99 లక్షల మందికి డీ వార్మింగ్‌!

జాతీయ నులి పురుగుల నివారణ దినోత్సవాన్ని (డీ వార్మింగ్‌ డే) గురువారం భారీ ఎత్తున నిర్వహించేందుకు రాష్ట్ర ప్రభుత్వం ఏర్పాట్లు చేసింది. ఏడాది నుంచి 19 ఏండ్ల మధ్య వయసున్న వారికి ప్రత్యేకంగా 400 మిల్లీగ్రాములు ఉండే ఆల్బెండజోల్‌ ట్యాబ్లెట్లను పంపిణీ చేయనున్నారు. ఈ కార్యక్రమాన్ని ఆర్థిక, వైద్యారోగ్య శాఖ మంత్రి తన్నీరు హరీశ్‌రావు ప్రారంభించనున్నారు.

• నేడు జాతీయ నులి పురుగుల నివారణ దినోత్సవం
• పిల్లల్లో నులిపురుగుల నివారణకు ఆల్బెండజోల్‌ ట్యాబ్లెట్లు
• నేడు పంపిణీని ప్రారంభించనున్న మంత్రి హరీశ్‌రావు
• ఏడాది నుంచి 19 ఏండ్ల వయసున్న వారందరికీ పంపిణీ
• అంగన్‌వాడీలు సహా అన్ని విద్యాసంస్థల్లో కార్యక్రమం

హైదరాబాద్‌, జూలై 19 (నమస్తే తెలంగాణ): జాతీయ నులి పురుగుల నివారణ దినోత్సవాన్ని (డీ వార్మింగ్‌ డే) గురువారం భారీ ఎత్తున నిర్వహించేందుకు రాష్ట్ర ప్రభుత్వం ఏర్పాట్లు చేసింది. ఏడాది నుంచి 19 ఏండ్ల మధ్య వయసున్న వారికి ప్రత్యేకంగా 400 మిల్లీగ్రాములు ఉండే ఆల్బెండజోల్‌ ట్యాబ్లెట్లను పంపిణీ చేయనున్నారు. ఈ కార్యక్రమాన్ని ఆర్థిక, వైద్యారోగ్య శాఖ మంత్రి తన్నీరు హరీశ్‌రావు ప్రారంభించనున్నారు. ఈ కార్యక్రమం కోసం రాష్ట్ర ప్రభుత్వం ఇప్పటికే 41,337 మంది టీచర్లకు, 35,700 మంది అంగన్‌వాడీలకు ప్రత్యేకంగా శిక్షణ ఇచ్చింది. 1-19 ఏండ్ల మధ్య వయసున్న బాలలు మొత్తంగా 98.97 లక్షల మంది ఉంటారని వైద్యారోగ్యశాఖ అంచనా వేసింది. వీరందరికీ ట్యాబ్లెట్లు పంపిణీ చేయాలని లక్ష్యంగా నిర్ణయించింది. ఏదేని కారణం వల్ల ట్యాబ్లెట్లు తీసుకోలేని విద్యార్థుల కోసం ఈ నెల 27న మరోసారి డీవార్మింగ్‌ కార్యక్రమం నిర్వహిస్తారు. నిరుడు 96.47 లక్షల మందికి ట్యాబ్లెట్లు పంపిణీ చేయగా, ఈ సారి సుమారు 2.5 లక్షల మంది పెరిగారు. అంగన్‌వాడీలు సహా అన్ని ప్రభుత్వ, ప్రైవేటు విద్యాసంస్థల్లో డీ వార్మింగ్‌ కార్యక్రమాన్ని నిర్వహించనున్నారు. స్కూల్‌ బయట ఉన్న పిల్లలకు ఆశ కార్యకర్తలు, అంగన్‌వాడీల సాయంతో ట్యాబ్లెట్లు పంపిణీ చేస్తారు.

1. ఈ ఏడాది లక్ష్యం 98.97 లక్షలు
2. ప్రభుత్వ విద్యాసంస్థల్లోని విద్యార్థులు 60.56 లక్షలు
3. ప్రైవేట్‌ విద్యాసంస్థల్లోని విద్యార్థులు 34.68 లక్షలు
4. స్కూల్‌ బయట ఉన్నవారు 3.73 లక్షలు

పిల్లల ఆరోగ్యకర భవిష్యత్తు కోసమే

• వివిధ మార్గాల ద్వారా పిల్లల శరీరాల్లోకి నులిపురుగులు చేరతాయి. ఇవి పొట్టలో పెరిగి అనారోగ్య సమస్యలు సృష్టిస్తాయి. పిల్లలు తీసుకునే ఆహారంలో ఎక్కువ శాతాన్ని ఇవి తినేస్తుంటాయి. కొందరిలో ఎక్కువ సంఖ్యలో పురుగులు ఉండటం వల్ల వారు సరిగా ఆహారం తీసుకోలేరు. ఫలితంగా పిల్లల్లో పోషకాహారలోపం, రక్తహీనత, శారీరక, మానసిక ఎదుగుదల లోపించడం, తరుచూ తీవ్రమైన కడుపునొప్పి రావడం వంటి సమస్యలకు దారితీస్తాయి. ఈ సమస్యల బారి నుంచి పిల్లలను రక్షించి, వారికి ఆరోగ్యకరమైన భవిష్యత్తును ఇచ్చేందుకు ప్రభుత్వం ఏటా డీ వార్మింగ్‌ డే కార్యక్రమాన్ని నిర్వహిస్తున్నది.
• కలుషిత ప్రాంతాల్లో చెప్పుల్లేకుండా నడవడం, కలుషితమైన నీరు, ఆహారం తీసుకోవడం, సరిగా ఉడకని మాంసం ద్వారా, పెంపుడు జంతువుల ద్వారా ఇవి శరీరంలోకి చేరుతాయని నిపుణులు చెప్తున్నారు.
• తీపి పదార్థాలు తినాలనే కోరిక పెరగడం, తరుచూ కడుపు నొప్పి, ఎక్కువగా ఆకలి కావడం, తలనొప్పి, మట్టి తినడం, తలలో పేలు పెరగడం వంటివన్నీ నులిపురుగులు ఉన్నాయనడానికి సంకేతాలని నిపుణులు పేర్కొంటున్నారు.
• వీటి నివారణకు ఆల్బెండజోల్‌ ట్యాబ్లెట్లు వేయడం ఉత్తమ మార్గమని స్పష్టం చేస్తున్నారు. ప్రపంచవ్యాప్తంగా ఇదే విధానాన్ని అనుసరిస్తున్నారని తెలిపారు.

ఏ వయసు వారికి ఎంత డోసు..

• 1-2 ఏండ్లు: సగం ట్యాబ్లెట్‌ను నీళ్లలో కలిపి ఇస్తారు.
• 2-3 ఏండ్లు: ఒక ట్యాబ్లెట్‌ను నీళ్లలో కలిపి తాగిస్తారు.
• 3-19 ఏండ్లు: ట్యాబ్లెట్‌ను చప్పరించాలని సూచిస్తారు.
• ఈ ప్రక్రియ మొత్తం టీచర్ల పర్యవేక్షణలో జరుగుతుంది.
• ఖాళీ కడుపుతో ఉన్న విద్యార్థులకు ట్యాబ్లెట్‌ ఇవ్వరు.
• ఈ ట్యాబ్లెట్‌ వల్ల దుష్ప్రభావాలు దాదాపు ఉండవు. నులిపురుగులు ఎక్కువగా ఉన్న కొందరు విద్యార్థుల్లో మాత్రం కాస్త నీరసం, వాంతి వంటి లక్షణాలు కనిపిస్తాయి.