మెయిన్స్‌కు మూడున్నర నెలలే

తెలంగాణ తొలి గ్రూప్‌-1లో ప్రాథమిక పరీక్ష (ప్రిలిమినరీ) ముగిసింది. దీనికి సంబంధించి కీ విడుదల కాగా, అభ్యంతరాల స్వీకరణ గడువు కూడా పూర్తయ్యింది. ఇక మిగిలింది కీలకమైన మెయిన్స్‌ పరీక్షే. ప్రిలిమ్స్‌లో క్వాలిఫై అవుతామా? లేదా? అనే సందేహంతో సమయాన్ని వృథా చేయడం కన్నా.. ఇప్పటినుంచే ప్రిపరేషన్‌ ప్రారంభించడం మేలని విద్యా నిపుణులు

• గ్రూప్‌-1కు దగ్గర పడిన సమయం
• ప్రిలిమ్స్‌ ఫలితాల కోసం ఆగొద్దు
• అభ్యర్థులు ప్రిపరేషన్‌ ప్రారంభించాలంటున్న నిపుణులు

హైదరాబాద్‌, నవంబర్‌ 4 (నమస్తే తెలంగాణ): తెలంగాణ తొలి గ్రూప్‌-1లో ప్రాథమిక పరీక్ష (ప్రిలిమినరీ) ముగిసింది. దీనికి సంబంధించి కీ విడుదల కాగా, అభ్యంతరాల స్వీకరణ గడువు కూడా పూర్తయ్యింది. ఇక మిగిలింది కీలకమైన మెయిన్స్‌ పరీక్షే. ప్రిలిమ్స్‌లో క్వాలిఫై అవుతామా? లేదా? అనే సందేహంతో సమయాన్ని వృథా చేయడం కన్నా.. ఇప్పటినుంచే ప్రిపరేషన్‌ ప్రారంభించడం మేలని విద్యా నిపుణులు సూచిస్తున్నారు. ఫిబ్రవరిలోనే మెయిన్స్‌ నిర్వహిస్తామని టీఎస్‌పీఎస్సీ గతంలోనే ప్రకటించింది. అంటే.. ఇంకా మూడున్నర నెలలే మిగిలి ఉండటంతో ప్రతి నిమిషం చాలా విలువైనది.

ప్రిలిమ్స్‌ కీతో క్లారిటీ
టీఎస్‌పీఎస్సీ ప్రిలిమినరీ కీని విడుదల చేసింది. జనరల్‌ కటాఫ్‌ దాదాపు 70 నుంచి 80 మార్కుల మధ్య ఉంటుందని నిపుణులు చెప్తున్నారు. అవికాస్త తగ్గొచ్చు, పెరగొచ్చు. అభ్యర్థుల రిజర్వేషన్లు, జోన్లవారీ పోస్టులను బట్టి ఓ అంచనాకు వచ్చేయవచ్చు. ప్రిలిమ్స్‌ ఫలితాలు వచ్చేవరకు ఆలోచిస్తూ కూర్చుంటే చివరి క్షణంలో ఇబ్బందిపడక తప్పదని హెచ్చరిస్తున్నారు. ప్రస్తుత పరిస్థితులకు అనుగుణంగా జవాబు రాసే తీరులో చిన్నచిన్న మార్పులు చేసుకోవాలని సూచిస్తున్నారు.

మెయిన్స్‌లో ఇవి చాలా ముఖ్యం

• మెయిన్స్‌కు సన్నద్ధమయ్యే అభ్యర్థులు పకడ్బందీ ప్రణాళికతో టైంటేబుల్‌ సిద్ధం చేసుకోవాలి.
• అభ్యర్థికి భావ వ్యక్తీకరణ చాలా ప్రధానం. సూక్ష్మ, వివరణాత్మక సమాధానాలు రాసేలా సన్నద్ధం కావాలి.
• ప్రతి ప్రశ్నకు ప్రామాణిక గణాంకాలు జోడించాలి. పరీక్షలో ఇవెంతో కీలకం. పరీక్షలో సమయపాలన చాలా అవసరం. ఏ ప్రశ్నకు ఎంత సమయం కేటాయించాలన్నది ముందే నిర్ణయించుకోవాలి.
• దేశ, రాష్ట్ర పరిస్థితులపై సమగ్ర అవగాహన ఉండాలి. ప్రశ్నలకు సమగ్ర సమాచారంతో కూడిన సమాధానాలు రాయడం ద్వారా ఎక్కువ మార్కులు సాధించేం దుకు అవకాశం ఉంటుంది.
• రాజ్యాంగ, చట్టబద్ధ పరిధికి లోబడి సమాధానాలు రాయడం చాలా ముఖ్యం.
• గ్రూప్‌-1 పోస్టు సాధించాలంటే లక్ష్యం, పట్టుదల చాలా అవసరం. దరఖాస్తు సమయంలో ఉన్న ఉత్సాహం చివరి వరకు ఉండాలి. ఎలాంటి అవరోధాలు ఎదురైనా సహనంతో వ్యవహరించాలి.
• ప్రిలిమ్స్‌ అంతా ఆబ్జెక్టివ్‌. కానీ మెయిన్స్‌లో రాత పరీక్షదే కీ రోల్‌. వ్యాసాలు రాసే విధానాన్ని బట్టి అభ్యర్థి సమర్థతను గుర్తిస్తారు. నిర్దేశిత సమయంలోనే అన్ని ప్రశ్నలకు సమాధానాలు రాయాలంటే రైటింగ్‌ ప్రాక్టీస్‌ తప్పనిసరి.

ప్రతి గంట విలువైనదే..
గ్రూప్‌-1 విజయానికి ప్రతిగంటా విలువైనదే. ప్రిలిమ్స్‌ ఫలితాల కోసం వేచి చూస్తూ సమయాన్ని వృథా చేసుకోవద్దు. మెయిన్స్‌కు కొత్త టైమ్‌టేబుల్‌ సిద్ధం చేసుకొనిసమయాన్ని సమర్థంగా వినియోగించుకోవాలి. కష్టం అనిపించే సబ్జెక్టులకు ఎకువ సమయం కేటాయించాలి. రివిజన్‌కు తగిన సమయం వెచ్చించాలి. పట్టుదలతో సన్నద్ధతమైతేనే విజయం సాధ్యం.
– రజనీకాంత్‌రెడ్డి, 2016 గ్రూప్‌-1 స్టేట్‌ సెకండ్‌ ర్యాంకర్‌,
జీహెచ్‌ఎంసీ అదనపు కమిషనర్‌

మూడున్నర నెలలే కీలకం
గ్రూప్‌-1ఉద్యోగం సాధించాలంటే ప్రతిక్షణం ఎంతో కీలకం. మెయిన్స్‌కు మూడున్నర నెలలే మిగిలి ఉన్నందునప్రణాళిక ప్రకారం చదవాలి. ప్రిలిమ్స్‌ కంటే మూడు రెట్లు ఎక్కువగా మెయిన్స్‌కు శ్రమించాలి. మార్కెట్‌లో దొరికే ప్రతి పుస్తకం జోలికి వెళ్లకపోవడం మంచిది. అన్ని అంశాలపై పూర్తి పట్టు సాధించాలి. జవాబులు రాసేటప్పుడు సంవత్సరాలు, తేదీలు తప్పనిసరిగా జతచేయాలి.
– ఎం కిరణ్‌కుమార్‌, రైట్‌చాయిస్‌ అకాడమీ చైర్మన్‌