పుస్తక సమీక్ష – మధ్యతరగతి జీవితాలు

మనుషులు ఒకరితో ఒకరు, ఆ ఒక్కరు మరొకరితో పరిచయమవుతూ, ఒకరికొకరు సాయం చేసుకోవడం ‘రిలేషనల్‌ నెట్‌వర్క్‌'. ఈ సంబంధాన్ని ఒక చిత్రంలో చూపిస్తే అది శాఖోపశాఖలుగా విస్తరించిన చెట్టులా ఉంటుంది.

January 29, 2023 / 03:30 AM IST

మనుషులు ఒకరితో ఒకరు, ఆ ఒక్కరు మరొకరితో పరిచయమవుతూ, ఒకరికొకరు సాయం చేసుకోవడం ‘రిలేషనల్‌ నెట్‌వర్క్‌’. ఈ సంబంధాన్ని ఒక చిత్రంలో చూపిస్తే అది శాఖోపశాఖలుగా విస్తరించిన చెట్టులా ఉంటుంది. ఇలా సాయం చేసుకునే తత్వం తరాలపాటు అలాగే కొనసాగితే భూమ్మీద ఎప్పటికీ మంచే నిలిచి ఉంటుంది. ఈ సూత్రం నేపథ్యంగా ఉమా మహేష్‌ ఆచాళ్ళ ‘సంఘే శక్తి కలియుగే’ పేరుతో కథ రాశారు. సంపుటిలోని 21 కథల్లో 15వ కథ పేరును పుస్తక శీర్షికగా ఎంచుకున్నారు. ఇందులో మొదటి కథ ‘తిరగబడ్డ చేప’ వ్యవసాయాన్ని నమ్ముకుని తండ్రి, చేపల చెరువును నమ్ముకుని కొడుకు దగాపడ్డ వైనాన్ని చిత్రీకరిస్తుంది. సంతానం లేని అక్క తమ్ముడిని దత్తత తీసుకుని, అమ్మ తర్వాత అమ్మంతటిది అక్కే అని చాటుతుంది ‘అక్క బంగారం’. చాడీల కారణంగా ప్రాణమిత్రుల మధ్య పొరపొచ్చాలు ఎలా వస్తాయో, వాటి పర్యవసానం ఎలా ఉంటుందో ‘అడ్డుగోడ’ వెల్లడిస్తుంది. కలిసుండటం తెలియక విడిపోయేవాళ్లు విడిపోవటం తెలియక కలిసుండేవాళ్ల మనస్తత్వాన్ని ‘ఒక రాత్రి’ విడమరుస్తుంది. పనిమనుషులతో యజమానురాళ్ల ప్రవర్తనలో వైరుధ్యాలను కండ్లకు కట్టే కథలు ‘బొంకవచ్చు నఘము పొందధిప’, ‘ఆదివారం అనుబంధం’. ఇలా ఈ సంకలనంలోని ప్రతి కథా మంచి కథనంతో విసుగు లేకుండా చదివిస్తుంది. ఉమా మహేష్‌ ‘సంఘే శక్తి కలియుగే’లోని కథలన్నీ విశాఖపట్నం నగరం, దాని పరిసర ప్రాంతాల నేపథ్యంతో సాగినా తెలుగు ఇండ్ల చుట్టూ ఉండే మధ్యతరగతి, పేదల జీవితాల చిత్రణతో సాగిపోతాయి. అంతర్లీనంగా మంచిని పెంచాలనే సందేశాన్ని ఇస్తాయి.