Private Schools Closed | అర్ధాంతరంగా ప్రైవేటు స్కూళ్ల మూసివేత.. స్టడీ సర్టిఫికెట్ల కోసం విద్యార్థుల పాట్లు

Private Schools Closed | రాష్ట్రంలోని కొన్ని ప్రైవేట్‌ స్కూళ్లు అర్ధాంతంగా మూతబడుతున్నాయి. తగిన నోటీసు ఇవ్వకుండా ఉన్న పళంగా తాళాలేసేస్తున్నాయి. ఈ స్కూళ్లలోని విద్యార్థుల వెతలు అన్నీ ఇన్నీ కావు. నాలుగైదేండ్ల క్రితం మూత బడ్డ బడుల్లోని విద్యార్థులు స్టడీ సర్టిఫికెట్లు అందక, టీసీలు చేతికి రాక అవస్థలు పడుతున్నారు.

Private Schools Closed | హైదరాబాద్‌, జూన్‌ 16 (నమస్తే తెలంగాణ) : రాష్ట్రంలోని కొన్ని ప్రైవేట్‌ స్కూళ్లు అర్ధాంతంగా మూతబడుతున్నాయి. తగిన నోటీసు ఇవ్వకుండా ఉన్న పళంగా తాళాలేసేస్తున్నాయి. ఈ స్కూళ్లలోని విద్యార్థుల వెతలు అన్నీ ఇన్నీ కావు. నాలుగైదేండ్ల క్రితం మూత బడ్డ బడుల్లోని విద్యార్థులు స్టడీ సర్టిఫికెట్లు అందక, టీసీలు చేతికి రాక అవస్థలు పడుతున్నారు. కరోనా అనంతర కాలంలో రాష్ట్రంలో రెండు వేల స్కూళ్లు మూతబడ్డాయి. మూతబడ్డ బడుల వ్యవహారంలో పాఠశాల విద్యాశాఖ అత్యంత నిర్లక్ష్యంగా వ్యవహరిస్తున్నది.

ఏదైనా ప్రైవేట్‌ స్కూల్‌ మూతబడితే సంబంధిత స్కూల్‌ రికార్డులను విద్యాశాఖ స్వాధీనం చేసుకోవాలి. సమీపంలోని సర్కార్‌ బడులకు అందజేయాలి. విద్యార్థులకు టీసీలు, ఇతర సర్టిఫికెట్లు ఇచ్చి, వారిని సమీపంలోని ప్రభు త్వ, గుర్తింపు పొందిన పాఠశాలల్లో చేర్పించాలి. కానీ, అనేక మూతబడ్డ బడుల విషయంలో ఇది అమలుకావడం లేదు. దీంతో ఆయా స్కూళ్లలోని విద్యార్థులు ఇక్కట్లకు గురవుతున్నారు. రికార్డులు ఇంకా ప్రైవేట్‌ బడుల చేతిలోనే ఉంటున్నాయి. కొన్ని యాజమాన్యాలైతే విద్యార్థులను ముప్పుతిప్పులు పెడుతున్నాయి. కొన్ని బడులైతే బోగస్‌ సర్టిఫికెట్లు జారీచేస్తున్నాయి. విద్యాశాఖ అధికారులు చొరవ తీసుకొని, స్పెషల్‌ డ్రైవ్‌ నిర్వహించి మూతబడ్డ బడుల్లోని రికార్డులు స్వాధీనం చేసుకోవాలని తల్లిదండ్రులు కోరుతున్నారు.

కొన్ని ఉదంతాలు..

• కరోనా కాలంలో ఓ కార్పొరేట్‌ స్కూల్‌ బ్రాంచిని మూసివేశారు. ఈ స్కూల్లో చదివిన విద్యార్థులు ఐదేండ్లుగా స్టడీ సర్టిఫికెట్ల కోసం ఆపసోపాలు పడుతున్నారు.
• ఓ ప్రముఖ విద్యాసంస్థ కరీంనగర్‌ జిల్లా కేంద్రంలోని తమ స్కూల్‌ను మూసివేసింది. టీసీలు, స్టడీ సర్టిఫికెట్ల కోసం వి ద్యార్థులను అమీర్‌పేటకు పిలిపించుకొని వారి నుంచి కొంత మొత్తాన్ని వసూలు చేస్తున్నారని తల్లిదండ్రులు చెప్తున్నారు.
• ఓ విద్యార్థిని 4,5,6 తరగతులు ఒక ప్రైవేట్‌ స్కూళ్లో చదివింది. ఆ స్కూల్‌ మూతబడటంతో సమీపంలోని సర్కార్‌ బడిలో చేరింది. 8వ తరగతి వరకు టీసీ అవసరం లేకపోవడంతో సర్కార్‌ బడిలో అడ్మిషన్‌ ఇచ్చారు. కానీ, ఇప్పుడు లోకల్‌ కోటాలో సీట్లు, ఉద్యోగాల కోసం స్టడీ సర్టిఫికెట్లు లేకపోవడంతో సదరు విద్యార్థి ఇబ్బందులు పడుతున్నది.
• ఓ విద్యార్థికి ఇంటర్‌లో 992 మార్కులు వచ్చాయి. ప్రవేశ పరీక్షలో మంచి ర్యాంకు కూడా వచ్చింది. కానీ, స్టడీ సర్టిఫికెట్‌ లేకపోవడంతో మెరిట్‌ ఉన్నా సీటు పొందలేని పరిస్థితులున్నాయి.
• హైదరాబాద్‌లోని దోమల్‌గూడ, చిక్కడపల్లిలోని ఓ ప్రైవేట్‌ స్కూల్‌ ఏండ్లుగా నడువడంలేదు. కానీ, ఈ స్కూల్స్‌ నుంచి బోగస్‌ స్టడీ సర్టిఫికెట్లు జారీ అవుతున్నాయనే ఆరోపణలున్నాయి.
• కొన్ని ఎయిడెడ్‌ స్కూళ్లు మూతబడ్డా, రికార్డులింకా ఆయా బడుల్లోనే ఉన్నాయి. ఈ స్కూళ్లల్లో బోగస్‌ స్టడీ సర్టిఫికెట్ల దందా మూడు పువ్వులు.. ఆరు కాయల చందాన్ని తలపిస్తున్నదట.
• కొంతకాలం క్రితం గ్రేటర్‌ హైదరాబాద్‌లోని ఓ గుర్తింపు లేని ప్రైవేట్‌ స్కూల్‌ను అధికారులు తనిఖీ చేస్తే విస్తుగొలిపే నిజాలు బహిర్గతమయ్యాయి. 2014-2019 వరకు అడ్మిషన్‌ రిజిస్టర్‌, హాజరు, నామినల్‌ రోల్స్‌ రికార్డులు అస్థిరంగా ఉన్నాయి. పెన్సిల్‌తో రిజిస్టర్‌లో రాశారు. ఒకదానిపై మరొకటి రాయడం, కొన్నింటిని చెరిపివేసిన గుర్తులుండటం గమనార్హం. అడ్మిషన్‌ నంబర్ల మధ్య తీవ్రమైన అంతరముంది. విద్యార్థులు ప్రవేశం పొం దిన.. పాఠశాల నుంచి నిష్క్రమించిన వివరాల్లేవు. ఇలాంటి స్కూళ్లు బోగస్‌ సర్టిఫికెట్లు ఇస్తున్నాయన్న ఆరోపణలున్నాయి.