బస్తీలను బలిపెట్టారు!

మూసీ పునరుద్ధరణే సర్కారు లక్ష్యమా.. అందులో భాగమే ఈ వ్యూహమా.. అంటే అవుననే అంటున్నారు మూసీ వరద బాధితులు. భారీ వర్షాలు కురుస్తాయని వాతావరణశాఖ ఎప్పటికప్పుడు హెచ్చరిస్తున్నా.. ప్రభుత్వం ఏ మాత్రం పట్టించుకోలేదు.

September 28, 2025 / 06:23 AM IST

మూసీ పునరుద్ధరణే సర్కారు లక్ష్యమా.. అందులో భాగమే ఈ వ్యూహమా.. అంటే అవుననే అంటున్నారు మూసీ వరద బాధితులు. భారీ వర్షాలు కురుస్తాయని వాతావరణశాఖ ఎప్పటికప్పుడు హెచ్చరిస్తున్నా.. ప్రభుత్వం ఏ మాత్రం పట్టించుకోలేదు. ఎప్పుడో పూర్తిస్థాయిలో నిండిన ఉస్మాన్‌సాగర్‌, హిమాయత్‌సాగర్‌ నీటిని కిందికి వదలాల్సి ఉన్నా తాత్సారం చేసింది. ఈ క్రమంలో గత రెండ్రోజులుగా కురిసిన భారీ వర్షాలకు ఎగువ నుంచి వరద పెరగడంతో ఒక్కసారిగా రెండు చెరువుల నీటిని పూర్తిస్థాయిలో గేట్లు ఎత్తి నదిలోకి వదిలారు. దీంతో చాదర్‌ఘాట్‌, మూసారంబాగ్‌, ఎంజీబీఎస్‌ పరిసర ప్రాంతాలు వరదలో మునిగిపోయాయి. దీంతో మూసీ రివర్‌ బెడ్‌ బాధితులు వరదనీటిలో చిక్కుకుని బిక్కుబిక్కు మంటున్నారు. ఎటువెళ్లాలో, ఏమి చేయాలో తెలియక కొట్టుమిట్టాడుతున్నారు. ప్రభుత్వ తీరుపై మండిపడుతున్నారు.

వరద కట్టడికి కట్టిన జలాశయాలనే వాడుకొని..

1908 నాటి భారీ వరదల నుంచి హైదరాబాద్‌ను రక్షించేందుకు హిమాయత్‌ సాగర్‌, ఉస్మాన్‌సాగర్‌ జంట జలాశయాలను మూసీ ఉపనదిపై చివరి నిజాం ఉస్మాన్‌ అలీ ఖాన్‌ నిర్మించారు. నాడు నిజాం రాజు ప్రజలను కాపాడేందుకు ఈ రిజర్వాయర్లు కడితే.. నేడు కాంగ్రెస్‌ ప్రభుత్వం పేదలను సిటీ నుంచి తరిమికొట్టేందుకు ఆ జంట జలాశయాలను వాడుకున్నది. ఇన్నిరోజులూ నీటిని విడుదల చేయకుండా ఆపి..శుక్రవారం అర్ధరాత్రి ఒక్కసారిగా రెండు రిజర్వాయర్ల నుంచి నీటిని వదలడంతో మూసీ ఒక్కసారిగా ఉప్పొంగి నగరవాసులను అతలాకుతలం చేసింది.

నిండా మునిగిన ఇండ్లు..