శాస్త్రీయపద్ధతిలో కులగణన చేపట్టాలి

న్యాయపరమైన వివాదాలు తలెత్తకుండా శాస్త్రీయపద్ధతిలో కులగణన నిర్వహించాలని, రిజర్వేషన్ల శాతాన్ని పెంచడంతోపాటు కులవృత్తుల ఆధునీకరణకు సైతం ఊతమివ్వాలని బీసీ కులసంఘాలు డిమాండ్‌ చేస్తున్నాయి.

• కులవృత్తుల ఆధునికీకరణకు సాయమందించాలి
• బీసీ కుల సంఘాల ప్రధాన డిమాండ్లు..
• నేటి నుంచి బీసీ కమిషన్‌ జిల్లాల పర్యటన

హైదరాబాద్‌, అక్టోబర్‌ 27 (నమస్తే తెలంగాణ) : న్యాయపరమైన వివాదాలు తలెత్తకుండా శాస్త్రీయపద్ధతిలో కులగణన నిర్వహించాలని, రిజర్వేషన్ల శాతాన్ని పెంచడంతోపాటు కులవృత్తుల ఆధునీకరణకు సైతం ఊతమివ్వాలని బీసీ కులసంఘాలు డిమాండ్‌ చేస్తున్నాయి. స్థానిక సంస్థల్లో రిజర్వేషన్లు, మహిళా రిజర్వేషన్లు, పారిశ్రామిక రంగంలో సబ్సిడీలు, భూముల కేటాయింపు, బీసీ సబ్‌ప్లాన్‌, బీసీ కులాల ఉత్పత్తులకు గ్రామ, మండల, జిల్లా, రాష్ట్రస్థాయిలో ప్రత్యేకమైన సెజ్‌లు, ఉత్పత్తులకు మారెటింగ్‌ సౌకర్యం వంటి అంశాలతోపాటు కులాల వారీగా సమస్యలను, వాటికి తాము సూచిస్తున్న పరిషార మార్గాలను అమలుచేయాలని విజ్ఞప్తి చేస్తున్నాయి. ఈ మేరకు నేటి నుంచి జిల్లాల్లో పర్యటించనున్న రాష్ట్ర బీసీ కమిషన్‌కు పెద్దఎత్తున వినతులు సమర్పించాలని కులసంఘాల ప్రతినిధులు పిలుపునిస్తున్నారు.

బీసీ కమిషన్‌ పర్యటనలు..

స్థానిక సంస్థల్లో రిజర్వేషన్ల ఖరారు విషయంలో ఆసక్తిగల వ్యక్తులు, ప్రజా, కుల సంఘాల ప్రతినిధుల నుంచి అభ్యర్థనలు, సూచనలు, అభ్యంతరాల స్వీకరణ కోసం రాష్ట్ర బీసీ కమిషన్‌ ఉమ్మడి పది జిల్లాల్లో నేటి నుంచి పర్యటించనున్నది. నేడు ఆదిలాబాద్‌, 29న నిజామాబాద్‌, 30న సంగారెడ్డి, నవంబర్‌ 1న కరీంనగర్‌, 2న వరంగల్‌, 4న నల్లగొండ, 5న ఖమ్మం, 7న రంగారెడ్డి, 8న మహబూబ్‌నగర్‌, 11న హైదరాబాద్‌ జిల్లాల్లో సంబంధిత జిల్లాల కలెక్టరేట్లలో బీసీ కమిషన్‌ బహిరంగ విచారణ చేపట్టనున్నది. నవంబర్‌ 11న ప్రత్యేకంగా ఎన్‌జీవోలు, సంస్థలు, కుల/సంక్షేమ సంఘాల కోసం, 13న సాధారణ ప్రజల కోసం విచారణ చేపట్టనున్నట్టు వెల్లడించింది. ఆసక్తిగలవారు వ్యక్తిగతంగా లేదంటే పోస్ట్‌ ద్వారా కమిషన్‌ కార్యాలయంలో కూడా అభ్యర్థనలు సమర్పించవచ్చని స్పష్టంచేసింది.

బీసీ కుల సంఘాల ప్రధాన డిమాండ్లు..

• శాస్త్రీయ పద్ధతిలో న్యాయవివాదాలు తలెత్తకుండా కులాలవారీగా ఆర్థిక, సామాజిక, రాజకీయ స్థితిగతులకు సంబంధించిన లెక్కలు సేకరించాలి.
• బీసీ రిజర్వేషన్లను వర్గీకరించి సంచార జాతులు, ఎంబీసీలకు ప్రత్యేకంగా జనాభా నిష్పత్తి మేరకు అమలుచేయాలి.
• స్థానిక సంస్థల్లో బీసీల రిజర్వేషన్‌ శాతాన్ని పెంచాలి.
• వార్షిక బడ్జెట్‌లో బీసీలకు 50 శాతం నిధులు కేటాయించాలి. ప్రత్యేక సబ్‌ ప్లాన్‌ అమలుచేయాలి.
• టీజీపీఎస్సీ జారీ చేసిన

జీవో 29ని రద్దు చేయాలి.

• ఎంబీసీలను సబ్‌ క్యాటగిరీ చేయాలి. జీవన ప్రమాణాల పెంపునకు చర్యలు తీసుకోవాలి.
• పారిశ్రామిక పాలసీల్లో సబ్సిడీ, ప్లాట్ల కేటాయింపుల్లో కనీసం 50 శాతం బీసీలకే కేటాయించాలి.
• కులవృత్తుల ఆధునీకరణకు, ఇతర రంగాల్లో బీసీల ఆర్థిక ఎదుగుదలకు సహకరించాలి.
• ప్రభుత్వ పథకాలు, ఇందిరమ్మ ఇండ్లు, విద్య, ఉపాధి రంగాల్లో అవకాశాలను 50 శాతం బీసీలకే కేటాయించాలి
• కామారెడ్డి డిక్లరేషన్‌లో పొందుపర్చిన విధంగా కాంట్రాక్టుల్లో 42 శాతం వాటా బీసీలకు కల్పించాలి.
• కుల/చేతివృత్తుల ఉత్పత్తుల మారెటింగ్‌ కోసం మండల, జిల్లా కేంద్రాలతోపాటు రాష్ట్ర రాజధానిలో షాపింగ్‌ కాంప్లెక్స్‌లు నిర్మించాలి.