సరదాకు సరదా.. వ్యాయామానికి వ్యాయామం నార్డిక్ వాకింగ్‌

నార్డిక్‌ ప్రాంతం భూగోళంపై ఐరోపా ఖండం ఉత్తర ప్రాంతంలో, ఉత్తర ధ్రువానికి దగ్గరగా ఉంటుంది. ఎక్కడ చూసినా మంచుతో కప్పేసిన పర్వతాలు, ఆకుపచ్చటి మైదానాలు కనువిందు చేస్తుంటాయి. అంతటి అందమైన ప్రాంతంలో పురుడు పోసుకున్న వ్యాయామ ప్రక్రియ నార్డిక్‌ వాకింగ్‌. సాధారణ నడకతో పోలిస్తే ఈ తరహా వాకింగ్‌ మన శరీరంలో క్యాలరీలను ఎక్కువగా కరిగిస్తుంది.

• ఇన్ఫోగ్రాఫిక్‌

నార్డిక్‌ ప్రాంతం భూగోళంపై ఐరోపా ఖండం ఉత్తర ప్రాంతంలో, ఉత్తర ధ్రువానికి దగ్గరగా ఉంటుంది. ఎక్కడ చూసినా మంచుతో కప్పేసిన పర్వతాలు, ఆకుపచ్చటి మైదానాలు కనువిందు చేస్తుంటాయి. అంతటి అందమైన ప్రాంతంలో పురుడు పోసుకున్న వ్యాయామ ప్రక్రియ నార్డిక్‌ వాకింగ్‌. సాధారణ నడకతో పోలిస్తే ఈ తరహా వాకింగ్‌ మన శరీరంలో క్యాలరీలను ఎక్కువగా కరిగిస్తుంది. అంతే కాదు రెండు అరచేతులతో కర్రలను కదుపుతూ సాగే నార్డిక్‌ వాక్‌ సరదాగా ఉంటుంది.

నార్డిక్‌ వాకింగ్‌ 1960లలో అభివృద్ధి చెందింది. ఫిన్‌లాండ్‌లో స్కీయింగ్‌ చేసేవాళ్లకు వేసవి వ్యాయామ శిక్షణ కింద దీన్ని ప్రవేశపెట్టారు. ఇందులో ప్రత్యేకంగా రూపొందించిన రెండు కర్రల ఊతంగా నడక సాగిస్తారు. ఈ కర్రలను రెండు చేతుల్లో పట్టీలకు బిగించుకుని అరచేతులతో నేలపై కదుపుతూ నడవడం ప్రధానంగా ఉంటుంది. వ్యాయామ విద్యలో భాగంగా దీన్ని 1966లో సామాన్య ప్రజలకూ అందుబాటులోకి తీసుకువచ్చారు. ఇది కీళ్ల మీద ఒత్తిడిని తగ్గిస్తూ చేతులు, భుజాలు, ఛాతీ, శరీర మధ్యభాగానికి పనిచెపుతుంది.

ఎన్నో ప్రయోజనాలు

• సాధారణ వాకింగ్‌తో పోలిస్తే నార్డిక్‌ వాకింగ్‌తో 67 శాతం ఎక్కువ క్యాలరీలు కరిగిపోతాయని అధ్యయనాలు వెల్లడిస్తున్నాయి. పైగా ఇందులో ప్రతీ ప్రధాన కండర సముదాయం పనిచేస్తుంది.
• యూనివర్సిటీ ఆఫ్‌ వెరోనా అధ్యయనంలో 6 నెలలపాటు నార్డిక్‌ వాకింగ్‌ చేసిన 38 మందిని ప్రశ్నించారు. వీరు 50 70 సంవత్సరాల మధ్య వయసువారు. వీళ్లంతా ఉండాల్సిన దానికంటే ఎక్కువ బరువు, ఊబకాయం కలిగి ఉన్నారు.
• వీరిలో 6 నెలల్లో నార్డిక్‌ వాకింగ్‌, సాధారణ వాకింగ్‌ వర్గాలు ఇద్దరిలోనూ బాడీ మాస్‌ ఇండెక్స్‌ తగ్గిపోయింది. అయితే, నార్డిక్‌ వాకింగ్‌ వారిలో 6 శాతం తగ్గితే, సాధారణ నడక వారిలో 4 శాతమే తగ్గడం గమనార్హం.
• బరువు విషయానికి వస్తే నార్డిక్‌ వర్గంలో 8 శాతం తగ్గితే, సాధారణ వర్గంలో 4 శాతమే తగ్గిందని పరిశోధకులు గుర్తించారు.
• అంతేకాకుండా నార్డిక్‌ వర్గంలో శరీరంలో కొవ్వు కూడా గణనీయంగా తగ్గినట్టు గుర్తించారు.
• నార్డిక్‌ వాకింగ్‌లో మన శరీర కండరాల్లో 80 నుంచి 90 శాతం క్రియాశీలంగా ఉంటాయి. పైగా ఇతర వ్యాయామాలతో పోలిస్తే ఇదెంతో సులువు. ఏ వయసు వారికైనా ఇది మంచిదే.
• నార్డిక్‌ వాకింగ్‌ మన శరీరాన్ని క్యాలరీలను కరిగించే యంత్రంలా మార్చేస్తుంది.
• సరళమైన నడకలా అనిపించినప్పటికీ నార్డిక్‌ వాక్‌ మన శరీరాలకు పూర్తి సంక్షేమాన్ని అందిస్తుంది.
• శరీరంలో చెడు కొలెస్ట్రాల్‌, రక్తపోటు, ఆందోళన, కుంగుబాటు, దీర్ఘకాలిక మనోవ్యధను కూడా తగ్గిస్తుందని అధ్యయనాలు వెల్లడిస్తున్నాయి.
• నార్డిక్‌ వాకింగ్‌ కర్రలు (పోల్స్‌) స్పోర్ట్స్‌ స్టోర్లు, ఆన్‌లైన్‌ స్టోర్లలో లభ్యమవుతాయి. నిపుణుల సాయంతో నడక మొదలుపెట్టాలి.