ఇచ్చంపల్లి నుంచి ఒప్పుకోం

గోదావరి బేసిన్‌ అవసరాలు తీరిన తర్వాత, ట్రిబ్యునల్‌ కేటాయించిన 968 టీఎంసీల జలాలకు ఎలాంటి నష్టం లేకుండా గోదావరి-కావేరి నదుల అనుసంధానం ప్రాజెక్టుపై ముందుకుపోవాలని తెలంగాణ ప్రభుత్వం తేల్చిచెప్పింది.

• అక్కడ నిర్మిస్తే లక్ష్మీ బరాజ్‌, సమ్మక్క సాగర్‌పై ఎఫెక్ట్‌
• బేసిన్‌ అవసరాలు తీరాకే ‘గోదావరి-కావేరి’కి మళ్లించాలి
• మళ్లించే నీటిలో 50 శాతం వాటా తెలంగాణకే దక్కాలి
• టాస్క్‌ఫోర్స్‌ కమిటీ సమావేశంలో తెలంగాణ వాదనలు

హైదరాబాద్‌, మార్చి 6 (నమస్తే తెలంగాణ): గోదావరి బేసిన్‌ అవసరాలు తీరిన తర్వాత, ట్రిబ్యునల్‌ కేటాయించిన 968 టీఎంసీల జలాలకు ఎలాంటి నష్టం లేకుండా గోదావరి-కావేరి నదుల అనుసంధానం ప్రాజెక్టుపై ముందుకుపోవాలని తెలంగాణ ప్రభుత్వం తేల్చిచెప్పింది. ముంపు, భూసేకరణ తదితర నష్టాల నేపథ్యంలో గోదావరి నుంచి కావేరికి మళ్లించే నీటిలో 50 శాతం వాటాను తెలంగాణకే కేటాయించాలని స్పష్టం చేసింది.

గోదావరి-కావేరి నదుల అనుసంధానం ప్రాజెక్టు టాస్క్‌ఫోర్స్‌ కమిటీ సమావేశం చైర్మన్‌ వెదిరె శ్రీరామ్‌ నేతృత్వంలో సోమవారం జలసౌధలో జరిగింది. ఛత్తీస్‌గఢ్‌ మినహా తెలంగాణ, ఆంధ్రప్రదేశ్‌, తమిళనాడు, పుదుచ్చేరి, కర్ణాటక, మహారాష్ట్రలతో చర్చించారు. తెలంగాణ సాగునీటిపారుదలశాఖ ప్రత్యేక ప్రధాన కార్యదర్శి రజత్‌కుమార్‌ పాల్గొని ప్రాజెక్టులో ప్రతిపాదించిన పలు అంశాలపై అభ్యంతరాలను కమిటీ దృష్టికి తీసుకెళ్లడంతోపాటు రాష్ట్ర డిమాండ్లను గట్టిగా వినిపించారు.

ఆయా ప్రాజెక్టుల డీపీఆర్‌లపై ఇప్పటికే అన్ని రాష్ట్రాలు అభిప్రాయాలు తెలిపాయని, అన్ని రాష్ర్టాల అనుమతితోనే రివర్‌ లింక్‌ ప్రాజెక్టులపై ముందుకుపోతామని టాస్క్‌ఫోర్స్‌ కమిటీ చైర్మన్‌ వెదిరె శ్రీరామ్‌ తెలిపారు. సమావేశంలో తెలంగాణ, ఏపీ ఈఎన్సీలు మురళీధర్‌, నారాయణరెడ్డి, గజ్వేల్‌ ఈఎన్సీ హరిరాం, సీఎం ఓఎస్డీ శ్రీధర్‌రావు దేశ్‌పాండే, సీఈ మోహన్‌కుమార్‌, ఎస్‌ఈ కోటేశ్వర్‌రావు, గోదావరి డీడీ సుబ్రహ్మణ్యప్రసాద్‌, సీడబ్ల్యూసీ మెంబర్‌ నవీన్‌కుమార్‌, తమిళనాడు, కర్ణాటక, రాజస్థాన్‌, మధ్యప్రదేశ్‌ రా ష్ర్టాల అధికారులు పాల్గొన్నారు.

ఇవీ తెలంగాణ డిమాండ్లు

• 75 % డిపెండబులిటి ప్రకారం ఛత్తీస్‌గఢ్‌ కు చెందిన 141 టీఎంసీలను కావేరికి మ ళ్లించేందుకు ఆ రాష్ర్టాన్ని ఒప్పించాలి.
• తెలంగాణకు ట్రిబ్యునల్‌ కేటాయించిన 968 టీఎంసీల్లో ఇప్పటికే 804.7 టీఎంసీలకు అనుమతి పొందాం. మిగిలిన 142.1 టీఎంసీల వినియోగానికి ఆయా ప్రాజెక్టుల డీపీఆర్‌లను ఆమోదించాలి.
• గోదావరి-కావేరి అనుసంధానం ప్రాజెక్టు వల్ల తెలంగాణలో 18,661 ఎకరాలను సేకరించాల్సి ఉంటుంది. ప్రస్తుతం మళ్లిం చే 141 టీఎంసీల్లో 50 శాతం వాటాను తెలంగాణకే కేటాయించాలి.
• ట్రిబ్యునల్‌ 1 అవార్డు ప్రకారం గోదావరి నుంచి కృష్ణాకు మళ్లించే జలాల్లో బేసిన్‌ రాష్ర్టాలకు వాటా దక్కుతుంది. గోదావరి-కావేరి లింక్‌కు ఆ నిబంధన ఉండొద్దు.
• లింక్‌ ప్రాజెక్టులో భాగంగా ఇచ్చంపల్లి వద్ద మరో బరాజ్‌ను నిర్మించడం అసాధ్యం. అదే జరిగితే ఇచ్చంపల్లి ఎగువన నిర్మించిన లక్ష్మీ బరాజ్‌, దిగువన సమ్మక్క సాగర్‌పై తీవ్ర ప్రభావం ఉంటుంది.
• సమ్మక్కసాగర్‌ బరాజ్‌ నుంచి దేవాదుల, సీతారామ తదితర ప్రాజెక్టుల కింద ఉన్న ఆయకట్టుకు సరిపడా నీటిని తొలుత వినియోగించుకొనే అవకాశం కల్పించాలి.
• ఒకవేళ ఛత్తీస్‌గఢ్‌ తన వాటా జలాలను మళ్లించేందుకు ఒప్పుకోకుంటే రివర్‌ లింక్‌ ప్రాజెక్టును మహానది-గోదావరి నదుల అనుసంధానం తర్వాత చేపట్టాలి.
• ఒకవేళ పోలవరం నుంచి అనుసంధానం ప్రాజెక్టు చేపడితే వివిధ ప్రాజెక్టుల ద్వారా బేసిన్‌ అవతలికి ఏపీ తరలిస్తున్న కృష్ణా జలాలను నిలిపేసి వాటిని తెలంగాణ ప్రాజెక్టులకే కేటాయించాలి.