Power Cuts | వ్యవసాయానికి కరెంట్‌ ‘కట్‌’కట..! రాత్రివేళ బావుల వద్ద రైతుల పడిగాపులు..!

రాష్ట్రంలో చాలాచోట్ల వ్యవసాయానికి 24గంటల విద్యుత్తు అందక రైతాంగం తీవ్ర అవస్థలు పడుతున్నది. కొన్ని గ్రామాల్లో రాత్రిపూట, మరికొన్ని చోట్ల తెల్లవారుజామున క రెంటు ఇస్తున్నారు. ఎముకలు కొరికే చలిలో పంటలు కాపాడుకొనేందుకు రైతులు బావు ల వద్దకు పరుగులు తీస్తున్నారు. కొన్ని గ్రామా ల్లో తరచూ కరెంటు వస్తూపోతుండటంతో బావుల వద్దే పడిగాపులు కాయాల్సి వస్తున్నది.

• సాగుకు 24 గంటల విద్యుత్తు బంద్‌
• అరకొర సరఫరాతో అవస్థలు
• జనవరి తర్వాత మరింత కటకటే
• తొలివారంలో పెరిగిన డిమాండ్‌

హైదరాబాద్‌, డిసెంబర్‌ 10(నమస్తే తెలంగాణ): రాష్ట్రంలో చాలాచోట్ల వ్యవసాయానికి 24గంటల విద్యుత్తు అందక రైతాంగం తీవ్ర అవస్థలు పడుతున్నది. కొన్ని గ్రామాల్లో రాత్రిపూట, మరికొన్ని చోట్ల తెల్లవారుజామున క రెంటు ఇస్తున్నారు. ఎముకలు కొరికే చలిలో పంటలు కాపాడుకొనేందుకు రైతులు బావు ల వద్దకు పరుగులు తీస్తున్నారు. కొన్ని గ్రామా ల్లో తరచూ కరెంటు వస్తూపోతుండటంతో బావుల వద్దే పడిగాపులు కాయాల్సి వస్తున్నది. అరకొర కరెంటు, నీళ్ల కొరత కారణంగా రైతు లు ఈసారి వరి సాగుకు మొగ్గుచూపడం లేదు. వరికి బదులుగా మక్కజొన్న వేసేందుకు ఆసక్తిచూపుతున్నారు. హుస్నాబాద్‌ నియోజకవర్గంలో కొందరు రైతులు మక్కజొన్న విత్తనాలు నాటే పనిలో నిమగ్నమయ్యారు.

ఇదీ పరిస్థితి

• కరీంనగర్‌ జిల్లా చిగురుమామిడి మండలంలో వ్యవసాయానికి 24 గంటల కరెం టు ఇవ్వడం లేదు. తెల్లవారుజామున 4 నుంచి సాయంత్రం 5గంటల వరకు మా త్రమే ఇస్తున్నారని ఓ గ్రామ రైతు తెలిపా డు. దీంతో ఉదయాన్నే పొలానికి పరుగు లు పెట్టాల్సి వస్తున్నదని వాపోయాడు.
• రాజన్న సిరిసిల్ల జిల్లా ఎల్లారెడ్డిపేట మండలంలో వ్యవసాయానికి 14-15 గంటలు మాత్రమే కరెంటు ఇస్తున్నారు. ఈ మండలంలో రాత్రి 12గంటల ప్రాంతం వరకు విద్యుత్తు సరఫరా చేస్తున్నారని రైతులు వా పోతున్నారు. అసలే చలికాలం కావడంతో రాత్రిపూట బావుల వద్దకు వెళ్లేందుకు రైతు లు ఇబ్బందులు పడుతున్నారు.
• నల్లగొండ జిల్లాలోని కొన్ని గ్రామాల్లో అప్రకటిత కోతలు అమలవుతున్నాయి. రాత్రివేళల్లో మధ్యలో కట్‌ చేస్తున్నారని రైతులు వాపోతున్నారు. దీంతో పొలాల వద్దే పడిగాపులు పడాల్సి వస్తున్నదని చెప్తున్నారు.
• అచ్చంపేట నియోజకవర్గం బల్మూరు మం డలంలోని ఓ గ్రామంలో వ్యవసాయానికి సక్రమంగా కరెంటు ఇవ్వడం లేదు. రాత్రి 10గంటల తర్వాత కరెంట్‌ ఇవ్వడంతో మోటర్లు ఆన్‌ చేసేందుకు రాత్రిపూట బావు ల వద్దకు వెళ్లాల్సి వస్తున్నదంటున్నారు.

జనవరి తర్వాత కటకటే
డిమాండ్‌, వినియోగం పెరుగడం చూ స్తుంటే జనవరి తర్వాత వినియోగం మరింత పెరిగే అవకాశమున్నది. రాబోయే రోజుల్లో కటకట నెలకొనే పరిస్థితులున్నాయి. మంగళవారం 217 మిలియన్‌ యూనిట్ల వినియోగం కాగా, జెన్‌కో థర్మల్‌ స్టేషన్లల్లో 79, హైడల్‌ నుంచి 5 మిలియన్‌ యూనిట్లు మాత్రమే సరఫరా అయ్యింది. సెంట్రల్‌ జనరేటింగ్‌ స్టేషన్లతోపాటు ఇంధన ఎక్సేంజీలో 69 మిలియన్‌ యూనిట్ల విద్యుత్తును కొనుగోలు చేశారు. మంగళవారం 64 మిలియన్‌ యూనిట్లు సీజీఎస్‌, ఇంధన ఎక్సేంజీలో కొనుగోలు చేశారు. డిమాండ్‌ పెరిగితే కొనుగోలు చేయాల్సిన విద్యుత్తు మరింత పెరిగే అవకాశాలున్నాయి.

పెరిగిన వినియోగం
రాష్ట్రంలో విద్యుత్తు వినియోగం క్రమంగా పెరుగుతున్నది. ప్రత్యేకించి డిసెంబర్‌ మొదటి వారం నుంచి డిమాండ్‌ అధికమవుతున్నది. ఈ నెల ఒకటో తేదీ వరకు వినియోగం 193 మిలియన్‌ యూనిట్లు ఉండగా, మంగళవారం 217కి చేరింది. ఈ నెల 2న 204, 3న 209, 4న 211 మిలియన్‌ యూనిట్ల విద్యుత్తు వినియోగం నమోదైంది. వ్యవసాయ పనులు ఊపందుకోవడంతో డిమాండ్‌ మరింతగా పెరిగే అవకాశమున్నది. 2024లో కూడా డిసెంబర్‌లోనే వినియోగం అమాంతం పెరిగింది. మొదట 198 మిలియన్‌ యూనిట్లు ఉండగా, మొదటి వారంలోనే 220 మిలియన్‌ యూనిట్లకు పెరిగింది. ఈ డిసెంబర్‌ మొదటి వారంలోనే అమాంతం పెరిగింది. రాబోయే రోజుల్లో మరింత పెరిగే అవకాశమున్నది.

డిసెంబర్‌ తొలి వారంలో పీక్‌ డిమాండ్‌ (మెగావాట్లలో..)
తేదీ : డిమాండ్‌
డిసెంబర్‌ 3 : 11,814
డిసెంబర్‌ 4 : 11,942
డిసెంబర్‌ 5 : 12,287
డిసెంబర్‌ 6 : 12,053
డిసెంబర్‌ 7 : 11,555
డిసెంబర్‌ 8 : 12,479