Children Stories | ఎన్కట ఒక దేశంల ఒక రాజు హుకుం జేత్తుండు. ఆ రాజుకు శీటికి – మాటికి, అయిందానికి – కాందానికి దావత్లు ఇచ్చుడంటె మస్తు ఇష్టముంటుండె. గట్లనె ఒకపారి దోస్తులను, సుట్టాలను దావత్కు రమ్మని విలిశిండు. అది ముర్గశిర కార్తె యాల్ల. బంతి భోజనంల శాపల కూర వెట్టాలనిపిచ్చింది. ఇగ ఆల్శం గాకుంట మంచిమంచి శాపలు దెమ్మని ఒక జాలరాయినెకు మతులావు వంపిచ్చిండు. తెల్లారంగనే ఆయినె బుట్టి నిండ మంచిమంచి కొర్రమట్టలు వట్టుకొని కోటకాడికి వోయిండు. రాజు హుకూమాయె.. మరి! రాజు శాపలు దెమ్మన్న ముచ్చట గురించి కోట కావలి ఉన్నోళ్లకు అప్పటిదాంక మత్లావు అందలే. జాలరాయినె శాపలు వట్టుకొని వోంగనే.. అందర్లెక్కనే కోటల అమ్ముకోను అచ్చిండని పెద్దర్వాజ కాడ అపిండ్రు.
ఆడు జెప్పేది ఇనకుంటనే.. “ఇగో! ఈ శాపలు అమ్మంగ అచ్చిన పైసలల్ల మాగ్గూడ పాలియ్యాలె! గట్లయితెనే లోపలికి వోనిత్తం!” అంట షర్తు వెట్టిండ్రు. అందుకు జాలరాయినె సరేన్నడు. ఇంకో దర్వాజ కాడికి వోంగనే.. ఆడ గూడ గట్లనే అయ్యింది. ఆడ గూడ “సరే!” అన్నడు జాలరాయినె. ఆఖరికి రాజు తానకు వోయి, శాపల బుట్టలిచ్చిండు. సోరసోర కొర్రమట్టలు జూశి రాజు మస్తు ఖుషీ అయ్యిండు. అప్పటిదాకా అసోంటి శాపలను రాజు సూడలేదు గదా.. తల్వనన్న తల్వలేదు! ఆయినె దిల్ ఖుషీ అయ్యింది. “ఇనాం ఏం గావాల్నో జెప్పు! ఏదంటె అదిత్త!” అంట అన్నడు. దానికి జాలరాయినె.. “రాజా! నాకు రెండునూర్ల కొరడదెబ్బల ఇనాం గావాలె!” అంట కోరుకున్నడు. పరేషానైన రాజు.. “అరె! నీకేమన్న పిసనా, దత్రమా! ఇనాం గోరుకొమ్మంటె దెబ్బలు గావాలంటున్నవు” అంట అడిగిండు. గప్పుడు జాలరాయినె.. “నేను లోపలికచ్చేందుకు మీ కోట దర్వాజ దగ్గర కావలున్నోళ్లకు.. ‘అచ్చిందాంట్ల పాలిత్త!’ అంట జెప్పిన. నాకు రెండునూర్ల కొరడ దెబ్బల ఇనామియ్యిండ్రి. ఆళ్లకు నూరు నూరు పంచుత!” అంట అసలు ముచ్చట జెప్పిండు. గప్పుడు రాజుకు కోటల జరుగుతున్న అసలు ముచ్చట ఎర్కయింది. గా ముచ్చట కుల్లం కుల్లం జేశిన జాలరాయినెకు రెండు నూర్లు ఇనామిచ్చిండు. ఆయినె అడిగినట్లే.. కావలోల్లకు కొరడా దెబ్బలతోని సన్మానం జేయించిండు.
– పత్తిపాక మోహన్
Children Stories | ఎవలైతేంది అని మేకపిల్లను ఆంబుక్క పెట్టిన పెద్దపులి కథ ఇదీ!
Children Stories | తన పిల్లలను తింటున్న పాము ఆట కట్టించిన కాకి కథ
Children Stories | అయ్యో పాపం అని జాలి చూపిస్తే రాజుకే సుక్కలు చూపిచ్చిండు!