CM KCR | ఉత్తమ పద్ధతుల గురించి కాదు..భవిష్యత్తు ప్రణాళికలపై ఆలోచించాలి: సీఎం కేసీఆర్‌

జాతీయ రాజకీయాల్లో వేగుచుక్కలా అవతరించిన బీఆర్‌ఎస్‌ మరాఠా గడ్డపై నాగ్‌పూర్‌ వేదికగా పార్టీ విధానాలు, ఆలోచనలను స్పష్టం చేసింది.

• నాగ్‌పూర్‌ వేదికగా ఆలోచనలు,విధానాలను ప్రకటించిన కేసీఆర్‌

CM KCR | హైదరాబాద్‌, జూన్‌ 15 (నమస్తే తెలంగాణ): జాతీయ రాజకీయాల్లో వేగుచుక్కలా అవతరించిన బీఆర్‌ఎస్‌ మరాఠా గడ్డపై నాగ్‌పూర్‌ వేదికగా పార్టీ విధానాలు, ఆలోచనలను స్పష్టం చేసింది. తెలంగాణ సీఎం, పార్టీ అధినేత కే చంద్రశేఖర్‌రావు గురువారం మీడియా సమావేశంలో మీడియా ప్రతినిధులు అడిగిన అన్ని ప్రశ్నలకు జవాబిచ్చారు. ఈ సందర్భంగా దేశంలో వాస్తవ పరిస్థితిని వివరించిన కేసీఆర్‌, ఆ తర్వాత బీఆర్‌ఎస్‌ పార్టీగా జాతీయ రాజకీయాల్లో ఏ మార్పును ఆశిస్తున్నామో ఆ వివరాలను వెల్లడించారు. నాట్‌ టాక్‌ ఆఫ్‌ బెస్ట్‌ ప్రాక్టీసెస్‌.. లెట్‌ అజ్‌ థింక్‌ ఆఫ్‌ నెక్ట్స్‌ ప్రాక్టీసెస్‌ అంటూ కొత్త దిశానిర్దేశం చేశారు. పలు డాక్యుమెంట్లను విలేకరులకు అందజేశారు. ఆయా డాక్యుమెంట్లలో వివరాలిలా ఉన్నాయి.

• దేశానికి గుణాత్మక, వేగవంతమైన మార్పు లు అవసరం. ప్రస్తుతం రాజకీయ శూన్య త ఉన్నది. ప్రత్యామ్నాయ శక్తిగా కాంగ్రెస్‌ పార్టీ.. భారతదేశానికి అవసరమైన నాయకత్వాన్ని అందించలేకపోయింది.
• జాతీయ ఎజెండాను సమగ్రంగా మార్చా లి. ఏడాది ముగియగానే ప్రవేశపెట్టే బడ్జెట్‌ వంటి సాధారణ పద్ధతులు దేశానికి సరిపోవు. సంప్రదాయమైన ఆలోచనలు భారీ మార్పులను తీసుకురాలేవు.
• ఉత్తమ పద్ధతులపై మాట్లాడుకోవాల్సిన తరుణం కాదిది. భవిష్యత్తులో చేపట్టబో యే ప్రణాళికల గురించి ఆలోచించాల్సి రో జులివి (లెట్‌ అజ్‌ నాట్‌ టాక్‌ ఆఫ్‌ బెస్ట్‌ ప్రాక్టీసెస్‌ .. లెట్‌ అజ్‌ థింక్‌ ఆఫ్‌ నెక్ట్స్‌ ప్రా క్టీసెస్‌). దేశానికి కొత్త దిశ అవసరమున్నది. స్వాతంత్య్రం సిద్ధించి 75 ఏండ్లు. అయినా మనం ఇంకా కనీన అవసరాలు తీర్చుకునేందుకే సంఘర్షిస్తున్నాం. ఇంకా మన ప్రజలు పేదరికంలోనే మగ్గిపోయి, నిరుద్యోగ సమస్యతో బాధపడున్నారు. ఇంకా కనీస అవసరాల కోసం పోరాడుతున్న దేశానికి కొత్త దిశ అవసరం.
• మనకంటే పేద దేశాలున్నా అవి తమ ఆర్థిక వ్యవస్థలను గొప్పగా తీర్చిదిద్దుకోవడం ద్వారా గొప్ప వృద్ధిని సాధించాయి.
• చైనా 1979 నుంచి అధిక వృద్ధి రేటును స్థిరంగా కొనసాగిస్తున్నది. 1992 నుండి 25 ఏండ్లుగా నిరంతరాయంగా వేగవంతమైన వృద్ధిని సాధించింది. చైనా జీడీపీ 1971 వరకు భారత్‌ కంటే తకువగా ఉండేది. ఇప్పుడు అది భారతదేశ జీడీపీకి 5.5 రెట్లు అదనంగా ఉన్నది. మనం ఈ దిశలో ఎందుకు చేయలేకపోయాం?
• ఈస్ట్‌ ఏషియన్‌ టైగర్స్‌గా భావించే దక్షిణ కొరియా, సింగపూర్‌, తైవాన్‌లతో పాటు, మలేషియా, ఇండోనేషియా, థాయిలాం డ్‌, వియత్నాం, సింగపూర్‌, ఫిలిప్పీన్స్‌ అద్భుత వృద్ధిని సాధించాయి. జపాన్‌ ప్రపంచంలోనే అత్యధిక తలసరి ఆదాయం కలిగిన దేశంగా ఎదిగింది.
• రెండు జాతీయ రాజకీయ పార్టీలు, ప్రస్తుత రాజకీయ వ్యవస్థలు విధానాలు, అధికారాలను కేంద్రీకృతం చేసుకుని దేశాన్ని వెనక్కినెట్టాయి.
• మన దేశానికి ఏది అవసరం.. ఏది సరిపోతుంది అన్న ఆలోచనలు చేయడం లేదు. మన దేశ ఆర్థిక వ్యవస్థ, సంపద, అంతర్గత బలాలను మనం ఉపయోగించుకోలే మా? మనల్ని ఏ శక్తి ఆపుతుంది. ఇదేమి అధిగమించలేని సమస్య కాదు. కానీ ఇది పూర్తిగా మనస్తత్వ సమస్య. భారతదేశాన్ని అభివృద్ధి చేయాలంటే రాష్ట్రాలకు అధికారమివ్వాలి. కేందీకృత విధానాలకు భిన్నంగా అభివృద్ధి-కేంద్రీకృత జాతీయ ఎజెండా ద్వారా దేశాన్ని పునర్నిర్మించాల్సిన సమయం ఆసన్నమైంది.
• మనం ఆలోచనా దారిద్య్రాన్ని వదిలించుకోవాలి. సంకుచిత ఆలోచనలకు బదులుగా విశాల దృక్పథంతో ప్రణాళికలు రూపొందించాలి. ఔట్‌ ఆఫ్‌ ది బాక్స్‌ థింకింగ్‌ ఈ నాటి అవసరం.

సంసరణల ఎజెండా:
దేశాన్ని బలోపేతం చేసేందుకు చేపట్టాల్సిన నిర్మాణాత్మక మార్పులు

• ఆర్థిక సంసరణలు
• రాజ్యాంగ సంసరణలు
• ఎన్నికల సంసరణలు
• న్యాయ సంసరణలు
• అడ్మినిస్ట్రేటివ్‌ & గవర్నెన్స్‌ సంసరణలు

1. ఆర్థిక సంసరణలు
విదేశాల నుంచి ఎఫ్‌డీఐలను వరద పారించేందుకు కొత్త విధానాలు తీసుకురావాలి. చైనాలో చేసిన విధంగా సెజ్‌లు అభివృద్ధి చేయాలి. స్థిరమైన పన్ను విధానం, చట్టాలలో ఎలాంటి మార్పులు, పునరాలోచనలు చేయకూడదు. ఈజ్‌ ఆఫ్‌ డూయింగ్‌ బిజినెస్‌ను మరింత మెరుగుపర్చాలి. విదేశీ పెట్టుబడులపై పరిమితులను తొలగించాలి. వృద్ధికి ఆటంకం కలిగించే సమస్యలను వెంటనే పరిష్కరించాలి. ఉదాహరణకు నౌకాశ్రయాలలో కంటైనర్‌ నిర్వహణ సామర్థ్యాన్ని మరింత మెరుపర్చాలి. టర్న్‌-అరౌండ్‌ సమయాన్ని మెరుగుపర్చడం ద్వారా కొన్ని అడ్డంకులు తొలగించుకోవచ్చు. ఎన్‌హెచ్‌ఎస్‌లో సగటు వేగాన్ని మరింతగా మెరుగుపర్చాలి. రైలులో సరుకు రవాణా, కస్టమ్స్‌ క్లియరెన్స్‌ పొందడానికి వెచ్చించే సమయాన్ని పూర్తిగా తగ్గించాలి.

• ప్రతి భారతీయుడు సగర్వంగా ప్రభుత్వానికి పన్నులు చెల్లిస్తూ.. దేశ నిర్మాణంలో భాగస్వామి కావాలి. దేశ అభివృద్ధి కోసం ఒక్కో భారతీయుడు కనీసం ఒక్క రూపాయి అయినా చెల్లించాలి. ముఖ్యంగా ఐటీ మినహాయింపు పరిమితిని రూ.5 లక్షలకు పెంచాలి.
• చేపల పెంపకం, పందుల పెంపకం, పౌల్ట్రీ, మేక, గొర్రెల పెంపకం, పాడి పరిశ్రమ వంటి వ్యవసాయ అనుబంధ కార్యకలాపాల నుంచి వచ్చే ఆదాయంలో పన్ను మినహాయింపు ఉండాలి.
• ఇప్పటికే ఉన్న ఎఫ్‌ఆర్‌బీఎం పరిమితిని పరిశీలించి, క్రెడిట్‌ పరిమితులను ప్రస్తుత అవసరాలకు అనుగుణంగా మార్చాలి.

2. రాజ్యాంగ సంసరణలు
రాష్ట్రాలకు మరిన్ని నిధుల పంపిణీ: రాష్ట్ర జాబితా సబ్జెక్టుల నిధులను కేంద్రం నుంచి రాష్ట్రాలు 41 శాతానికి బదులుగా 50 శాతం నిధులు పొందాలి. ఇందుకు శాశ్వత ఆర్థిక సంఘం అవసరం. కేంద్ర ఫైనాన్స్‌ను అంచనా వేయడం, పరపతి పొందడం కోసం శాశ్వత ఆర్థిక సంఘం చొరవ తీసుకోవాలి. అలాగే రాష్ట్రాల ఫైనాన్స్‌ మదింపు, పరపతి కోసం ఈ ఆర్థిక సంఘం కృషి చేయాలి.

3. ఎన్నికల సంసరణలు
ఎన్నుకున్న ప్రభుత్వ కాలవ్యవధి గురించి చర్చించాలి. అన్ని రాష్ట్ర, కేంద్ర ఎన్నికలను ఏకకాలంలో అంటే 6 నెలల వ్యవధిలో నిర్వహించాలి. ఏదైనా కారణాల వల్ల ప్రభుత్వం పడిపోతే, తదుపరి బ్యాలెన్స్‌ పీరియడ్‌ కోసం మాత్రమే ఎన్నికలు నిర్వహించాలి.

4. న్యాయ సంసరణలు:
న్యాయవ్యవస్థలో సంసరణలు తేవాలి.

5. పరిపాలనా, పాలనా సంసరణలు:

• భారత్‌ను ఓ ప్రభావిత దేశంగా నిలిపేందుకు డీవోపీటీ విధానాల్లో సంసరణలు చేయాలి. ఇతర రాష్ట్రాల్లో అవసరాల ఆధారంగా అధికారులను పని చేయించాలి.
• అధికారులు సొంత రాష్ర్టాల్లో పని చేయడానికి ప్రాధాన్యం ఇవ్వాలి. అందుకు అనుమతులను పరిశీలించాలి.
• అంగన్‌వాడీ వరర్లు, హెల్పర్లు, హోంగార్డులు, ఆశా కార్యకర్తలు మొదలైన కిందిస్థాయి ఉద్యోగుల జీతాలు/వేతనాలు గౌరవప్రదమైన స్థాయికి పెంచాలి.
• రాష్ట్రాలు తమ ప్రాధాన్యాలను నిర్ణయించటంలో ప్రణాళికా సంఘం మార్గనిర్దేశం చేయాలి. రాష్ట్రాలు తమ సొంత కార్యక్రమాలను చేపట్టడానికి స్వేచ్ఛనివ్వాలి.

మార్పుకోసం కార్యాచరణ – ఎజెండా
1. వ్యవసాయం
వ్యవసాయంలో దిగుబడి తక్కువగా ఉన్నది. ఫలితంగా లాభాలు తక్కువగా వస్తున్నాయి. రైతులు, వినియోగదారుల ధరలకు మధ్య చాలా వ్యత్యాసం ఉన్నది. రైతులకు వారి కుటుంబాలను పోషించడానికి సరిపడా ఆదాయం కూడా రావడం లేదు. పంటల బీమా, రుణమాఫీ సాయం చేయలేదు.

• ఎకరానికి రూ.10,000/- పెట్టుబడి మద్దతు (ఖరీఫ్‌, రబీ రెండింటికీ ఒకో సీజన్‌ కు రూ.5,000/-).
• ఎమ్మెస్పీని రూ.500 పెంచాలి/ ప్రస్తుత ఎమ్మెస్పీలో 1/3వ వంతుకు పెంచాలి.
• ఆ తర్వాత ఉద్యోగుల జీతాల మాదిరి, ధరల సూచికకు లింక్‌ చేయడం ద్వారా ప్రతి సంవత్సరం ఎమ్మెస్పీని పెంచాలి.
• ప్రతి ప్రాంతం యొక వ్యవసాయ-వాతావరణ ప్రయోజనాల ఆధారంగా, నిర్దిష్ట పంటలను పండించడానికి ప్రాంతాల వారీగా క్రాప్‌ కాలనీలు ఉండాలి.
• ఎన్‌ఆర్‌ఈజీని వ్యవసాయ రంగంతో అనుసంధానం చేయాలి. ఎన్‌ఆర్‌ఈజీఎస్‌ నుంచి 50 శాతం కూలీలకు చెల్లించాలి.

2. నీటిపారుదల
దేశంలో 40 కోట్ల ఎకరాల సాగు భూమి ఉన్నది. 5.5 కోట్ల ఎకరాల భూమి మాత్రమే కాలువలు, నీటిపారుదల కింద ఉన్నది.

• భారతదేశంలో 70 వేల టీఎంసీల నదీ జలాలు ఉన్నాయి. అందులో కేవలం 40 వేల టీఎంసీల నీటిని సరైన పద్ధతిలో సద్వినియోగం చేస్తే.. దేశంలోని ప్రతి ఎకరాకు సాగు నీరు అందించవచ్చు. ప్రతి రాష్ర్టానికి కావాల్సిన నీటిని కేటాయించవచ్చు.

3. తాగునీరు

• దేశంలో ప్రజలకు స్వచ్ఛమైన, సురక్షితమైన తాగునీరు అందుబాటులో లేదు. దీనివల్ల పేదలు అనారోగ్యానికి గురవుతున్నారు. దవాఖానల చుట్టూ తిరగడం వల్ల ఆర్థికంగా చితికిపోతున్నారు.
• దేశంలోని ప్రతి గ్రామానికి 5 నుంచి 6 సంవత్సరాలలోపు స్వచ్ఛమైన తాగునీటిని అందించవచ్చు.
• సుమారు రూ.8-10 లక్షల కోట్లతోనే ఇది సాధ్యం అవుతుంది.

4. ఆరోగ్యం

• తెలంగాణలో కేసీఆర్‌ కిట్‌ని ప్రవేశపెట్టాం. మగబిడ్డ పుడితే రూ.12 వేలు, ఆడపిల్ల పుడితే రూ.13వేలు ఇస్తున్నాం. దీనితోపాటు ప్రత్యేకమైన, నాణ్యమైన కిట్‌ను అందిస్తున్నాం. ఇలాగే దేశమంతా చేయాలి.
• పీహెచ్‌సీ, సీహెచ్‌సీ, జిల్లా, ఏరియా దవాఖానల్లో మౌలిక సదుపాయాలు మెరుగుపరచడం.
• దేశంలో మెడికల్‌ సీట్ల సంఖ్యను పెంచాలి.

5. పర్యావరణం
దేశంలో అడవులు రోజురోజుకూ క్షీణించిపోతున్నాయి. ప్రస్తుతం పచ్చదనం 21.34 శాతం మాత్రమే ఉన్నది. దీన్ని 33 నుంచి 40 శాతానికి పెంచాలి.

6. బొగ్గు ఉత్పత్తి
దేశంలో అతిపెద్ద బొగ్గు ఉత్పత్తి సామర్థ్యం కలిగిన 3 ప్రధాన బొగ్గు క్షేత్రాలను చాలా సంవత్సరాల క్రితం ప్రారంభించారు. ఉత్తర కరణ్‌పురా (జార్ఖండ్‌), మాండ్‌-రాయ్‌ఘర్‌ (ఛత్తీస్‌గఢ్‌), వ్యాలీ (ఒడిశా) బొగ్గు క్షేత్రాలకు నేటికీ రైల్‌ కనెక్టివిటీ లేదు. రైల్వే లైన్‌ నిర్మిస్తే కోలిండియా 300 ఎమ్‌టీల బొగ్గును ఉత్పత్తి చేయగలదు.