CM KCR | 70 ఏండ్ల వయసులో 96 సభలు.. 32 రోజుల్లో రాష్ట్రాన్ని కలియతిరిగిన కేసీఆర్‌

CM KCR | ఒక పూట ప్రయాణం చేస్తేనే అలసిపోతాం. ఒళ్లు హూనం అయ్యిందని గగ్గోలు పెడుతుంటాం. కానీ 70 ఏండ్ల వయసులో రోజుకు మూడు చోట్లకు.. అలా 32 రోజుల పాటు 96 సభల్లో పాల్గొని, ప్రసంగించి, ప్రజలను మెప్పించటం అంటే మాటలా? కానీ కేసీఆర్‌ సాధ్యం చేసి చూపించారు. అవును! అక్టోబర్‌ 15న హుస్నాబాద్‌లో మొదలైన ఆయన ప్రజాఆశీర్వాద సభ ప్రసంగాల ఝరి.. మంగళవారం గజ్వేల్‌లో ప్రసంగించే వరకు కొనసాగింది.

CM KCR | హైదరాబాద్‌, నవంబర్‌ 28 (నమస్తే తెలంగాణ): ఒక పూట ప్రయాణం చేస్తేనే అలసిపోతాం. ఒళ్లు హూనం అయ్యిందని గగ్గోలు పెడుతుంటాం. కానీ 70 ఏండ్ల వయసులో రోజుకు మూడు చోట్లకు.. అలా 32 రోజుల పాటు 96 సభల్లో పాల్గొని, ప్రసంగించి, ప్రజలను మెప్పించటం అంటే మాటలా? కానీ కేసీఆర్‌ సాధ్యం చేసి చూపించారు. అవును! అక్టోబర్‌ 15న హుస్నాబాద్‌లో మొదలైన ఆయన ప్రజాఆశీర్వాద సభ ప్రసంగాల ఝరి.. మంగళవారం గజ్వేల్‌లో ప్రసంగించే వరకు కొనసాగింది. ఈ ప్రసంగాల్లో బీఆర్‌ఎస్‌ ప్రభుత్వం ప్రజలకు ఏం చేసిందో వివరించారు, ఏం చేస్తుందో తెలియజేశారు, ఓటు ఎంత గొప్పదో వివరిస్తూనే, బీఆర్‌ఎస్‌కు ఎందుకు ఓటు వేయాలో చెప్పారు. అదే సమయంలో విపక్షాల కుట్ర కత్తులను కోట్ల గొంతుల కొడవలై తెగ్గోశారు. తొమ్మిదిన్నరేండ్ల బీఆర్‌ఎస్‌ సర్కారు ప్రగతిని చెప్తూనే, ప్రత్యర్థుల ఎత్తులను చిత్తు చేశారు. రైతు వెన్నెముకను విరిచేందుకు కాంగ్రెస్‌ చేస్తున్న మోసాన్ని కండ్లకుకట్టారు. 60 ఏండ్లలో గత ప్రభుత్వాలు చేయని పనులను పదేండ్లలో చేసి చూపిన విధానాన్ని, పాలన విజయాలను వివరిస్తూ ప్రతి మెదడు ఆలోచించేలా చేశారు. తరగతి గదిలో పాఠం చెప్పినట్టు, కుటుంబ పెద్ద మంచి, చెడ్డ వివరించినట్టు ఖుల్లంఖుల్లాగా అన్ని విషయాలను వెల్లడించారు.

కోటి మందితో మమేకం

96 ప్రజాఆశీర్వాద సభల్లో పాల్గొన్న సీఎం కేసీఆర్‌.. దాదాపు కోటి మందికిపైగా ప్రజలతో మమేకమయ్యారు. వారితో నేరుగా మాట్లాడారు. ఈ సభలు ఎంత గొప్పగా సాగాయంటే ఏ సభకు ఆ సభే పోటీ అని అనిపించక మానదు. తన ప్రసంగాలతో ప్రజలను మెప్పించిన ఆయన.. పార్టీ అధినేతగా బీఆర్‌ఎస్‌ శ్రేణులను ఎన్నికల సమరంలో ముందుకు నడిపించారు.

కేసీఆర్‌ అంటే రికార్డులు

2014లో సీఎం కేసీఆర్‌ 80కిపైగా సభల్లో పాల్గొన్నారు. 2018లో 87 సభల్లో పాల్గొన్నారు. ఈసారి 96 ప్రజా ఆశీర్వాదసభల్లో పాల్గొని తన రికార్డులను తానే బ్రేక్‌ చేశారు. రోజుకు 3 బహిరంగ సభల చొప్పున 32 రోజులపాటు 96 బహిరంగసభల్లో పాల్గొన్న చరిత్ర దేశంలో మరే రాజకీయ నాయకుడికి లేదు. కేసీఆర్‌ ఆరోగ్యం సరిగా లేదని, బయటికి రారని విపక్షాలు, గిట్టనివాళ్లు చేసిన ఆరోపణలు ఈ దెబ్బతో పటాపంచలయ్యాయి. మంచి నీళ్లు కూడా తాగకుండా ఏకబిగిన ప్రసంగించి, ఇతర నియోజకవర్గాలకు తిరిగివెళ్లడం, అదీ కర్ణకఠోరమైన ధ్వని సృష్టించే హెలికాప్టర్‌లో ప్రయాణం అంత సులువు కాదని, అది కేసీఆర్‌కే సాధ్యమైందని రాజకీయ విశ్లేషకులు చెప్తున్నారు.

ఊర్లకు ఊర్లు సభల వైపే

సీఎం కేసీఆర్‌ పాల్గొన్న ప్రతి సభలో ఇసుకేస్తే రాలనంత జనం హాజరయ్యారు. సభాప్రాంగణాలు చాలక చుట్టుపక్కల మేడలు, మిద్దెలు, చెట్లు ఎక్కి కేసీఆర్‌ ప్రసంగాలను విన్నారు. నియోజకవర్గాల్లోని ఊర్లకు ఊర్లు తరలివచ్చాయి. 2014లో 63 స్థానాలు, 2023లో 88 స్థానాలను సొంతం చేసుకున్న బీఆర్‌ఎస్‌కు ఈసారి అంతకంటే ఎక్కువ సీట్లే వస్తాయని పార్టీ శ్రేణులు ధీమా వ్యక్తం చేస్తున్నాయి. గత రెండు ఎన్నికల్లో కేసీఆర్‌ సభలు హుస్నాబాద్‌లో ప్రారంభమై, గజ్వేల్‌తో ముగిసినట్టే, ఈసారి కూడా హుస్నాబాద్‌లోనే ప్రారంభమై, గజ్వేల్‌లో పూర్తయింది.

కేసీఆర్‌ ఏ రోజు, ఎక్కడెక్కడ పాల్గొన్నారంటే..

• అక్టోబర్‌ 15, 2023న హుస్నాబాద్‌
• అక్టోబర్‌ 16న జనగామ, భువనగిరి
• 17న సిరిసిల్ల, సిద్దిపేట
• 18న జడ్చర్ల, మేడ్చల్‌
• 26న అచ్చంపేట, వనపర్తి, మునుగోడు
• 27న పాలేరు, మహబూబాబాద్‌, వర్ధన్నపేట
• 29న కోదాడ, తుంగతుర్తి, ఆలేరు
• 30న జుకల్‌, బాన్సువాడ, నారాయణఖేడ్‌
• 31న హూజూర్‌నగర్‌, మిర్యాలగూడ, దేవరకొండ
• నవంబర్‌ 1న సత్తుపల్లి, ఇల్లందు
• 2న నిర్మల్‌, బాలొండ, ధర్మపురి
• 3న భైంసా (ముథోల్‌), ఆర్మూర్‌, కోరుట్ల
• 5న కొత్తగూడెం, ఖమ్మం
• 6న దేవరకొండ, గద్వాల, మక్తల్‌, నారాయణపేట
• 7న చెన్నూర్‌, మంథని, పెద్దపల్లి
• 8న సిర్పూర్‌, ఆసిఫాబాద్‌, బెల్లంపల్లి
• 9న గజ్వేల్‌, కామారెడ్డి నియోజకవర్గాల్లో కేసీఆర్‌ నామినేషన్‌ దాఖలు, అనంతరం కామారెడ్డిలో ప్రజాఆశీర్వాదసభ
• 13న దమ్మపేట (అశ్వారావుపేట), బూర్గంపాడు (భద్రాచలం, పినపాక నియోజకవర్గాలు), నర్సంపేట
• 14న పాలకుర్తి, హాలియా (నాగార్జునసాగర్‌), ఇబ్రహీంపట్నం
• 15న బోధన్‌, నిజామాబాద్‌,ఎల్లారెడ్డి, మెదక్‌
• 16న ఆదిలాబాద్‌, బోథ్‌, నిజామాబాద్‌ రూరల్‌, నర్సాపూర్‌
• 17న కరీంనగర్‌, చొప్పదండి, హుజురాబాద్‌, పరకాల
• 18న చేర్యాల (జనగామ)
• 19న అలంపూర్‌, కొల్లాపూర్‌, నాగర్‌కర్నూల్‌, కల్వకుర్తి
• 20న మానకొండూర్‌, స్టేషన్‌ ఘన్‌పూర్‌, నకిరేకల్‌, నల్లగొండ
• 21న మధిర, వైరా, డోర్నోకల్‌, సూర్యాపేట
• 22న తాండూరు, కొడంగల్‌, మహబూబ్‌ నగర్‌, పరిగి
• 23న మహేశ్వరం, వికారాబాద్‌, జహీరాబాద్‌, పటాన్‌చెరు
• 24న మంచిర్యాల, రామగుండం, ములుగు, భూపాలపల్లి
• 26న ఖానాపూర్‌, జగిత్యాల, వేములవాడ, దుబ్బాక
• 27 షాద్‌నగర్‌, చేవెళ్ల, అందోల్‌, సంగారెడ్డి
• 28న వరంగల్‌ (వరంగల్‌ఈస్ట్‌, వరంగల్‌పశ్చిమ), గజ్వేల్‌