన్ని మండలాల్లో 6 డిగ్రీల ఉష్ణోగ్రతలు నమోదవుతున్నాయి. మారుమూల ప్రాంతాలు, అటవీజిల్లాల్లో అయితే పరిస్థితులు దారుణంగా ఉన్నాయి. మొత్తంగా చలి రాష్ర్టాన్ని గజగజ వణికిస్తున్నది. ఈ చలిపులి పంజాతో చదువులు అటకెక్కుతున్నాయి. సీజనల్‌ జ్వరాలు, దగ్గు, జలుబులు మరోవైపు. అటూ చలి, ఇటూ సీజనల్‌ వ్యాధులతో మొత్తంగా చదువులకు ఆటంకం ఎదురవుతున్నది. చలితీవ్రతతో విద్యార్థులు బడులకు వెళ్లేందుకు జంకుతున్నారు. పొద్దున లేపి, బడికి తయారుచేయడం తల్లిదండ్రులకు సవాల్‌గా మారుతున్నది. కొందరైతే బడికి వెళ్లబోమంటూ మారం చేస్తున్నారు.

బడుల్లో విద్యార్థుల హాజరు అంతంతగానే ఉంటున్నది. కొన్ని స్కూళ్లల్లో అయితే 50% దాటడంలేదు. కొన్నింటిలో అయితే 10మంది కూడా రావడంలేదని టీచర్లు అంటున్నారు. బడికి వచ్చిన పిల్లలు ఏదో ఒక సమస్యతో వస్తున్నారు. అయితే దగ్గు లేదా జలుబు వంటి సమస్యలతో సతమతం అవుతున్నారు. అంటువ్యాధుల బారినపడుతున్నారు. హాస్టళ్లు, వసతిగృహాల్లోని విద్యార్థులు దుప్పట్లు సరిపోక, అవస్థలు పడుతున్నారు. కొన్ని చోట్ల కిటికీలు, తలుపులు సక్రమంగా లేకపోవడంతో చలి చేరి ఇబ్బందులు ఎదుర్కొంటున్నారని విద్యార్థి సంఘాలు అంటున్నాయి. కొన్ని గురుకులాల్లోనూ ఇదే పరిస్థితి ఉందంటున్నాయి.

ఇదీ పరిస్థితి..

• హైదరాబాద్‌లో ఓ ప్రముఖ స్కూల్లో చదివే ఒకటో తరగతి బాలిక ఈ నెల ప్రారంభంలోనే వారం రోజులపాటు జ్వరం బారినపడింది. ఆ వారం బడికి గైర్హాజరు కాగా, చలితీవ్రతతో సోమవారం, తాజాగా శుక్రవారం కూడా బడికి బంక్‌ కొట్టింది.
• మరో స్కూల్లో చదివే పిల్లలు ఉదయం మేల్కొనకపోవడం, తయారు కాకపోవడంతో ఉదయం 7:45 గంటలకు రావాల్సిన స్కూల్‌ వ్యాన్‌ ఆలస్యంగా ఉదయం 8:10గంటలకు వస్తున్నది. పది రోజులుగా ఇదే జరుగుతున్నది. ఈ ప్రభావం మిగతా పిల్లలపైనా పడుతున్నది.
• కుమ్రం బీం ఆసిఫాబాద్‌ జిల్లాలో చలి తీవ్రత కారణంగా బడుల సమయాన్ని మార్చారు. ఉదయం 9 నుంచి 4:15 గంటల వరకు నడువాల్సిన బడుల సమయాన్ని ఉదయం 9:40 నుంచి సాయంత్రం 4:30కు మార్చారు.
• ఆదిలాబాద్‌ జిల్లాలో 7.7 డిగ్రీల ఉష్ణోగ్రతలు ఉన్నాయి. దీంతో పదోతరగతి విద్యార్థులకు ఉదయం, సాయంత్రం నిర్వహించాల్సిన పదో తరగతి స్పెషల్‌క్లాసులను సాయంత్రానికే పరిమితం చేశారు. ఉదయం పూట స్పెషల్‌క్లాసులు రద్దుచేశారు. అది కూడా సాయంత్రం 4:15 గంటల నుంచి 5గంటల వరకే నిర్వహించాలని ఆదేశాలు ఇచ్చారు. చలితీవ్రత కారణంగా పలు జిల్లాల్లో బడుల సమయాన్ని 9:40 నుంచి సాయంత్రం 4:30 గంటలకు మార్చారు.
• 20 రోజులుగా టీచర్లు ఎన్నికల విధుల్లో ఉండటంతో పాఠాలు చెప్పలేదు. క్రిస్మస్‌ సెలవులు రాబోతున్నాయి. పైగా పిల్లల గైర్హాజరీలు. సైన్స్‌ ఫెయిర్‌లు, పేరెంట్‌ టీచర్‌ మీటింగ్స్‌ ఉన్నాయి. దీంతో ఈ నెలంతా అనధికారికంగా సెలవులు ఇచ్చినట్టే.