Harish Rao : ‘ఆగస్టు 15 లోగా రుణమాఫీ చేస్తే తాను ఎమ్మెల్యే పదవికి రాజీనామా చేస్తానని, రుణమాఫీ చేయకపోతే మీరు సీఎం పదవికి రాజీనామా చేస్తారా..?’ అని బీఆర్ఎస్ సీనియర్ నేత, రాష్ట్ర మాజీ మంత్రి, సిద్దిపేట ఎమ్మెల్యే హరీష్రావు సీఎం రేవంత్రెడ్డికి సవాల్ విసిరారు. సంగారెడ్డిలో ఏర్పాటు చేసిన ప్రెస్మీట్ లో ఆయన మాట్లాడారు.
సీఎం రేవంత్ రెడ్డి సవాల్ను స్వీకరించిన హరీష్ రావు.. ‘సీఎం సవాల్ను నేను స్వీకరిస్తున్నా. అధికార పార్టీ ఇచ్చిన హామీలను నెరవేర్చేలా చేసే బాధ్యత ప్రతిపక్షంగా మాపై ఉంది’ అన్నారు. ‘ఎల్లుండి అసెంబ్లీ ముందు అమరవీరుల స్తూపం దగ్గరికి నేను వస్తా. ఆగస్టు 15 లోపు మీరు ఇచ్చిన అన్ని గ్యారెంటీలు అమలు చేస్తానని ప్రమాణం చెయ్యి. ఆగస్టు 15 లోపు పూర్తిగా రుణమాఫీ చెయ్యాలి. ఒకవేళ రుణమాఫీ చేస్తే నేను ఎమ్మెల్యే పదవికి రాజీనామా చేస్తా. మళ్ళీ ఉప ఎన్నికల్లో కూడా పోటీ చేయను. రుణమాఫీ చెయ్యక పోతే సీఎం పదవికి రాజీనామా చేస్తారా..?’ అని హరీశ్రావు సీఎంను ప్రశ్నించారు.
‘నాకు పదవి కంటే తెలంగాణ ప్రజల సంక్షేమమే ముఖ్యం. గతంలో కొడంగల్లో ఓడిపోతే సన్యాసం తీసుకుంటానని చెప్పి తోక ముడిచి మాట తప్పిన వ్యక్తి రేవంత్ రెడ్డి. ఆరు గ్యారెంటీలను డిసెంబర్ 9 కల్లా అమలు చేస్తామని చెప్పి మాట తప్పింది కాంగ్రెస్ పార్టీ. ఇచ్చిన మాట తప్పడం, పూటకో పార్టీ మారడం మీ నైజం. ఎన్నికల్లో ఇచ్చిన హామీలు నెరవేర్చాలని డిమాండ్ చేస్తే పార్టీ రద్దు చేసుకుంటరా అని తొండి మాటలు మాట్లాడుతున్నారు. అధికారంలోకి వచ్చిన వంద రోజుల్లో ఆరు గ్యారెంటీలు అమలు చేస్తామని సోనియాగాంధీ లేఖ రాశారు.
120 రోజులు దాటినా మీ గ్యారెంటీలు ఏమయ్యాయి..?’ అని హరీష్రావు కాంగ్రెస్ ప్రభుత్వాన్ని నిలదీశారు. ‘మహాలక్ష్మి పథకంలో మహిళలకు రూ.2,500 ఎందుకు ఇవ్వలేదు..? రైతులకు ఎకరానికి రైతు బంధు రూ.15,000 సహాయం ఎందుకు ఇవ్వలేదు..? ధాన్యానికి రూ.500 బోనస్ ఏది..? నిరుద్యోగులకు భృతి ఏదీ..? బీఆర్ఎస్ పార్టీ అంటే భయం ఎందుకు..? రేవంత్ రెడ్డి మాట్లాడితే ఆరు గ్యారంటీలలో 5 హామీలు అమలు చేశానని అంటున్నడు. కానీ ఏ హామీలను అమల చేయలేదు. మాయమాటలతో అన్ని వర్గాల వారిని కాంగ్రెస్ ప్రభుత్వం మోసం చేస్తున్నది. చేయకపోయినా హామీలను అమలు చేసినట్టు చెప్పి ప్రజలను
బురుడి కొట్టిస్తున్నరు. ప్రజలు కాంగ్రెస్ పార్టీ ఆపద మొక్కులను నమ్మడం లేదు. తెలంగాణ ప్రజలు కాంగ్రెస్ను నమ్మే పరిస్థితి లేదు’ అని హరీష్ రావు అన్నారు.