కార్యకర్తలే బలం.. ప్రజలే బలగం

‘పార్టీకి మీరే బలం.. మిమ్మల్ని అన్ని విధాలుగా ఆదుకుంటాం’ అని బీఆర్‌ఎస్‌ నేత లు పార్టీ కార్యకర్తలకు అభయమిస్తున్నారు. రాష్ట్రంలోని ఆయా నియోజకవర్గాల్లో బీఆర్‌ఎస్‌ ఆత్మీయ సమ్మేళనాలు జోరుగా సాగుతున్నాయి.

• అన్ని విధాలా అండగా ఉంటాం
• మిమ్మల్ని కాపాడుకుంటాం
• గులాబీ శ్రేణులకు నేతల అభయం
• జోరుగా బీఆర్‌ఎస్‌ ఆత్మీయ సమ్మేళనాలు

హైదరాబాద్‌, ఏప్రిల్‌ 2 (నమస్తే తెలంగాణ): ‘పార్టీకి మీరే బలం.. మిమ్మల్ని అన్ని విధాలుగా ఆదుకుంటాం’ అని బీఆర్‌ఎస్‌ నేత లు పార్టీ కార్యకర్తలకు అభయమిస్తున్నారు. రాష్ట్రంలోని ఆయా నియోజకవర్గాల్లో బీఆర్‌ఎస్‌ ఆత్మీయ సమ్మేళనాలు జోరుగా సాగుతున్నాయి. కార్యకర్తలు తమ కుటుంబ సభ్యులతో హాజరవుతున్నారు. కష్టసుఖాలు మాట్లాడుకుంటున్నారు. వీరి సమస్యలు విన్న మంత్రులు, ఎమ్మెల్యేలు, ఎమ్మెల్సీలు, ఇతర నాయకులు వాటిని పరిష్కరించడంతోపాటు అండగా ఉంటామని భరోసా కల్పిస్తున్నారు. ఆటపాటలతో సభా వేదిక ప్రాంతమంతా సందడిగా మారుతున్నది. అంతా కలిసి భోజనం చేస్తుండటంతో కుటుంబ వాతావరణం కొట్టొచ్చినట్టు కన్పిస్తున్నది. ఆదివారం కూడా రాష్ట్రంలోని పలు నియోజకవర్గాల్లో ఆత్మీయ సమ్మేళనాలు జరిగాయి.

కేసీఆర్‌కే ప్రజల ఆదరణ: హరీశ్‌రావు

‘కేసీఆర్‌ అనే అద్భుత దీపం వల్లనే రాదన్న తెలంగాణ వచ్చింది.. కానే కాదన్న కాళేశ్వరం ప్రాజెక్టు కట్టి అర కిలోమీటరు ఎత్తులో ఉన్న రంగనాయకసాగర్‌కు గోదావరి నీళ్లు తెచ్చుకున్నం.. తెలంగాణ అంటే ప్రతిపక్షాలకు పెదాలపై మాత్రమే ఉంటుంది.. అదే కేసీఆర్‌కు గుండె నిండ ప్రేమ ఉంటుంది’ అని ఆర్థిక మంత్రి హరీశ్‌రావు అన్నారు. ఆదివారం సిద్దిపేట జిల్లా నారాయణరావుపేట మండలం బుగ్గరాజేశ్వరస్వామి దేవాలయ ఆవరణలో నిర్వహించిన బీఆర్‌ఎస్‌ ఆత్మీయ సమ్మేళనంలో మంత్రితోపాటు ఎమ్మెల్సీ దేశపతి శ్రీనివాస్‌, జడ్పీ చైర్‌పర్సన్‌ రోజాశర్మ పాల్గొన్నారు. కాగా, బీజేపీ పాలిస్తున్న 20 రాష్ర్టాల్లో తెలంగాణ లాంటి పథకాలు అమలు చేస్తున్నారా? అని వ్యవసాయ శాఖ మంత్రి నిరంజన్‌రెడ్డి ప్రశ్నించారు. వనపర్తి జిల్లా మదనాపురంలో దేవరకద్ర ఎమ్మెల్యే ఆల వెంకటేశ్వర్‌రెడ్డి అధ్యక్షతన ఏర్పాటు చేసిన సమ్మేళనంలో ఆయన మాట్లాడుతూ.. గుజరాత్‌లోనూ ఇలాంటి సంక్షేమ పథకాలు లేవన్నారు. ప్రధాని మోదీ ప్రపంచంలోనే పెద్ద మోసకారి అని, ఆయన చెప్పేవన్నీ పచ్చి అబద్ధాలని రోడ్లు భవనాల శాఖ మంత్రి వేముల ప్రశాంత్‌రెడ్డి విమర్శించారు. కామారెడ్డి జిల్లా ఎల్లారెడ్డి నియోజకవర్గంలోని గాంధారిలో ఏర్పాటు చేసిన ఆత్మీయ సమ్మేళనంలో ఆయన మాట్లాడుతూ.. మోదీ అదానికి బినామీగా వ్యవహరిస్తున్నారని ఆరోపించారు. ఈ సమ్మేళనంలో ఎంపీ బీబీ పాటిల్‌, ఎమ్మెల్యే జాజాల సురేందర్‌, జడ్పీ చైర్‌పర్సన్‌ దఫేదార్‌ శోభ పాల్గొన్నారు. జగిత్యాల జిల్లా ధర్మపురిలోని ఆత్మీయ సమ్మేళనంలో ఎస్సీ సంక్షేమ శాఖ మంత్రి కొప్పుల మాట్లాడుతూ..దుర్మార్గమైన చర్యలకు పాల్పడుతున్న బీజేపీని తరిమికొట్టాలని పిలుపునిచ్చారు. ఇందులో పోలీస్‌ హౌసింగ్‌ కార్పొరేషన్‌ చైర్మన్‌ కొలేటి దామోదర్‌, పెద్దపల్లి ఎంపీ వెంకటేశ్‌నేత, ఎమ్మెల్సీ ఎల్‌ రమణ పాల్గొన్నారు. తెలంగాణకు బీఆర్‌ఎస్సే శ్రీరామరక్ష అని పంచాయతీరాజ్‌ శాఖ మంత్రి ఎర్రబెల్లి దయాకర్‌రావు అన్నారు. మహబూబాబాద్‌ జిల్లా మరిపెడలో ఆత్మీయ సమ్మేళనంలో ఎర్రబెల్లితోపాటు మంత్రి సత్యవతి, ఎమ్మెల్యే రెడ్యానాయక్‌, మాజీ ఎమ్మెల్సీ పురాణం సతీశ్‌, ఎంపీ కవిత, జడ్పీ చైర్‌పర్సన్‌ బిందు హాజరయ్యారు. జనగామ జిల్లా దేవరుప్పుల మండలం పెదమడూరులోనూ ఎర్రబెల్లి పాల్గొన్నారు.

• పెద్దపల్లిలో నిర్వహించిన సమ్మేళనానికి పెద్దపల్లి ఎంపీ బోర్లకుంట వెంకటేశ్‌నేత, టీఎస్‌ఐడీసీ చైర్మన్‌ ఎర్రోళ్ల శ్రీనివాస్‌, ఎమ్మెల్యే దాసరి మనోహర్‌రెడ్డి హాజరయ్యారు.
• ఖమ్మం జిల్లా గంగారంలో ఎంపీలు పార్థసారథి, వద్దిరాజు, ఎమ్మెల్సీ తాతా మధు, ఎమ్మెల్యే సండ్ర వెంకటవీరయ్య, మాజీ మంత్రి తుమ్మల నాగేశ్వరరావు, ఎర్రుపాలెం మండలం జమలాపురంలో ఎంపీలు నామా నాగేశ్వరరావు, బండి పార్థసారథిరెడ్డి, ఎమ్మెల్సీ తాతా మధు, జడ్పీ చైర్మన్‌ కమల్‌రాజు పాల్గొన్నారు.
• భూపాలపల్లి జిలా కొడవటంచలో వరంగల్‌ జడ్పీ చైర్‌పర్సన్‌ గండ్ర జ్యోతి, ఎమ్మెల్యే గండ్ర వెంకటరమణారెడ్డి, మాజీ ఎమ్మెల్సీ అరికెల నర్సారెడ్డి హాజరయ్యారు.
• వరంగల్‌ 55 డివిజన్‌ పరిధి భీమారంలో వర్ధన్నపేట ఎమ్మెల్యే అరూరి రమేశ్‌, ఖానాపురం మండలం రామలింగయ్యపల్లెలో ఎమ్మెల్యే పెద్ది సుదర్శన్‌రెడ్డి పాల్గొన్నారు.
• యాదాద్రి భువనగిరి జిల్లా ఆలేరులో ప్రభుత్వ విప్‌ గొంగిడి సునీతామహేందర్‌రెడ్డి, ఎమ్మెల్సీ యాదవరెడ్డి, మాజీ మంత్రి మోత్కుపల్లి నర్సింహులు పాల్గొన్నారు.
• నల్లగొండ జిల్లా శాలిగౌరంలో ఎంపీ బడుగుల లింగయ్యయాదవ్‌, జడ్పీ చైర్మన్‌ బండ నరేందర్‌రెడ్డి, ఎమ్మెల్యే గాదరి కిశోర్‌, కనగల్‌ మండలం దర్వేశిపురంలో ఎమ్మెల్యే భూపాల్‌రెడ్డి తదితరులు పాల్గొన్నారు.
• వికారాబాద్‌ జిల్లా యాలాల మండలం లక్ష్మీనారాయణపూర్‌లో తాండూరు ఎమ్మెల్యే పీ రోహిత్‌రెడ్డి పాల్గొన్నారు.
• హైదరాబాద్‌లో నగర పార్టీ ఇన్‌చార్జి డాక్టర్‌ దాసోజు శ్రవణ్‌ ఆధ్వర్యంలో సమ్మేళనానికి మంత్రి తలసాని, ఎమ్మెల్యే ముఠా గోపాల్‌, ఖైరతాబాద్‌ నియోజకవర్గంలో ఎమ్మెల్యే దానం నాగేందర్‌ పాల్గొన్నారు.

కేసీఆర్‌కు జీవితాంతం రుణపడి ఉంటం

ఆడబిడ ్డఎదుగుతుంటే బాధపడుతుండే వాల్లం. ఎంత పనిచేసినా డబ్బులు ఇంటి ఖర్చులకే సరిపోయేది. కుటుంబం గడువక ఇబ్బందులు ఎడేటోళ్లం. కూతురు పెండ్లి కుదిరింది. కానీ.. పెండ్లి ఎట్ల చేయాలని ఆలోచనలో పడ్డాం. కేసీఆర్‌ సారు పెట్టిన కల్యాణలక్ష్మి పథకంలో నా బిడ్డ పెండ్లికి రూ.1.16 లక్షల చెక్కు వచ్చింది. పెండ్లి ఖర్చుకు సరిపోయింది. మా కుటుంబాన్ని ఆదుకున్న దేవుడు కేసీఆర్‌కు జీవితాంతం రుణపడి ఉంటం.
– శాగంటి స్వర్ణలత, కల్యాణలక్ష్మి లబ్ధిదారు, భీమారం