పుట్టుకతో లోపం.. చిన్నారులకు శాపం

చిన్నారుల్లో కొందరు పు ట్టుకతోనే వైకల్యం బారినపడుతున్నారు. విద్యాశాఖ లెక్కల ప్రకారం ఇలాంటి పిల్లలు రాష్ట్రంలో 18,769 మంది ఉన్నారు.

• రాష్ట్రంలో 18,769 మంది పిల్లల్లో వైకల్యం
• పలు రకాల వైకల్యాల బారిన పడుతున్న చిన్నారులు

హైదరాబాద్‌, అక్టోబర్‌ 5 (నమస్తే తెలంగాణ) : చిన్నారుల్లో కొందరు పు ట్టుకతోనే వైకల్యం (Disabled) బారినపడుతున్నారు. విద్యాశాఖ లెక్కల ప్రకారం ఇలాంటి పిల్లలు రాష్ట్రంలో 18,769 మంది ఉన్నారు. వీరిలో 11, 921(63%) బా లికలే ఉన్నారు. ఏకంగా 5,359 మంది మేధోవైకల్యంతో బాధపడుతున్నారు. 2,452 మంది అంధత్వ సమస్య ఎదుర్కొంటున్నారు. 665 మందిని కంటిచూపు సమస్య పట్టిపీడిస్తున్నది. 2,452 మంది వినికిడి, అంధత్వ సమస్య ఎదుర్కొంటున్నారు. సమగ్ర శిక్ష ప్రాజెక్ట్‌ ద్వారా నిర్వహిస్తున్న భవిత సెంటర్లు వీరిని అక్కున చేర్చుకుంటున్నాయి.

వివరాలిలా(2024-25లో)

• రాష్ట్రంలో పూర్తిగా అంధులైన చిన్నారులు 434 మంది ఉన్నారు. 1,673 మంది కంటిచూపు సమస్యతో బాధపడుతున్నారు.
• వినికిడి సమస్యతో బాధపడుతున్న చిన్నారులు 1,744మంది ఉన్నారు.
• మూగ, భాషాసంబంధ వైకల్యం గల వారి సంఖ్య 1,732 మందిగా ఉన్నది. లోకోమెటార్‌ (మస్తిష్క పక్షవాతం, కండరాల బలహీనత, వెన్నుపూస గాయాలు) వైకల్యం గల వారు 1,651 మంది ఉన్నారు.
• మానసిక వికలాంగులు 727 మంది ఉండగా, అభ్యసన వైకల్యం గలవారు 1,463 మంది ఉన్నారు.
• సెరిబ్రల్‌ప్లాసీతో బాధపడుతున్న వారు 1,135 మంది ఉండగా, 9 మంది యాసిడ్‌ బాధితులున్నారు.
• అంధత్వం, వినికిడి సమస్యతో బాధపడుతున్నవారు 1,650 మంది ఉన్నారు.
• 22 మంది చిన్నారులు కుష్టువ్యాధి (లెప్రసీ) బారిన పడగా, వీరంతా క్రమంగా కోలుకున్నారు.
• 134 మంది మరుగుజ్జులు ఉండగా, 11 మంది పార్కిన్‌సన్‌ సమస్యతో బాధపడుతున్నారు.
• మేధో వైకల్యం (ఇంటలెక్చువల్‌ డిసెబిలిటీ) గలవారు 5,359 మంది ఉన్నారు. అత్యధికంగా ఈ వైకల్యం గల వారే ఉండటం గమనార్హం.
• 197 మంది చిన్నారులు మస్క్యులర్‌ డిస్ట్రఫీతో బాధపడుతున్నారు. 99 మంది నరాల క్షీణత సమస్యతో బాధపడుతున్నారు.
• మరో 66 మంది మల్టిపుల్‌ స్కెరొసిస్‌, 66 మంది తలసేమియా, 21 మంది హీమోఫిలియో సమస్యతో ఇబ్బందిపడుతున్నారు.