TGCHE | డిగ్రీ కోర్సుల్లో సివిల్స్‌ సిలబస్‌.. ఇంజినీరింగ్‌లో 50 శాతం ఇంటర్న్‌షిప్‌

డిగ్రీ కోర్సుల సిలబస్‌ను సమగ్రంగా మార్చేందుకు తెలంగాణ ఉన్నత విద్యామండలి చేస్తున్న కసరత్తు దాదాపు కొలిక్కి వచ్చింది. ప్రస్తుతానికి ఆర్ట్స్‌ కోర్సుల్లో 30%, సైన్స్‌ కోర్సుల్లో 20% సిలబస్‌ను మార్చాలని అధికారులు నిర్ణయించారు.

• ఆర్ట్స్‌లో 30%, సైన్స్‌లో 20% సిలబస్‌ మార్పు
• డిగ్రీలో ఫీల్డ్‌వర్క్‌, ప్రాజెక్టు రిపోర్టులు
• కొత్త సిలబస్‌పై కొలిక్కి వచ్చిన కసరత్తు

TGCHE | హైదరాబాద్‌, డిసెంబర్‌ 4 (నమస్తే తెలంగాణ): డిగ్రీ కోర్సుల సిలబస్‌ను సమగ్రంగా మార్చేందుకు తెలంగాణ ఉన్నత విద్యామండలి చేస్తున్న కసరత్తు దాదాపు కొలిక్కి వచ్చింది. ప్రస్తుతానికి ఆర్ట్స్‌ కోర్సుల్లో 30%, సైన్స్‌ కోర్సుల్లో 20% సిలబస్‌ను మార్చాలని అధికారులు నిర్ణయించారు. ఇలా ఏటా 20 నుంచి 30 శాతం చొప్పున సిలబస్‌ను మార్చుకుంటూ వెళ్తారు. ముఖ్యంగా ఆర్ట్స్‌ కోర్సుల సిలబస్‌ను పోటీపరీక్షలకు అనుగుణంగా మార్చుతారు. సివిల్స్‌, గ్రూప్స్‌ లాంటి పోటీపరీక్షలకు అనుసరిస్తున్న సిలబస్‌ను డిగ్రీ ఆర్ట్స్‌ కోర్సుల్లో అంతర్భాగం చేస్తారు. ఇంజినీరింగ్‌లో 50% ఇంటర్న్‌షిప్‌ను అమలుచేసే అంశాన్ని పరిశీలిస్తున్నారు. దీంతో 50% థియరీ క్లాసులు, మరో 50% ఇంటర్న్‌షిప్‌లు అమలవుతాయి. డిగ్రీ విద్యార్థులకు క్షేత్రస్థాయి పర్యటనలను (ఫీల్డ్‌వర్క్స్‌), ప్రాజెక్టు రిపోర్టులు రూపొందించడాన్ని తప్పనిసరి చేస్తారు. వీలైనంత త్వరగా కొత్త సిలబస్‌ను సిద్ధంచేసి వచ్చే విద్యాసంవత్సరం నాటికి అందుబాటులోకి తీసుకురావాలన్న లక్ష్యంతో ఉన్నత విద్యామండలి అధికారులు పనిచేస్తున్నారు. ఈ నెలలోనే వర్సిటీల వీసీలు, బోర్డ్‌ ఆఫ్‌ స్టడీస్‌ సమావేశాలను నిర్వహించడం ద్వారా సిలబస్‌ను ఆమోదించి, అమలు చేసేందుకు ఏర్పాట్లు చేస్తున్నారు.

కొన్ని ముఖ్యమైన మార్పులు ఇవీ..

•  ప్రస్తుతం బీకాం విద్యార్థులకు బ్యాంకు వోచర్లను నింపడం రావడంలేదు. ఏ వోచర్‌ దేనికి వాడతారో తెలియని పరిస్థితి ఉన్నది. ఈ నేపథ్యంలో ఇకపై వారికి బ్యాంకింగ్‌ కార్యకలాపాలపైనా పాఠాలుంటాయి. అంతేకాకుండా ఆ విద్యార్థులు బ్యాంకులను సందర్శించి ప్రాజెక్టు రిపోర్టు రాయాల్సి ఉంటుంది.
• ఇటీవలి కాలంలో సైబర్‌ నేరాలు పెరిగిపోవడంతో ఎంతో మంది బ్యాంకు ఖాతాలు గుల్లవుతున్నాయి. ఈ నేపథ్యంలో ఆ నేరాల బారిన పడకుండా ఉండటంపై అవగాహన కల్పించేలా సిలబస్‌లో మార్పులు చేస్తారు.
• మన విద్యార్థులు ఆంత్రోపాలజీతో సివిల్స్‌లో రాణిస్తున్నారు. ఇదే తరహాలో తెలుగు ఆప్షన్‌తో సివిల్స్‌ రాసే వారి సంఖ్యను పెంచే దిశగా అధికారులు చర్యలు చేపట్టారు. అందులో భాగంగా సివిల్స్‌ మాడల్‌లో తెలుగు సిలబస్‌ను మార్చడంతోపాటు డిగ్రీ పాఠ్యపుస్తకాల్లో స్థానిక కవులకు చెందిన పాఠాలను చేర్చనున్నారు.
• హార్టికల్చర్‌, ఫిషరీస్‌ లాంటి వ్యవసాయ అనుబంధ కోర్సులను అభ్యసిస్తున్న విద్యార్థులు ఇకపై విధిగా రైతులను కలవడంతోపాటు సాగుకు సంబంధించిన వివరాలను సేకరించి ప్రాజెక్ట్‌ రిపోర్టు రాయాల్సి ఉంటుంది.
• డిజిటల్‌ పాఠాల బోధనకు టీశాట్‌, ఐఐటీ మద్రాస్‌లతో అవగాహనా ఒప్పందాన్ని కుదుర్చుకుంటారు. ఆయా పాఠాలను కాలేజీల్లో ప్రసారం చేసేందుకు ఏర్పాట్లు చేస్తారు.
• సైన్స్‌ కోర్సుల వర్సిటీల బోర్డ్‌ ఆఫ్‌ స్టడీస్‌ (బీవోఎస్‌) కమిటీల్లో పారిశ్రామికవేత్తలు, సీసీఎంబీ, ఐఐసీటీ లాంటి ప్రతిష్ఠాత్మక సంస్థల శాస్త్రవేత్తలకు చోటుకల్పించి, అవసరం మేరకు సిలబస్‌లో మార్పులు చేసుకునే వెసులుబాటు కల్పిస్తారు.
• ప్రభుత్వ, ప్రైవేట్‌ విద్యాసంస్థలన్న తేడా లేకుండా ప్రతి సంవత్సరం అన్ని కాలేజీల్లో విధిగా జాబ్‌ మేళాలను నిర్వహించేలా చూస్తారు.
• మారిన సిలబస్‌ సహా అన్ని అంశాలపై ఫ్యాకల్టీ డెవలప్‌మెంట్‌ ట్రైనింగ్స్‌ను నిర్వహిస్తారు. ఫ్యాకల్టీకి నిరంతరం శిక్షణనిస్తారు.

ప్రతి మూడేండ్లకోసారి సిలబస్‌ మారుస్తాం
విద్యావ్యవస్థలో మార్పులు చేయాలంటే సిలబస్‌లో మార్పులు చేయాలి. ఉత్తమ సిలబస్‌తోనే ఉత్తమ విద్యను అందించగలం. అప్పుడే ఉత్తమ విద్యార్థులను సమాజానికి అందించగలం. గతంలో మన దగ్గర సిలబస్‌ను మార్చే ప్రయత్నాలు జరగలేదు. ఈ నేపథ్యంలోనే ఇకపై ప్రతి మూడేండ్లకోసారి సిలబస్‌ను మార్చనున్నాం. జాబ్‌ ఓరియంటెడ్‌, ఎంటర్‌పెన్యూర్‌షిప్‌ను అభివృద్ధి చేసేలా కొత్త సిలబస్‌ను రూపొందిస్తున్నాం. వర్తమాన పరిస్థితులతోపాటు పారి శ్రామిక రంగం ఆశిస్తున్న నైపుణ్యాలకు అనుగుణంగా సిలబస్‌ రూపకల్పన చేస్తున్నాం.
– ప్రొఫెసర్‌ బాలకిష్టారెడ్డి, ఉన్నత విద్యామండలి చైర్మన్‌