రైతు వేదికలు.. కర్షక దేవాలయాలు

• 

• వ్యవసాయ రంగంలో విప్లవాత్మక మార్పులకు శ్రీకారం
• రైతులను సంఘటితం చేసేందుకే రైతు వేదికలు
• స్వరాష్ట్రంలో వ్యవసాయ రంగంలో విప్లవాత్మక మార్పులు
• రైతులను సంఘటితం చేసేందుకే రైతు వేదికలు
• వ్యవసాయ శాఖమంత్రి నిరంజన్‌రెడ్డి
• మిర్యాలగూడ నియోజకవర్గవ్యాప్తంగా రైతు వేదికలు ప్రారంభం

రైతులను సంఘటితం చేసే రైతు వేదికలను ఆధునిక కర్షక దేవాలయాలుగా మార్చేందుకు ముఖ్యమంత్రి కేసీఆర్‌ కృషి చేస్తున్నారని రాష్ట్ర వ్యవసాయ శాఖ మంత్రి సింగిరెడ్డి నిరంజన్‌రెడ్డి అన్నారు. శనివారం మిర్యాలగూడ నియోజకవర్గవ్యాప్తంగా రైతు వేదికలు, పట్టణంలో భూసార పరీక్ష కేంద్రం భవనాన్ని ఎమ్మెల్యే భాస్కర్‌రావుతో కలిసి ప్రారంభించారు. అనంతరం మిర్యాలగూడ ఎంపీడీఓ కార్యాలయ ఆవరణలో రైతు సభలో మంత్రి మాట్లాడుతూ స్వరాష్ట్రంలో 24 గంటల ఉచిత విద్యుత్‌, సాగునీటి ప్రాజెక్టులతో సీఎం కేసీఆర్‌ వ్యవసాయ రంగం రూపురేఖలను మార్చారన్నారు. రైతు వేదికల నిర్మాణాల ద్వారా విప్లవాత్మక మార్పులకు శ్రీకారం చుట్టారని తెలిపారు.

• మిర్యాలగూడ, ఆగస్టు 7
  మిర్యాలగూడ/ దామరచర్ల/ వేములపల్లి, ఆగస్టు 7 : వ్యవసాయ రంగాన్ని అభివృద్ధి చేసేందుకు ముఖ్యమంత్రి కేసీఆర్‌ ప్రతిష్టాత్మకంగా చేపట్టిన రైతు వేదికలు.. కర్షక దేవాలయాలని రాష్ట్ర వ్యవసాయశాఖ మంత్రి సింగిరెడ్డి నిరంజన్‌రెడ్డి అన్నారు. శనివారం మిర్యాలగూడ నియోజకవర్గంలో వేములపల్లి మండల కేంద్రం, శెట్టిపాలెం, మిర్యాలగూడ మండలం తుంగపాడ్‌, దామరచర్ల మండల కేంద్రం, కొండ్రపోలు, మిర్యాలగూడ పట్టణంలో రైతు వేదికలు, వేములపల్లిలో రూ.3 కోట్ల 50లక్షలతో కస్తూర్బా పాఠశాల భవన నిర్మాణానికి శంకుస్థాపన, పట్టణంలో భూసారపరీక్ష కేంద్రం కొత్త భవనాన్ని ఆయన ప్రారంభించారు. అనంతరం మిర్యాలగూడ ఎంపీడీఓ కార్యాలయ ఆవరణలో జరిగిన రైతు సభలో మంత్రి మాట్లాడారు. నీటి వనరులు లేనికాలంలోనే మిర్యాలగూడ ప్రాంతంలో సన్నబియ్యం పండించి ఇతర ప్రాంతాలకు ఎగుమతి చేసిన ఘనత ఉందన్నారు. ఒకప్పుడు బోరులో నీళ్లు వస్తే విచిత్రంగా చూసేవాళ్లం.. నేడు సీఎం కేసీఆర్‌ కృషి వల్ల చెరువులుల పునరుద్ధరణ, ప్రాజెక్టుల నిర్మాణంతో మోటరు బిగించక మునుపే భూగర్భ జలాలు పైకి ఉబికి వస్తున్నాయని అన్నారు. వ్యవసాయరంగ అభివృద్ధి కోసం అనేక రాష్ట్రాలు, దేశాలు తిరిగి అధ్యయనం చేశామని, దేశంలో ఎక్కడా రైతువేదికలు లేవని పేర్కొన్నారు. రైతువేదికల ద్వారా విప్లవాత్మక మార్పులు వస్తాయని తెలిపారు. తెలంగాణ వచ్చిన తర్వాత వ్యవసాయరంగ రూపురేఖలే మారాయని వివరించారు. సీఎం కేసీఆర్‌ ఏ విషయం మీద చర్చ పెట్టినా, విధాన పరమైన నిర్ణయాలు తీసుకోవాలన్నా ముందుగా గుర్తుకు వచ్చేది ఉమ్మడి నల్లగొండ జిల్లా మాత్రమేనని గుర్తుచేశారు. అందులో భాగంగానే జిల్లాలో ఉన్న ఫ్లోరైడ్‌ సమస్యను రూపుమాపేందుకు మిషన్‌ భగీరథకు శ్రీకారం చుట్టారన్నారు. రైతులను సంఘటితం చేయడంతోపాటు తమ పంటకు తామే ధర నిర్ణయించుకునే అధికారం ఉండాలనే సంకల్పంతో రైతువేదిక నిర్మాణానికి శ్రీకారం చుట్టినట్లు తెలిపారు. రైతుబంధు, రైతుబీమా పథకాల ద్వారా రైతులు దర్జాగా జీవిస్తున్నారన్నారు. ఎమ్మెల్యే భాస్కర్‌రావు మాట్లాడుతూ రైతులకు సూచనలు, శిక్షణ కోసం రైతువేదికలు ఉపయోగపడతాయన్నారు. మిర్యాలగూడ నియోజకవర్గంలో కొత్తగా 5లిఫ్ట్‌లు మంజూరయ్యాయని, సీఎం కేసీఆర్‌కు ఎప్పుడూ రుణపడి ఉంటామన్నారు. మార్కెట్‌ కమిటీ చైర్మన్‌ చింతరెడ్డి శ్రీనివాసరెడ్డి అధ్యక్షతన జరిగిన ఈ కార్యక్రమంలో కలెక్టర్‌ ప్రశాంత్‌ జీవన్‌పాటిల్‌, జేడీఏ శ్రీధర్‌రెడ్డి, ఏడీఏ నాగమణి, మాజీ ఎమ్మెల్యే తిప్పన విజయసింహారెడ్డి, మున్సిపల్‌ చైర్మన్‌ తిరునగర్‌ భార్గవ్‌, రైతుబంధు సమితి జిల్లా అధ్యక్షుడు రామచంద్రనాయక్‌, ఎంపీపీ నూకల సరళాహనుమంతరెడ్డి, మున్సిపల్‌ వైస్‌ చైర్మన్‌ కుర్ర విష్ణు, జడ్పీటీసీ ఇరుగు మంగమ్మ, జడ్పీ కో-ఆప్షన్‌ సభ్యుడు మోషీన్‌అలీ, నాయకులు కరుణాకర్‌రెడ్డి, నాగార్జునచారి, శ్రీనివాస్‌గౌడ్‌, చిర్ర మల్లయ్యయాదవ్‌, యాదగిరిరెడ్డి పాల్గొన్నారు. దామరచర్ల మండలంలో ఎంపీపీ నందిని, ఎంపీడీఓ జ్యోతిలక్ష్మి, జడ్పీటీసీ లలిత, ఏఎంసీ చైర్మన్‌ చింతరెడ్డి శ్రీనివాస్‌రెడ్డి, డీసీఎంఎస్‌ వైస్‌ చైర్మన్‌ నారాయణరెడ్డి, సర్పంచ్‌ బంటు కిరణ్‌, వీరకోటిరెడ్డి, ఎంపీటీసీలు సైదిరెడ్డి, బాల లక్ష్మి, లావూరి మేగ్యానాయక్‌, స్కైలాబ్‌నాయక్‌, సైదుల్‌రెడ్డి పాల్గొన్నారు. వేములపల్లి మండలంలో ఎంపీపీ పుట్టల సునీత, తాసీల్దార్‌ వెంకటేశం, ఎంపీడీఓ నిరంజన్‌, జడ్పీటీసీ ఇరుగు మంగమ్మ, సర్పంచులు చిర్రమల్లయ్య యాదవ్‌, నామిరెడ్డి కరుణాకర్‌రెడ్డి, పద్మ, వెంకట్‌రెడ్డి, ఏఓ రుషేంద్రమణి పాల్గొన్నారు.