Women’s T20 World Cup | భారత్‌ విముఖత.. యూఏఈలో మహిళల ప్రపంచకప్‌?

ప్రపంచకప్‌ నిర్వహణకు భారత్‌ విముఖత తెలపడంతో అంతర్జాతీయ క్రికెట్‌ మండలి (ఐసీసీ) మిగతా ఆప్షన్లపై దృష్టి సారించింది. వరల్డ్‌ కప్‌ను నిర్వహించేందుకు ఎడారి దేశం యూఏఈ సంసిద్ధత వ్యక్తం చేస్తున్నట్టు తెలుస్తోంది.

Women’s T20 World Cup | దుబాయ్‌: మహిళల టీ20 ప్రపంచకప్‌ నిర్వహణకు భారత్‌ విముఖత తెలపడంతో అంతర్జాతీయ క్రికెట్‌ మండలి (ఐసీసీ) మిగతా ఆప్షన్లపై దృష్టి సారించింది. వరల్డ్‌ కప్‌ను నిర్వహించేందుకు ఎడారి దేశం యూఏఈ సంసిద్ధత వ్యక్తం చేస్తున్నట్టు తెలుస్తోంది. ఇదివరకే నిర్దేశించిన షెడ్యూల్‌ ప్రకారం ఈ ఏడాది అక్టోబర్‌లో బంగ్లాదేశ్‌ వేదికగా ఈ టోర్నీ జరగాల్సి ఉన్నప్పటికీ ఆ దేశంలో నెలకొన్న ఉద్రిక్త పరిస్థితుల నేపథ్యంలో ప్రపంచకప్‌ను తరలించాలని ఐసీసీ భావిస్తోంది.

బంగ్లాదేశ్‌ క్రికెట్‌ బోర్డు (బీసీబీ) ఈ టోర్నీని నిర్వహిస్తామని హామీ ఇస్తూ మరికొన్ని రోజులు గడువు కోరినప్పటికీ ఐసీసీ మాత్రం సంతృప్తి చెందడం లేదు. యూఏఈలో వాతావరణ పరిస్థితులూ ఈ టోర్నీ నిర్వహణకు అనుకూలంగా ఉండటంతో ఆ దేశం మెగా టోర్నీ నిర్వహణకు ఉవ్విళ్లూరుతున్నట్టు సమాచారం. దుబాయ్‌, అబుదాబిలో అంతర్జాతీయ ప్రమాణాలతో కూడిన స్టేడియాలు, ఇదివరకే అక్కడ పురుషుల టీ20 ప్రపంచకప్‌ నిర్వహించిన అనుభవం ఉండటంతో ఐసీసీ కూడా యూఏఈ వైపునకే మొగ్గుచూపుతున్నట్టు తెలుస్తోంది. అక్టోబర్‌ 3 నుంచి 20 మధ్య మహిళల ప్రపంచకప్‌ జరగాల్సి ఉంది.