World Junior Gymnastics | ప్రపంచ జూనియర్‌ జిమ్నాస్టిక్స్‌ పోటీలకు న్యాయనిర్ణేతగా ఎంపికైన వరంగల్‌ బిడ్డ

ప్రపంచ జూనియర్‌ జిమ్నాస్టిక్స్​​‍ ఛాంపియన్‌షిప్‌లో న్యాయనిర్ణేతగా వరంగల్‌ జిమ్నాస్టిక్స్​​‍ అసోసియేషన్‌ కోశాధికారి కోమటి భరద్వాజ్‌ భారతదేశం తరఫున ప్రాతినిధ్యం వహించనున్నారు.

హనుమకొండ, నవంబర్‌ 13 : ఈ నెల 20 నుంచి 25 వరకు ఫిలిప్పీన్స్​‍దేశంలో జరగబోయే ప్రపంచ జూనియర్‌ జిమ్నాస్టిక్స్​​‍ ఛాంపియన్‌షిప్‌లో న్యాయనిర్ణేతగా వరంగల్‌ జిమ్నాస్టిక్స్​​‍ అసోసియేషన్‌ కోశాధికారి కోమటి భరద్వాజ్‌ భారతదేశం తరఫున ప్రాతినిధ్యం వహించనున్నారు. జేఎన్‌ఎస్‌లోని జిమ్నాస్టిక్స్​​ అకాడమీ పూర్వవిద్యార్థి భరద్వాజ్‌ పలు జాతీయస్థాయి పోటీల్లో మన రాష్ట్రానికి ప్రాతినిద్యం వహించి ఎన్నో పతకాలు సాధించారు. ఆ ప్రతిభ ఆధారంగా క్రీడాకారుల కోటాలో ఇండియన్‌ రైల్వేలో ఉద్యోగం సాధించి కాజీపేటలో విధులు నిర్వహిస్తున్నారు.

ఉద్యోగ బాధ్యతలు నిర్వహిస్తూ జాతీయస్థాయి జిమ్నాస్టిక్స్​​ పోటీల్లో న్యాయనిర్ణేతగా వ్యవహరించి అంతర్జాతీయ న్యాయనిర్ణేతగా వ్యవహరించేందుకు అర్హత సాధించారు. జనవరి 2025 జపాన్‌లో ఇంటర్నేషనల్‌ జడ్జీల కోర్సులో పరీక్ష రాసి మొదటి ప్రయత్నంలోనే 94.7 శాతంతో ఉత్తీర్ణత సాధించినట్లు ఆయన తెలిపారు. ఇంటర్నేషనల్‌ జిమ్నాస్టిక్స్ ​ఫెడరేషన్‌ మార్చి నెలలో తుర్కెయేలో జరిగిన ప్రపంచకప్‌ పోటీల్లో న్యాయనిర్ణేతగా పాల్గొనే అవకాశం కల్పించినట్లు పేర్కొన్నారు.

భరద్వాజ్‌ పనితీరును పరిశీలించి మళ్లీ ఫిలిప్పీన్స్​‍లో జరిగే ప్రపంచ జూనియర్‌ జిమ్నాస్టిక్స్ ఫెడరేషన్‌ స్పోర్ట్స్ అథారిటీ ఆఫ్‌ ఇండియాకు, ఇండియన్‌ రైల్వేబోర్డుకు తెలియజేసి కావాల్సిన అనుమతులు మంజూరు చేశారు. ఒకే సంవత్సరంలో రెండు ప్రపంచస్థాయి పోటీల్లో పాల్గొని అవకాశం పొందిన భరద్వాజ్‌ను వరంగల్‌ జిమ్నాస్టిక్స్​అసోసియేషన్‌ అధ్యక్షుడు నెమరుగొమ్ముల రమేశ్‌రావు, సెక్రటరీ సాంబయ్య, ఇతర సభ్యులు మధుసూదన్‌, శ్రీనివాస్‌, సోమరాజు, కమలాకర్‌తో పాటు రాష్ట్ర కార్యదర్శి ఆకుల సోమేశ్వర్‌ అభినందించారు.