పెసరట్టు పిండి ఢోక్లా.. ఫ్యూజన్‌ క్యుజిన్‌

పెసరట్టు పిండి ఢోక్లా తయారీ విధానం

కావలసిన పదార్థాలు:

పెసరట్టు పిండి: రెండు కప్పులు
అల్లం : చిన్న ముక్క
పచ్చిమిరపకాయలు: అయిదారు
పంచదార: 1 టేబుల్‌ స్పూన్‌
ఈనో ఫ్రూట్‌ సాల్ట్‌: 1 ప్యాకెట్‌
నూనె: 1 టేబుల్‌ స్పూన్‌
నువ్వులు: అర టేబుల్‌ స్పూన్‌
ఆవాలు: 1 టేబుల్‌ స్పూన్‌
కరివేపాకు: నాలుగు రెబ్బలు
ఉప్పు: రుచికి తగినంత

తయారీ విధానం:

ముందుగా అల్లాన్ని సన్నగా తురిమి పక్కకు పెట్టుకోవాలి. పచ్చిమిరప కాయల్ని పేస్ట్‌లా చేసుకోవాలి. వీటితోపాటు కొంచెం ఉప్పు, ఈనో సాల్ట్‌, పంచదారను పెసరట్టు పిండికి జోడించి బాగా కలపాలి. తర్వాత ఒక గిన్నెలో వేడినీళ్లు పోసుకుని ఆవిరి కుడుములు వేసినట్టు ఈ పిండితో కుడుములా వేయాలి. లేదా ఇడ్లీ ప్లేట్లకు కాస్త నెయ్యి రాసి ఈ పిండితో ఇడ్లీల్లా వేసుకోవాలి. తర్వాత వాటిని చిన్న చిన్న ముక్కలుగా కోయాలి. ఓ బాణలిలో కాస్త నూనె వేసి నువ్వులు, ఆవాలు, కరివేపాకు పోపు పెట్టి చిటపటలాడగానే అందులో ఈ ముక్కలు వేసి కలిపి పొయ్యి ఆపేయాలి. ఇంకేం, తెలుగు స్టయిల్లో గుజరాతీ వంటకం ఢోక్లా రెడీ!

– ఎం.బాలరాయుడు
పాకశాస్త్ర నిపుణురాలు