House Cleaning | ఇల్లు మన భారతీయులకు ఓ నీడ మాత్రమే కాదు. స్వర్గం తర్వాతి స్థానం. పూరిపాకల నుంచి అపార్టుమెంట్ల దాకా ఎన్ని మార్పులు వచ్చినా… ఇంటి మీద మన సెంటిమెంట్ మాత్రం మారలేదు. కానీ, ఆ ఇల్లు ‘ఎంత సురక్షితం?’. ఇది గట్టిగా కట్టుకున్న నాలుగు గోడల గురించి కాదు. సీసీ టీవీ, డోర్ కెమెరా లాంటి సాంకేతికత గురించీ కాదు. ఇంటి లోపల ఉన్న పరిస్థితుల గురించి! లోలోపల పెరుగుతున్న కాలుష్యం, ఇంట్లో వాడుతున్న రసాయనాలు, గోడలపై పేరుకుపోయే దుమ్ము, ఇండోర్ మొక్కలు… లాంటి ఎన్నో అంశాలు మన శారీరక, మానసిక ఆరోగ్యం మీద తీవ్రమైన ప్రభావం చూపించేవే. ఇవేవో భయపెట్టాలని చెప్పుకొంటున్న విషయాలు కాదు. కాస్త జాగ్రత్త తీసుకోమనే సూచన కోసమే!
కాలుష్యంలో అడుగుపెట్టాలంటే మాస్క్ పెట్టుకుంటాం, వీధిలో బోర్ వేస్తున్నారంటే.. ఆమడ దూరం నుంచి బండిని తిప్పుకొంటాం! ఎండపొడ తగలకుండా, వానకు తడవకుండా జాగ్రత్తలు తీసుకుంటాం. కానీ ఇంట్లో మనం ఎంతవరకు ఆరోగ్యం గురించి పట్టించుకుంటున్నాం? మార్పులకు, దిద్దుబాట్లకు, ప్రత్యామ్నాయాలకు అవకాశం ఉన్న చోట కూడా… అజాగ్రత్తగా ఉంటున్నామేమో!! ఇప్పుడు చెప్పుకోబోయే విషయాల్ని ఓసారి ఆలోచిస్తే మనం చేస్తున్న తప్పులు, వాటికి పరిష్కారాలు మనకే బోధపడతాయి.
ఇళ్లన్నాక దుమ్ము ఉండటం సహజమే. మరీ ముఖ్యంగా నగరవాసులు ఇంటి కిటికీ తెరిస్తే గాలి కన్నా ఎక్కువగా ధూళి చొరబడుతుంది. దారి వెంట లేచిన దుమ్ము, చుట్టుపక్కల నిర్మాణాల నుంచి రేణువులు ఇంట్లోకి రావడం, మూలమూలనా పేరుకుపోవడం అతి సాధారణం. పొరలు పొరలుగా పట్టుకున్న దుమ్మును ఏ పండుగకో, పబ్బానికో దులుపుకోవచ్చులే అనుకుంటే పొరపాటు. అంతేకాదు మన ఇంట్లోనూ చాలా రకాలైన రసాయనాలు వాడుతుంటాం. అవన్నీ కాలుష్య కారకాలే! దోమల్ని చంపే మందులు, నాన్స్టిక్ పాత్రల మీద కోటింగ్, షాంపూ, టాయిలెట్ క్లీనర్, మంటలు వ్యాపించకుండా వాడే పైపూతలు… అన్నీ కూడా రసాయనాలతో కూడుకున్నవే. వాటిలో ఎండోక్రైన్ డిజ్రప్టింగ్ కెమికల్స్ (ఈడీసీ) ఉంటాయి. ఇవి మన హార్మోన్లను దెబ్బతీయగలవు, వాటి పనితీరునూ మార్చేయగలవు. ఇవి శరీరంలోకి చేరడం వల్ల క్యాన్సర్ లాంటి తీవ్రమైన సమస్యలు రావొచ్చు. నరాల బలహీనతే కాకుండా ప్రవర్తనాపరమైన లోపాలు కూడా తలెత్తవచ్చు. పురుషులలో లైంగిక సమస్యలు, స్త్రీలలో అబార్షన్ లాంటి ప్రమాదాలకు దారితీయొచ్చు. మరీ ముఖ్యంగా, ఇవి మన ట్రైగ్లిజరైడ్స్ని ప్రభావితం చేస్తాయి. ఫలితంగా ఊబకాయం, మధుమేహం లాంటి సమస్యలు ఉత్పన్నం అవుతాయి. ఈ కెమికల్స్ ఇంట్లో దుమ్ముతో కలవడం, దాన్ని మనం పీలుస్తూ తాకుతూ తిరగడమే అసలు సమస్య.
ఈడీసీలతో ఉన్న సమస్యల గురించి శాస్త్రవేత్తలకు ఎప్పటినుంచో అనుమానాలు ఉన్నాయి. అయితే నిజంగా వాటి ప్రభావం ఏమిటో తేల్చేందుకు ‘అమెరికన్ కెమికల్ సొసైటీ’ కొన్ని ఇండ్లలోని దుమ్మును సేకరించింది. ఆ దుమ్ములో ఈడీసీలు ఏ స్థాయిలో ఉన్నాయని పరిశీలించారు. ఆశ్చర్యంగా చాలా ఇళ్లలో కనిపించిన ధూళికణాలు మన ఒంట్లోని చెడు కొవ్వును ప్రభావితం చేస్తున్నట్టు తేలింది. ఫలితంగా ట్రైగ్లిజరైడ్స్ పెరుగుతున్నాయనీ… అవి మధుమేహం, ఊబకాయాలకు దారితీస్తున్నాయనీ అంచనాకు వచ్చారు. ఇంట్లో దుమ్ము పేరుకుంటే మనం లావైపోతామనే పరిశీలన చిత్రంగా ఉంది కదా. కానీ, ఇది నిజమే కాబట్టి… ఇంటిని ఎప్పటికప్పుడు శుభ్రంగా ఉంచుకోవాలి. టాయిలెట్ క్లీనర్ల విషయంలో చౌకగా వస్తున్నాయనో, ఆఫర్లలో దొరుకుతున్నాయనో మోజు పడితే ఆరోగ్యం గాడి తప్పినట్టే! ఇంట్లోని దుమ్ములోకి వచ్చి చేరే ఈడీసీలు చాలా తేలికగా మన ఊపిరితిత్తుల్లోకి ప్రవేశించే అవకాశం ఉంది.
ఇంట్లో ఓ అక్వేరియం ఉండటం మంచిదే. అది మానసిక ఆరోగ్యం మీద సానుకూలమైన ప్రభావం చూపిస్తుందన్నది నిపుణుల మాట. పాశ్చాత్య వాస్తు శాస్ర్తాలు కూడా అక్వేరియం ఏ గదిలో, ఏ మూలకు ఉంచితే ఎలాంటి ఫలితాలు వస్తాయో చెబుతుంటాయి. ఇంట్లో ఉండే చేపల తొట్టి వల్ల గదిలో తేమ శాతం మెరుగ్గా ఉంటుందనీ అంటారు. కానీ, వెలుతురు, వేడి తక్కువగా ఉండే చోట అక్వేరియం పెట్టడం వల్ల సమస్యలు రావచ్చు. ఇలాంటి చోట నాచు ఎక్కువగా, త్వరగా పేరుకునే అవకాశం ఉంటుంది. సున్నితంగా ఉండే ఇప్పటి తరానికి, మరీ ముఖ్యంగా ఆస్తమా లాంటి సమస్యలు ఉన్నవారికి ఇదేమంత సానుకూలం కాదు. పైగా చాలామంది అక్వేరియంలో మొక్కల్లాంటివి పెట్టరు. దాంతో చేపల నుంచి వెలువడే కార్బన్ డయాక్సయిడ్ కూడా పెరిగిపోవచ్చు. ఇలాంటి కారణాలన్నీ చెప్పుకొంటూ భయపడే కంటే… చేపలు కూడా జాగ్రత్తగా సంరక్షించాల్సిన జీవులన్న విషయాన్ని గ్రహిస్తే చాలు. నీరు, మేత, వెలుతురు, వేడి… అన్నీ గమనించుకుంటూ ఉండాల్సిందే. చాలామందికి ఈ అక్వేరియంని పడకగదిలో పెట్టుకోవడం అలవాటు. దాని నుంచి వచ్చే శబ్దం, వెలుతురు గాఢనిద్రను దెబ్బతీస్తాయన్నది మరో సూచన.
భూమ్మీద ఏటా 30 కోట్ల టన్నుల ప్లాస్టిక్ ఉత్పత్తి అయితే, అందులో సగం వ్యర్థంగా మారుతున్నదని వరల్డ్ ఎకనామిక్ ఫారం పేర్కొన్నది. ఇలా వ్యర్థంలోకి చేరుకున్న ప్లాస్టిక్లో కేవలం 9 శాతం మాత్రమే రీసైకిల్ అవుతుందనీ… మిగతా 91 శాతం చెత్తగానే పడి ఉంటుందనీ పర్యావరణవేత్తల మాట. ఇలా మిగిలిన ప్లాస్టిక్ నీటిలో కరగదనీ, నేలలో కలవదనీ… వందల ఏళ్లుగా కాస్తకాస్తగా ఎండుతూ పర్యావరణంలో స్లోపాయిజన్లా మారుతుందనీ ఇప్పుడు ఎవరిని అడిగినా చెబుతారు. కానీ, మన ఇంట్లో ఉండే ప్లాస్టిక్ నేరుగా మనకు కీడు చేస్తుంది. కంటికి కనపడనంత చిన్న ముక్కలుగా విడిపోయే ప్లాస్టిక్ శకలాలను మైక్రో ప్లాస్టిక్స్ అంటారు. ఇవి అయిదు మిల్లీమీటర్ల కంటే తక్కువ పరిమాణంతో ఉంటాయి. మనం పీల్చే గాలి, తాగే నీరు, తినే ఆహారంలోనూ వీటి అవశేషాలు ఉంటున్నాయి. నేరుగా మన శరీరంలోకి ప్రవేశించే ఈ మైక్రో ప్లాస్టిక్ పదార్థాల వల్ల కొంత హాని ఉండితీరుతుందనే చెబుతున్నారు. రోగనిరోధక శక్తి తగ్గడం నుంచి జన్యువుల తీరు మారిపోవడం వరకు ఎన్నో ప్రమాదాలు ఉంటాయని అంచనా వేస్తున్నారు. ఇంతకీ మన ఇంట్లో వీటి ఉనికి గురించి చెప్పలేదు కదా!
ఒక్కసారి తల పైకెత్తి మన చుట్టూ ఉన్న వస్తువులను గమనిస్తే లెక్కలేనన్ని ప్లాస్టిక్ పదార్థాలు కనిపిస్తాయి. వాటిని వాడేటప్పుడు జరిగే రాపిడిలో మైక్రో ప్లాస్టిక్ విడుదల అవుతుంది. ఓసారి కూరలు తరిగే ప్లాస్టిక్ బోర్డును చూడండి. దాని మీద చెప్పలేనన్ని గీతలు కనిపిస్తాయి. కొంత ప్లాస్టిక్ రేగి కనిపిస్తుంది. అది ఎక్కడికి వెళ్లినట్టు? కేవలం ఈ కటింగ్ బోర్డుల వల్లే ఏటా కోట్లాది మైక్రో ప్లాస్టిక్ శకలాలు విడుదల అవుతున్నట్టు ఓ పరిశోధన హెచ్చరించింది. ఇక ఇంట్లో వాడే ఆటవస్తువులు, కవర్లు, డబ్బాల సంగతి చెప్పేదేముంది! ఉదాహరణకు ఇప్పుడు చాలామంది అలవాటు చేసుకుంటున్న బాడీ స్క్రబ్ వల్ల లక్ష మైక్రో ప్లాస్టిక్ కణాలు వెలువడతాయని ఓ అంచనా! ఆఖరికి టీబ్యాగ్ని వేడివేడి నీటిలో ముంచినప్పుడు కూడా దాన్నుంచి వందలాది మైక్రో ప్లాస్టిక్ పదార్థాలు నేరుగా డికాక్షన్లోకి చేరతాయి. ఇక్కడ మనం ధరించే దుస్తుల గురించి కూడా ఓసారి చెప్పుకోవాలి. మనం వాడే నైలాన్, పాలిస్టర్, రేయాన్, ఆక్రిలిక్ వంటి వస్ర్తాలన్నీ కృత్రిమ రసాయనాలతో రూపొందించినవే (సింథటిక్). వీటిని ఉపయోగించిన, ఉతికిన ప్రతిసారీ వాటి నుంచి అవశేషాలు కొద్దికొద్దిగా గాల్లో కలుస్తుంటాయి. బాధాకరమైన విషయం ఏమిటంటే ఇంట్లోని ప్లాస్టిక్ ఉత్పత్తుల వల్ల ఎక్కువగా నష్టపోయేది పిల్లలే. ఏది చేతికి అందినా నోట్లో పెట్టుకునే అలవాటు ఉన్న పిల్లలు… ప్లాస్టిక్ బొమ్మలనీ కొరికేస్తుంటారు. మనం వాటి ఖరీదు గమనించుకుని ఫర్వాలేదులే అనుకుంటాం కానీ… నోట్లోకి వెళ్తున్న ప్లాస్టిక్ గురించి ఆలోచించం. బయట నుంచి ఏమన్నా తెచ్చుకునేటప్పుడు చేతి సంచీలను వాడటం మంచిది. ఒకవేళ ప్లాస్టిక్ బ్యాగులు, కవర్లలో తెచ్చినా.. వాటిని తిరిగి ఉపయోగించకుండా రీసైకిల్డ్ చెత్తలో పడేయడం తప్పనిసరి. అలాగే ప్లాస్టిక్ ప్లేట్లు, సీసాల స్థానంలో స్టీలు, గాజు వస్తువులు ఉపయోగించడం అసాధ్యమేమీ కాదు కదా!
ధూమపానం చేసేవారి గురించి మనం చెప్పుకోవడం లేదు. వాళ్లుండే ఇంటి గురించే మాట్లాడుకుందాం. చాలామందికి ఇంట్లో సిగరెట్ తాగడం మానలేని అలవాటు. ఆఫీసుల్లో, బయటా తాగే వెసులుబాటు లేనివారికి ఇల్లే ధూమసీమ. కానీ, ఆ సిగరెట్ పొగ ఇంట్లో అణువణువునా పేరుకుపోతుంది. సిగరెట్ పొగ నుంచి నికొటిన్, టార్, అమోనియా, ఆర్సెనిక్, కార్బన్ మోనాక్సయిడ్.. లాంటి సవాలక్ష రసాయనాలు వెలువడతాయి. ఇంట్లో గాలి అక్కడక్కడే ఉంటుంది కాబట్టి, ఈ రసాయనాలన్నీ సోఫాల నుంచి దుస్తుల వరకూ పేరుకుంటాయి. ఇంట్లో వాళ్లకు అవి విషమే. నేరుగా ధూమపానం చేస్తే ఎంత ప్రమాదమో, దాన్ని పీల్చేవారికి అంతే సమస్య. అందుకే ప్రపంచవ్యాప్తంగా ఈ పాసివ్ స్మోకింగ్ వల్ల ఏటా 13 లక్షల మంది చనిపోతున్నారని ప్రపంచ ఆరోగ్య సంస్థ అంచనా. ఇక ఇంట్లో పిల్లలు, గర్భిణులు ఉంటే వారిని పొగ మరింత వేధిస్తుంది. పిల్లల ఊపిరితిత్తులు బలహీనంగా ఉంటాయి. కడుపులో బిడ్డ ఉన్నవారు పొగ పీలిస్తే గర్భస్రావం జరగడం, ఎదిగీ ఎదగని పిల్లలు పుట్టడం లాంటివి జరగొచ్చు. ఇక ఆస్తమా, బ్రాంకైటిస్ లాంటి సమస్యలు ఉన్నవారింట్లోనే పొగబండి నడుస్తుంటే… ఆ బాధ వర్ణనాతీతం. కాబట్టి ధూమపానం చేసే అలవాటు ఉంటే, ఇంట్లో మాత్రం ఆ పని చేయకండి. ఒకవేళ ఎవరన్నా అతిథుల నుంచి తరచూ ఆ సమస్య వస్తే ఇంట్లో ఒక ‘నో స్మోకింగ్’ బోర్డ్ పెట్టి పరోక్షంగా సూచించండి. అప్పటికీ వినకపోతే, నేరుగా చెప్పడంలో ఏమాత్రం తప్పులేదు.
అపార్ట్మెంట్ సంస్కృతి పెరిగాక ఇండోర్ ప్లాంట్స్ పెంపకం పెరిగిపోయింది. పెరట్లో ఎలాగూ మొక్కలు పెంచలేనివాళ్లు, నాలుగుగోడల మధ్య చిన్నపాటి మొక్కను చూసి తృప్తి పడుతున్నారు. చాలా సందర్భాల్లో ఇంట్లో ఎక్కువ గాలి, వెలుతురు, నీరు లేకుండా పెరిగేస్తాయి కదా అన్న ఉద్దేశంతోనే ఇండోర్ మొక్కలను ఎంపిక చేసుకోవడం కనిపిస్తుంది. చూసేందుకు నదురుగా, వీలైతే నాలుగు పూలు పూసేలా మొక్కల్ని ఎంచుకుంటున్నారు. కానీ కొన్ని ఇండోర్ మొక్కలు మనుషులకు, పెంపుడు జంతువులకు అలర్జీ కలిగించవచ్చు. తీగలా సాగే ఇంగ్లిష్ ఐవి, తెల్లటి పూలు పూసే ఈస్టర్ లిల్లీ, అందంగా ఉండే డఫోడిల్స్, ఈత మొక్కను తలపించే సాగో పామ్… లాంటి మొక్కలన్నీ కూడా కాస్త జాగ్రత్తగా ఎంపిక చేసుకోవాల్సినవే!
ఇంట్లో కాలుష్యం గురించి ఎంత చెప్పుకొన్నా కాలంతో పాటు వచ్చిన మార్పుల వల్ల, మనం కొంత ప్రమాదకరమైన వాతావరణంలో ఉన్నామన్న విషయాన్ని కొట్టి పారేయలేం. బాధపడి ఉపయోగం లేదు. పూర్తిగా తప్పించుకునే అవకాశమూ లేదు. తగిన జాగ్రత్తలు తీసుకోవడమే తరుణోపాయం!
కిటికీలున్నది తీయడానికే: అక్కడక్కడే గాలిలో తేలే ధూళి కణాలను పార్టిక్యులేట్స్ అంటారు. ఎగ్జాస్ట్ ఫ్యాన్లు వాడటం, కిటికీలు తీసి ఉంచడం వల్ల వీటిని పారదోలవచ్చు. తాజా గాలి వీచే అవకాశమూ ఉంటుంది.
పెంపుడు జీవులు: ఇంట్లో తిరిగే పెంపుడు జంతువులు కూడా రకరకాల రోగాలను వ్యాప్తి చేస్తాయి. రసాయనాలకు ప్రభావితం అవుతుంటాయి. వాటిని శుభ్రం చేయాల్సిన పని ప్రతి వారం పెట్టుకోవాల్సిందే
మార్చాల్సిందే: ఏసీ ఫిల్టర్లు, వంటగదిలో మసిగుడ్డలు, డోర్ మ్యాట్లు… లాంటివి ఎప్పటికప్పుడు మారిస్తే మంచిది.
వాసన ఓ హెచ్చరిక: ఇంట్లో ఏదో ఒక మూల దుర్వాసన వస్తున్నదీ అంటే, దానికి ఎయిర్ ఫ్రెష్నర్ కొట్టడం పరిష్కారం కాదు. ఫలితంగా అక్కడి బ్యాక్టీరియా తొలగకపోగా, ఎయిర్ ఫ్రెష్నర్లో ఉండే ఘాటైన రసాయనాలు మరింత కీడు చేస్తాయి. పరిశుభ్రతే పరిష్కారం!
అవి సూక్ష్మక్రిముల బ్యాంకులు: అవసరం లేని కార్పెట్లు, ఆర్భాటంగా ఉండే కుషన్ సీట్లు, ఎడాపెడా కొనేసే టెడ్డీ బేర్లు… ఇలా దుమ్ము పీల్చుకునే ఉత్పత్తులను వీలైనంత నియంత్రించడం మేలు.
ఆయుర్వేదంతో మోసపోవద్దు: ఆయుర్వేదం, నేచురల్ లాంటి పదాలతో మోసపోవద్దు. వాటి విశ్వసనీయతను గమనించండి. చాలాసందర్భాల్లో ఇలాంటి మాటలు మోసపూరిత ప్రయోజనాల కోసం వాడవచ్చు.
లక్షణాలను అశ్రద్ధ చేయవద్దు: కుటుంబసభ్యుల్లో తరచూ జలుబు, దగ్గు, దద్దుర్లు, మైకం, ఎగశ్వాస, వాంతులు… లాంటి లక్షణాలు తరచూ కనిపిస్తుంటే.. ఇంట్లో ఉన్న వాతావరణం మీద దృష్టి పెట్టండి.
ఎక్స్పైరీ: మసిగుడ్డలు, టూత్ బ్రష్లు, దిండు గలీబులు, బాత్రూం చీపుళ్లు… వీటికీ ఓ ఎక్స్పైరీ డేట్ ఉంటుంది. ఏళ్ల తరబడి వాటినే వాడితే.. క్రిముల్ని పెంచుకున్నట్టే.
ఇల్లే సర్వస్వం కాదు: ఇంటి మీద ఎంత మమకారం ఉన్నా… నిరంతరం ఆ నాలుగు గోడల మధ్యే ఉండిపోతే క్రిములతో పాటు మగ్గిపోవాల్సిందే. మరీ ముఖ్యంగా గృహిణులు, వర్క్ ఫ్రమ్ హోమ్ చేసేవారు రోజులో కాసేపైనా బయటికి రావాలి. కాస్త తాజా గాలి పీల్చుకునే ప్రయత్నం చేయాలి.
ఆరోగ్యపు అలవాట్లు: వ్యాయామం, నడక, ధ్యానంతోపాటు తాజా కూరగాయలు, పండ్లు తీసుకోవడం… లాంటివన్నీ మన రోగనిరోధకశక్తిని పెంచుతాయి. తప్పనిసరిగా వాడుతున్న రసాయనాల దుష్ప్రభావాలను దూరం చేస్తాయి.
ఇప్పుడు ఏ ఇంట్లో చూసినా గ్యాస్ సిలిండరే అని మురిసిపోతున్నాం కదా. కట్టెల పొయ్యి ఒకప్పటి పీడకల అని మర్చిపోయే ప్రయత్నం చేస్తున్నాం కదా. కానీ ఇప్పటికీ ప్రపంచంలో 230 కోట్ల మంది నివసించే ఇళ్లలో కట్టెలు, పిడకలు లాంటి పొగచూరే పొయ్యి మీద నుంచే వంట జరుగుతోంది. ఇంట్లో చూరే ఈ పొగతో గుండెజబ్బులు, పక్షవాతం, లంగ్ క్యాన్సర్, ఊపిరితిత్తులు దెబ్బతినడం లాంటి ప్రాణాంతక సమస్యలు వస్తున్నాయి. వీటివల్ల ఏటా 30 లక్షలకు పైగా మరణాలు సంభవిస్తున్నాయని ప్రపంచ ఆరోగ్య సంస్థ లెక్క.
ఉదయం లేవగానే టూత్పేస్ట్, తర్వాత సబ్బుతోపాటు షాంపు, బాత్రూంని శుభ్రం చేసేందుకు క్లీనర్… ఇలా మన దినచర్యలో అణువణువునా ఏదో ఒక రసాయనాన్ని వాడుతూనే ఉంటాం. వీటిలో కొన్నింటి వల్ల నష్టం లేకపోవచ్చు. మరికొన్నింటిని మోతాదులో వాడితే ఇబ్బంది రాకపోవచ్చు. కానీ కొన్ని రసాయనాలు మాత్రం సమస్య కలిగిస్తాయి. వాటిలో కొన్ని…
బస్ఫీనల్: ప్లాస్టిక్ గట్టిగా, పారదర్శకంగా ఉండేందుకు వాడే ఈ కెమికల్ వల్ల ఊబకాయం నుంచి సంతానలేమి వరకు చాలా సమస్యలు వస్తాయి.
ఫార్మాల్డిహైడ్: కొత్త పరుపు కొనగానే వచ్చే వాసన గుర్తుందా. కొన్ని దుస్తుల నుంచి కూడా ఇదే వాసన వస్తుంది. దీనికి కారణం ఈ రసాయనమే. క్రిమిసంహారిణిగా వాడే ఈ ఫార్మాల్డిహైడ్ చర్మం నుంచి జీర్ణవ్యవస్థ వరకూ దుష్ప్రభావం చూపగలదు.
లెడ్: పెయింట్ల నుంచి మేకప్ సామాగ్రి వరకు ఇంట్లో వాడే చాలా ఉత్పత్తుల్లో సీసం పాత్ర కనిపిస్తుంది. ఇది నాడీవ్యవస్థ మీద చాలా ప్రభావం చూపుతుంది.
పీబీడీఈ: మంటలు అంటుకోకుండా వాడే ఈ రసాయనాన్ని ఫర్నిచర్, కార్పెట్, నిర్మాణ సామాగ్రి లాంటి వాటిలో విస్తృతంగా వినియోగిస్తారు. ఈ కెమికల్ క్యాన్సర్, థైరాయిడ్ లాంటి సమస్యల్ని కలిగిస్తుంది.
పారాబెన్స్: పేస్ట్, షాంపు, కోల్డ్ క్రీమ్… ఇలా ఎన్నో సౌందర్య సాధనాల్లో విచ్చలవిడిగా వాడే పదార్థమిది. అవి నిల్వ ఉండేందుకు పారాబెన్స్ జోడిస్తారు. ఇవి క్యాన్సర్ కారకాలని ఏనాడో గుర్తించారు.
ఇవే కాదు. తడి అంటుకోకుండా వాడే PFA రసాయనాలు, వేడిని తట్టుకునేందుకు వాడే PFC రసాయనాలు మన చుట్టూనే ఉన్నాయి. ఒక్క బాత్రూం క్లీనర్ మీద ఉన్న స్టికర్ని పరిశీలిస్తే హైడ్రోక్లోరిక్ ఆసిడ్, సోడియం లారేట్ సల్ఫేట్ లాంటి ఎన్నో హానికారక రసాయనాలు ఉండటాన్ని గమనించవచ్చు. మనం వాడే ప్రతి ఉత్పత్తినీ శల్యపరీక్ష చేయడం సాధ్యం కాకపోవచ్చు. కానీ కొంతమేరకు అవగాహన పెంచుకోవడంలో తప్పులేదు. కాస్మెటిక్స్ వాడకాన్ని తగ్గించడం, పేస్టు లాంటి ఉత్పత్తులకు సంప్రదాయ పదార్థాలను వాడటం, బాత్రూం క్లీనర్స్ లాంటివి మోతాదులో ఉపయోగించడం మన చేతుల్లోనే ఉంది. కృత్రిమం, రసాయనాలతో చేసింది అని అనుమానం వచ్చినప్పుడు ఆ ఉత్పత్తికి దూరంగా ఉండటమే మేలు. చైనా బజార్లో అగ్గువకు దొరుకుతున్నాయి కదా అని బ్యాటరీలు, బొమ్మలు, కాస్మెటిక్స్, ప్లాస్టిక్… తెచ్చేసుకుంటే ఫలితం బాధాకరంగా ఉంటుంది.