లయబద్దంగా గుండె బతుకు
గీతాన్ని ఆలపిస్తున్నది.
జీవితపు నడవడికలో గతి
తప్పుతున్న అడుగులకు..
దిశానిర్దేశం చేస్తున్నది.
ఎంత గట్టిదో గుండె
ఈ ప్రపంచం పగపట్టిన పాములా మారి..
విషపు కోరలతో పాకుతూ కాటువేస్తున్నా..
గరళాన్ని ఎదలో దాచుకొని ఎదురీదుతున్నది.
కష్టాల తాకిడికి ముక్కలైన..
వెలుగు గాజుముక్కలను..
ఒక్కతాటికి చేర్చి అతికిస్తున్నది.
తాకిన గాయం తనువును తండ్లాట పెట్టిస్తున్నా
కణాలన్ని కదంతొక్కి రగిలిన గాయాన్ని..
మాన్పుతూ ముందుకు పొమ్మంటున్నవి.
మేఘాలన్నీ నల్లని ముసుగు ధరించి..
తెల్లని ఆకాశాన్ని కప్పేస్తున్నాయి.
మేఘం వర్షమై కురిసి..
రంగుల హరివిల్లును నింగిలో అలంకరించింది.
ఆటుపోట్ల అవరోధంలో ఎన్ని ఒడిదుడుకులో.
కాలం ప్రశ్నగామారి కవ్విస్తూనే ఉన్నది.
ఎదలో దాగిన సమాధానం మాత్రం నిదానంగా
జవాబు చెపుతూనే ఉన్నది.
బతుకు జవాబు పత్రంపై ..
ఆశల సిరాను నింపుకొని రాస్తూనే వున్నాను
వందకు తొంభై మార్కులు వస్తాయని ఆశ.
ముప్పైఐదు మార్కులకాడే కాలం ఆగిపొమ్మంటున్నది.
మదిలో ప్రయత్నపు ఇంకుచుక్కల..
నిధి నిండుకొని ఉన్నది.
రాస్తూనే ఉంటాను…విజయపు మెట్లు ఎక్కేవరకు.
పోరాడుతూనే ఉంటాను..
బానిస సంకెళ్ల్లను తెంచేవరకు.
బతుకు జవాబు పత్రంపై రాసిన అక్షరాలన్నీ..
రేపటి తరం తలరాతలు మార్చేలా.
అశోక్ గోనె: 94413 17361