మరో 9 టీఎంసీలు లూటీ!
నాగార్జున సాగర్ రిజర్వాయర్ నుంచి మరో 9 టీఎంసీలు కొల్లగొట్టేందుకు ఆంధ్రప్రదేశ్ సర్కార్ ఎసరు పెట్టింది.
- చేష్టలుడిగి చూస్తున్న తెలంగాణ సర్కార్
- సాగర్ నుంచి ఇవ్వాలని ఏపీ సర్కార్ ఇండెంట్
- ఆ వెంటనే కేఆర్ఎంబీ జీహుజూర్!
- రేపు త్రీ మెంబర్ కమిటీ సమావేశం
- ఇప్పటికే 22 టీఎంసీలు వాడుకొన్న ఏపీ
హైదరాబాద్, నవంబర్21 (నమస్తే తెలంగాణ): నాగార్జున సాగర్ రిజర్వాయర్ నుంచి మరో 9 టీఎంసీలు కొల్లగొట్టేందుకు ఆంధ్రప్రదేశ్ సర్కార్ ఎసరు పెట్టింది. ఈ మేరకు నీటి కోసం ఏపీ సర్కార్ ఇండెంట్ పెట్టింది. అదే తడవుగా నీటి విడుదలకు చొరవ చూపేందుకు కృష్ణా రివర్ మేనేజ్మెంట్ బోర్డు (కేఆర్ఎంబీ) సిద్ధమైంది. సోమవారమే త్రీమెన్ కమిటీ సమావేశాన్ని నిర్వహించాలని బోర్డు నిర్ణయిస్తూ, ఇరు రాష్ర్టాల ప్రభుత్వాలకు లేఖ లు రాసింది. ఈ నేపథ్యంలో తెలంగాణలోని కాంగ్రెస్ సర్కార్ చేష్టలుడిగి చూస్తున్నది. వాస్తవంగా ఈ ఏడాది రెండు రాష్ర్టాల నీటివాటాలే ఇప్పటివరకు తేలలేదు. వినియోగాలకు సంబంధించి ఒప్పందాలు జరుగనేలేదు.
అందుకు సంబంధించిన పూర్తిస్థాయి బోర్డు మీటింగ్ను ఏర్పాటు చేయకుండా నాలుగు నెలలుగా తాత్సారం చేస్తూ, ఇప్పుడు నీళ్లన్నీ అయిపోయాక మళ్లీ కేవలం త్రీమెన్ కమిటీ ఏర్పాటుకు సిద్ధమవడం గమనార్హం. ఈ ఏడాది ఏపీ ప్రభుత్వం సాగర్ కుడికాలువ ద్వారా దాదాపు 22 టీఎంసీలను ఇప్పటికే వినియోగించుకొన్నది. సాగర్ రిజర్వాయర్ పూర్తిస్థాయి నీటినిల్వ సామర్థ్యం 312 టీఎంసీలు కాగా, ప్రస్తుతం ఉన్నది 177 టీఎంసీలు మాత్రమే. అందులో మినిమం డ్రా డౌన్ లెవల్ (ఎండీడీఎల్) స్థాయిలో వినియోగానికి అందులో ఉన్నది కేవలం 45 టీఎంసీలు మాత్రమే. దీనిపై ఉమ్మడి నల్లగొండ, ఖమ్మం జిల్లాలతోపాటు, హైదరాబాద్ మహానగరానికి తాగునీటి అవసరాలు ప్రధానంగా ఆధారపడి ఉన్నాయి.
16న బోర్డుకు ఏపీ లేఖ
సాగర్ నుంచి ఇప్పటికే 22 టీఎంసీలను వినియోగించుకొన్న ఏపీ సర్కార్.. తాజాగా ప్రస్తుతం ఉన్న ఉన్న జలాలకూ ఎసరు పెట్టేందుకు సిద్ధమైంది. తాగునీటి కోసం సాగర్ నుంచి మరో 9 టీఎంసీల నీటిని విడుదల చేయాలని కోరుతూ కేఆర్ఎంబీకి ప్రతిపాదనలను పంపింది. ఏపీలోని గుంటూరు, బాపట్ల, పల్నాడు, మర్కాపురం, ప్రకాశం జిల్లాల పరిధిలో తాగునీటి అవసరాలకు సాగర్ జలాశయం నుంచి కుడికాలువ ద్వారా 8 టీఎంసీలను, ఎడమ కాలువ ద్వారా ఎన్టీఆర్, ఏలూరు, కృష్ణా జిల్లాల తాగునీటి కోసం 1 టీఎంసీ జలాలను విడుదల చేయాలని బోర్డుకు ఈ నెల 16న లేఖ రాసింది. ఏపీ ప్రతిపాదనలకు స్పందించిన బోర్డు.. త్రీమెన్ కమిటీ ఏర్పాటుకు సైతం సిద్ధమైంది.
మూడు నెలలుగా తాత్సారం
శ్రీశైలం ప్రాజెక్టుకు ఆగస్టులో వరద ప్రవాహాలు మొదలుకాగానే ఇండెంట్లు, అనుమతులు లేకుండానే పోతిరెడ్డిపాడు నుంచి ఏపీ సర్కార్ నీటి మళ్లింపును చేపట్టింది. అదీగాక ఉన్నపళంగా 2026-27 నీటి సంవత్సరానికి సంబంధించి శ్రీశైలం, సాగర్ ప్రాజెక్టుల నుంచి జలాల వినియోగాల అంశంపైన మాత్రమే మీటింగ్ ఏర్పాటు చేయాలంటూ ఆగస్టు 4న సాయంత్రమే కేఆర్ఎంబీ చైర్మన్కు ఏపీ లేఖ రాసింది. నీటి వినియోగమే సింగిల్ పాయింట్ ఎజెండాగా తక్షణం మీటింగ్ ఏర్పాటు చేయాలని బోర్డుకు ఒకరకంగా ఏపీ హుకుం జారీ చేసింది.
ఏపీ లేఖ అందినదే తడువుగా జీహుజూర్ అంటూ ఆగమేఘాల మీద కేఆర్ఎంబీ సైతం ఆగస్టు 13న త్రీమెన్ కమిటీ సమావేశాన్ని నిర్వహించనున్నట్టు ప్రకటించింది. ఏపీ ఆదేశించిన తరహాలోనే నీటి అవసరాలపై మాత్రమే చర్చించే సింగిల్ ఎజెండాను ఖరారు చేసింది. ఆ తర్వాత ఏపీ విజ్ఞప్తితోనే మీటింగ్ను ఆగస్టు 17కు, ఆ తదుపరి 24వ తేదీకి వాయిదా వేసింది. ఆ తర్వాత త్రీమెన్ కమిటీ సమావేశాన్ని నిర్వహించినా నీటివాటాలను ఖరారు చేయకుండా, మరోసారి సెప్టెంబర్ 4వ తేదీకి సమావేశం వాయిదా వేసింది. ఆ తదుపరి కండ్లుతెరచి నీటివాటాలపై పూర్తిస్థాయి బోర్డు సమావేశాన్ని అక్టోబర్ 1న నిర్వహిస్తామని కేఆర్ఎంబీ ప్రకటించింది.
ఆ సమావేశాన్ని ఏపీ విజ్ఞప్తి నేపథ్యంలో మళ్లీ అదే నెల 26వ తేదీకి వాయిదా వేసింది. సీఎం రేవంత్రెడ్డి వెంట మహారాష్ట్ర పర్యటనకు వెళ్లనున్నందున సమావేశాన్ని వాయిదా వేయాలని తెలంగాణ అధికారులు కోరడం, ఈ మేరకు భేటీ 27వ తేదీకి వాయిదా పడింది. తెలంగాణ విజ్ఞప్తితో సమావేశాన్ని మరోసారి నవంబర్ 5వ తేదీకి వాయిదా వేసింది. మొత్తంగా గడిచిన మూడు నెలలుగా సమావేశాలు ఏర్పాటు చేయకుండా బోర్డు కాలం వెల్లదీస్తూ వచ్చింది.
Read Today's Latest Telangana News in Telugu and Telugu News
RELATED ARTICLES
తాజా వార్తలు
ట్రెండింగ్ వార్తలు
Watch: ఆసుపత్రిలో నిద్రిస్తున్న మహిళను వేధించిన వ్యక్తి.. తర్వాత ఏం జరిగిందంటే?
Watch: వైద్య విద్యార్థినిని.. కాలేజీ క్యాంపస్ నుంచి కిడ్నాప్ చేసిన కుటుంబ సభ్యులు, వీడియో వైరల్
Vande Bharat Train | బంధువులను సాగనంపేందుకు వందే భారత్ రైలు ఎక్కిన 12 మంది.. తర్వాత ఏం జరిగిందంటే?
Watch: హాస్పిటల్ యజమానిని బెదిరించి రూ.10 లక్షలు వసూలు.. కాంగ్రెస్ నేత అరెస్ట్, పార్టీ నుంచి బహిష్కరణ
Watch: ‘బ్యాగ్లో గంజాయి పెడతా.. డ్రగ్స్ కేసులో ఇరికిస్తా’.. జంటను బెదిరించిన పోలీస్ అధికారి

