డిగ్రీలో 52% అమ్మాయిలే

ఫలితాలు.. అడ్మిషన్లు ఏదీ తీసుకొన్నా అన్నింటా అమ్మాయిలదే హవా. తాజాగా ఈ వరుసలో డిగ్రీ అడ్మిషన్లు చేరాయి. ఈ ఏడాది డిగ్రీ ఫస్టియర్‌లో 52శాతం అమ్మాయిలు అడ్మిషన్లు పొందారు.

• 2 లక్షల మార్కును దాటిన ఫస్టియర్‌ అడ్మిషన్లు
• కోర్సుల్లో బీకామ్‌ టాప్‌
• ప్రభుత్వ కాలేజీల్లోనే అధికంగా సీట్ల భర్తీ
• ఇతర రాష్ర్టాల విద్యార్థులు తెలంగాణకు క్యూ
• దోస్త్‌ అడ్మిషన్ల వివరాలు వెల్లడి

హైదరాబాద్‌, నవంబర్‌ 17 (నమస్తే తెలంగాణ): ఫలితాలు.. అడ్మిషన్లు ఏదీ తీసుకొన్నా అన్నింటా అమ్మాయిలదే హవా. తాజాగా ఈ వరుసలో డిగ్రీ అడ్మిషన్లు చేరాయి. ఈ ఏడాది డిగ్రీ ఫస్టియర్‌లో 52శాతం అమ్మాయిలు అడ్మిషన్లు పొందారు. ఈ ఏడాది డిగ్రీ ఫస్టియర్‌లో 2,04,674 మంది విద్యార్థులు చేరగా, అమ్మాయిలు 1,08,150, అబ్బాయిలు 96,524 చొప్పున ప్రవేశాలు పొందారు. డిగ్రీ చదివేందుకు ఇప్పుడు పక్క రాష్ర్టాల విద్యార్థులిప్పుడు తెలంగాణకు క్యూ కడుతున్నారు.

సరిహద్దులు దాటుకొని మన రాష్ట్రంలోనే ప్రవేశాలు పొందుతున్నారు. ఇలా ఈ ఏడాది ఏపీ, మహారాష్ట్ర, కర్ణాటక రాష్ట్రాలకు చెందిన విద్యార్థులు మన రాష్ట్రంలో డిగ్రీ ఫస్టియర్‌లో ప్రవేశాలు పొందారు. యాజమాన్యాల వారీగా సీట్ల భర్తీని పరిశీలిస్తే.. ప్రభుత్వ కాలేజీల్లోనే అధికంగా సీట్లు భర్తీ అయ్యాయి. ఇటీవలే డిగ్రీ ఫస్టియర్‌ అడ్మిషన్ల ప్రక్రియ ముగియగా, ఆయా వివరాలను ఉన్నత విద్యామండలి (చైర్మన్‌) ప్రొఫెసర్‌ ఆర్‌ లింబాద్రి శుక్రవారం విడుదల చేశారు. ఆయా వివరాలిలా ఉన్నాయి.

• ఈ ఏడాది డిగ్రీ అడ్మిషన్లు 2లక్షల మార్కును దాటాయి. ఇక ప్రభుత్వ డిగ్రీ కాలేజీల్లో 50వేలకు పైగా అడ్మిషన్లు నమోదుకావడం విశేషం.
• బీకాం కోర్సులో అత్యధికంగా 85,153 అడ్మిషన్లు రాగా, ఆ తర్వాత బీఎస్సీ లైఫ్‌సైన్సెస్‌లో 43,180 మంది విద్యార్థులు చేరారు.
• బీఏ కోర్సుల్లో 29,752, బీబీఏ కోర్సులో 15,160, బీఎస్సీ ఫిజికల్‌ సైన్స్‌ కోర్సుల్లో 25,937మంది విద్యార్థులు చేరారు.
• ఈ ఏడాది కొత్తగా ప్రవేశపెట్టిన స్కిల్‌ సెక్టార్‌ కోర్సుల్లో 1,398 మంది విద్యార్థులు ప్రవేశాలు పొందగా, బీటెక్‌తో సమానమైన బీఎస్సీ – ఆనర్స్‌ (కంప్యూటర్‌సైన్స్‌) కోర్సులో 889 మంది విద్యార్థులు ప్రవేశాలు పొందారు.