హవాలా డంప్‌గా హైదరాబాద్‌

హైదరాబాద్‌ను విశ్వనగరంగా తీర్చిదిద్దేందుకు టీఆర్‌ఎస్‌ ప్రభుత్వం కృషి చేస్తుంటే.. అది చూసి ఓర్వలేని బీజేపీ నగరాన్ని హవాలా డంపుగా మారుస్తున్నది.

• 20 రోజుల్లో 20 కోట్లు స్వాధీనం
• డబ్బంతా మునుగోడు వైపేనా?
• బీజేపీ నేతలతో లింకులపై డౌట్‌
• తాజాగా వందల కోట్లు లభ్యం
• కర్ణాటక నుంచే తెచ్చారా ?

హైదరాబాద్‌ సిటీబ్యూరో ప్రధాన ప్రతినిధి, అక్టోబరు 26 (నమస్తే తెలంగాణ): హైదరాబాద్‌ను విశ్వనగరంగా తీర్చిదిద్దేందుకు టీఆర్‌ఎస్‌ ప్రభుత్వం కృషి చేస్తుంటే.. అది చూసి ఓర్వలేని బీజేపీ నగరాన్ని హవాలా డంపుగా మారుస్తున్నది. మునుగోడు ఉప ఎన్నిక నేపథ్యంలో డబ్బుతో రాజకీయం చేసేందుకు భారీ ఎత్తున కుట్రలకు తెరలేపుతున్నది. కర్ణాటక, గుజరాత్‌, మహారాష్ట్ర నుంచి పెద్ద ఎత్తున హవాలా మార్గంలో డబ్బును తరలించేందుకు చేసిన ప్రయత్నాలను తెలంగాణ పోలీసులు అడ్డుకున్నారు. గత 20 రోజులుగా దాదాపు రూ.20 కోట్లకు పైగా సొమ్మును పోలీసులు స్వాధీనం చేసుకున్నారు. ఇదే క్రమంలో వందల కోట్లతో టీఆర్‌ఎస్‌ ఎమ్మెల్యేలను ప్రలోభపెట్టేందుకు జరిగిన భారీ కుట్రను పోలీసులు ఛేదించారు. ఈ ఘటనలో నోట్ల సంచులను పొరుగున ఉన్న బీజేపీ పాలిత రాష్ట్రమైన కర్ణాటక నుంచి తరలించినట్టు అనుమానాలు వ్యక్తమవుతున్నాయి.

అక్రమంగా నగదు తరలింపు

సాధారణంగా ఎవరైనా రూ.2.5 లక్షలకు మించి నగదు వెంట తీసుకపోతే అందుకు తగిన ఆధారాలను, కారణాలను చూపాలి. కానీ మునుగోడు ఉప ఎన్నిక దరిమిలా హైదరాబాద్‌ నగర కేంద్రంగా బీజేపీ నేతలు సాగిస్తున్న హవాలా దందాకు అడ్డూ అదుపు లేకుండా పోయింది. మునుగోడులో ఓటమి తప్పదని తెలుసుకొన్న బీజేపీ నేతలు డబ్బు సంచులతో ప్రజాస్వామ్యాన్ని అపహాస్యం చేసేందుకు సిద్ధమయ్యారు. ఇందుకు గత 20 రోజుల్లో హైదరాబాద్‌లో పోలీసులకు పట్టుబడిన హవాలా సొమ్మే నిదర్శనం. మొయినాబాద్‌ ఫాంహౌస్‌లో టీఆర్‌ఎస్‌ ఎమ్మెల్యేలను ప్రలోభపెట్టేందుకు వచ్చిన స్వామీజీలు, నందకుమార్‌ బీజేపీ బడా నేతలకు అత్యంత సన్నిహితులని తెలుస్తున్నది.

కర్ణాటక నుంచే తరలించారా?

గత కొన్నిరోజులుగా నగరంలోని వివిధ ప్రాంతాల్లో పోలీసులకు చిక్కిన కోట్ల రూపాయలు ప్రధానంగా గుజరాత్‌, మహారాష్ట్ర నుంచి తరలించారని పోలీసులు అనుమానిస్తున్నారు. హైదరాబాద్‌లో పోలీసుల నిఘా పటిష్ఠంగా ఉండటం, గత 20 రోజుల్లో రూ.20 కోట్ల వరకు పట్టుబడటంతో.. కర్ణాటక నుంచి డబ్బు తరలించడమే సులభమని నిందితులు భావించినట్టు తెలుస్తున్నది.

మునుగోడు ఉప ఎన్నిక దరిమిలా పోలీసులు పట్టుకున్న హవాలా సొమ్ము..

• సెప్టెంబర్‌ చివరి వారంలో మాసబ్‌ట్యాంక్‌ వద్ద షోయబ్‌ మాలిక్‌ అనే తుక్కు వ్యాపారి వద్ద 1.24 కోట్లు స్వాధీనం.
• ఈ నెల మొదటి వారంలో బంజారాహిల్స్‌లో కార్తీక్‌గౌడ్‌ వద్ద రూ. 50 లక్షలు పట్టివేత. ఆ తర్వాత రెండు రోజుల్లో రూ. 25 లక్షలు చాదర్‌ఘాట్‌లో పట్టుబడ్డాయి.
• ఈ నెల 9న శ్రీకాకుళానికి చెందిన బచ్చురాము కేపీహెచ్‌బీ కాలనీలో ఉంటూ, బోయాన్సి ఇన్‌ఫ్రాస్ట్రక్చర్‌ సంస్థలో మేనేజర్‌గా పనిచేస్తున్నాడు. ఢిల్లీలో పనిచేసే తన సహ ఉద్యోగి సత్యనారాయణ సూచనలతో జూబ్లీహిల్స్‌ లో ఒక గుర్తుతెలియని వ్యక్తి నుంచి రూ. 2.5 కోట్ల నగదు అందుకున్నాడు. ఆ డబ్బును బేగంబజార్‌, కొల్సావాడిలో ఉండే గుజరాత్‌కు చెందిన హవాలా వ్యాపారి, బీజేపీ నాయకుడు లలిత్‌ వదకరే వద్దకు తరలిస్తుండగా టాస్క్‌ఫోర్స్‌ పోలీసులు పట్టుకున్నారు.
• ఈ నెల 11న సాయికుమార్‌రెడ్డి, గుండె మహేశ్‌, సందీప్‌కుమార్‌, మహేందర్‌, అనూష్‌రెడ్డి, భరత్‌ హిమాయత్‌నగర్‌లో ఉండే వెంకటేశ్వర్‌రావు వద్ద రూ. 3.5 కోట్లు తీసుకొని, హయత్‌నగర్‌లోని అం బికా పెట్రోల్‌ యజమాని మహేందర్‌కు ఇచ్చేందుకు వెళ్తుండగా పట్టుబడ్డారు.
• ఈ నెల 22న నార్సింగిలో పోలీసులు నిర్వహించిన తనిఖీల్లో రెండు కార్లు, ద్విచక్ర వాహనంలో తరలిస్తున్న రూ.కోటి నగదు లభించింది.
  మునుగోడులోని కోమటిరెడ్డి రాజేందర్‌రెడ్డి తనయుడు కోమటిరెడ్డి సుమంత్‌రెడ్డికి అందజేయడానికి తీసుకువెళ్తున్నట్టు పోలీసులు తెలిపారు.