Visit:
Vinesh Phogat | భారత స్టార్‌ రెజ్లర్‌ వినేశ్‌ ఫోగాట్‌ (Vinesh Phogat) పారిస్‌ నుంచి భారత్ చేరుకున్నారు. ఇవాళ ఉదయం ఢిల్లీలోని అంతర్జాతీయ విమానాశ్రయంలో ల్యాండ్‌ అయ్యారు. ఈ సందర్భంగా రెజ్లర్‌కు ఘన స్వాగతం లభించింది.
పారిస్‌ ఒలింపిక్స్‌ క్రీడల్లో వినేశ్‌పై అనర్హత వేటు పడిన విషయం తెలిసిందే. 50 కేజీల విభాగంలో 100 గ్రాములు అధిక బరువు ఉందన్న కారణంగా ఫైనల్‌కు కొన్ని క్షణాల ముందు రెజ్లర్‌పై అనర్హత వేటు పడింది. దీంతో యావత్తు భారత దేశం తీవ్ర నిరాశ చెందింది. ఇక తన ‘అనర్హత వేటు’పై కోర్ట్‌ ఆఫ్‌ ఆర్బిట్రేషన్‌ ఫర్‌ స్పోర్ట్స్‌(కాస్‌)ను వినేశ్‌ ఆశ్రయించగా.. అక్కడా నిరాశే ఎదురైంది. ఈనెల 16న తీర్పు వెలువరించాల్సి ఉన్నా 14వ తేదీ రాత్రి ఉన్నఫళంగా ఆమె పిటిషన్‌ను కొట్టేస్తున్నట్టు ప్రకటించడం భారత క్రీడాభిమానులను నివ్వెరపోయేలా చేసింది. కారణాలేమీ చెప్పకుండానే ‘సింగిల్‌ లైన్‌ ఆర్డర్‌’తో కాస్‌ వెలువరించిన ప్రకటన అనంతరం ఆమెకు పలువురు క్రీడాకారులు మద్దతుగా నిలిచారు.
ఈ పరిణామాల అనంతరం వినేశ్‌ తొలిసారి భారత్ చేరుకున్నారు. ఈ సందర్భంగా ఆమెకు మద్దతుగా పెద్ద ఎత్తున అభిమానులు ఎయిర్‌పోర్ట్‌ వద్దకు వెళ్లారు. వారిని చూసిన వినేశ్‌ ఒక్కసారిగా భావోద్వేగానికి గురయ్యారు. కన్నీళ్లు పెట్టుకున్నారు (breaks down in tears). దీంతో ఆమెను రెజ్లర్లు సాక్షిమలిక్‌, బజరంగ్‌ పునియా తదితరులు ఓదార్చారు.
#WATCH | Indian wrestler Vinesh Phogat receives a grand welcome at Delhi’s IGI Airport
She arrived here from Paris after participating in the #Olympics2024Paris. pic.twitter.com/9GqbZkks7D
— ANI (@ANI) August 17, 2024
‘అనర్హత వేటు’ తర్వాత ఇప్పటివరకూ ఆ విషయమై ఎలాంటి ప్రకటనా చేయని వినేశ్‌ ఫోగాట్‌ శుక్రవారం సోషల్‌ మీడియా వేదికగా సుదీర్ఘ లేఖతో స్పందించింది. లేఖలో తన తల్లిదండ్రుల కష్టం, మనుగడ కోసం ఆమె సాగించిన పోరాటం, గత రెండేండ్లుగా మ్యాట్‌ లోపల, ఆవల ఎదుర్కున్న సవాళ్లు, ఒలింపిక్స్‌ ఫైనల్‌ మ్యాచ్‌కు ముందు ఆమె పడ్డ తపన గురించి రాసుకొచ్చింది. “ఒక చిన్న గ్రామంలో పసి వయసులో ఉన్నప్పుడు నాకు ఈ ఒలింపిక్స్‌, మ్యాట్‌ గురించి ఏమీ తెలియదు. సాధారణ అమ్మాయి కలలుగనే మాదిరిగానే నాకూ పొడవైన జడ పెంచుకోవాలని, స్నేహితులతో కాలక్షేపం చేస్తూ ఫోన్‌తో ఆడుకోవాలని మాత్రమే ఉండేది. మా నాన్న ఒక సాధారణ బస్‌ డ్రైవర్‌. ఆయనెప్పుడూ తన కూతురు ఉన్నత స్థితిలో ఉండాలని కోరుకునేవారు.
‘నువ్వు పైన విమానంలో వెళ్తుంటే నేను కింద బస్‌లో వెళ్తా’ అని నాతో చెబుతుండేవారు. ఆయనకున్న ముగ్గురి సంతానంలో నేనే చిన్నదాన్ని అవడం వల్ల నా మీద ఎక్కువ ప్రేమ చూపించేవారు. ఆయన కలను చూసి అప్పట్లో నేను నవ్వుకునేదాన్ని. మా నాన్న మా నుంచి వెళ్లిపోయినా ఆయన చెప్పిన మాటలు నా మదిలో నిలిచిపోయాయి. నా తల్లి తన జీవితంలో ఎన్నో కష్టాలు అనుభవించింది. తన పిల్లలు బాగా బతకాలని అందుకోసం ఆమె చేయగలిగినంత చేసింది. కానీ మా నాన్న చనిపోయిన కొన్నిరోజులకే తానూ తనువు చాలించింది. మా నాన్న కల నా మదిలో నాటుకుపోగా మా అమ్మా పోరాటం నాకు స్ఫూర్తినిచ్చింది. జీవన మనుగడ కోసం చేసిన పోరాటంలో చిన్ననాటి నా కల (పొడువు జడ, మొబైల్‌ ఫోన్‌) చెదిరిపోయాయి. కానీ నేనెప్పుడూ మా అమ్మ చూపిన బాటలోనే నడిచాను. గడిచిన ఏడాదిన్నర, రెండేండ్లుగా మ్యాట్‌ లోపల, బయట నా జీవితం ఊహించని మలుపులను తీసుకుంది. నా చుట్టూ నిజాయితీగా నాకు మద్దతు పలికినవాళ్లు నా కష్టకాలంలో అండగా నిలిచారు. వాళ్ల నమ్మకంతోనే నేను సవాళ్లను ధైర్యంగా ఎదుర్కోగలుగుతున్నాను.
డాక్టర్‌ దిన్షా పర్దివాలా నాకు దేవుడు పంపిన వైద్యుడు. ఆయన నాకు మూడుసార్లు ఆపరేషన్‌ చేశారు. ఆయన వల్లే నేను త్వరగా కోలుకుని మ్యాట్‌పైకి రాగలిగాను. అలాగే నా కోచ్‌ వొల్లర్‌ అకొస్‌ నాకు ఎల్లవేళలా మద్దతుగా నిలిచారు. రెజ్లర్ల పోరాటం జరుగుతున్నప్పుడు 2023 మే 28న జరిగిన ఆందోళనలో భారత జాతీయ జెండా కిందపడి నలిగిపోవడాన్ని నేను జీర్ణించుకోలేకపోయాను. ఒలింపిక్స్‌లో మువ్వన్నెల పతాక కీర్తిని రెపరెపలాడించాలని అప్పుడే భావించాను. ఇక ఆగస్టు 7న జరిగినదాని (ఫైనల్‌ పోరుకు ముందు) గురించి నేను ఎంత చెప్పాలనుకున్నా మాటలు రావడం లేదు. ఆ రాత్రి నేను బరువు తగ్గేందుకు తీవ్రంగా కృషి చేశాను. ఎక్కడా వెనక్కి తగ్గలేదు. కానీ తుదిపోరుకు సమయం తక్కువగా ఉండటం వల్ల నేను కాలంతో పరిగెత్తలేకపోయాను. ఇది పునరావృతం కాకూడదని కోరుకుంటున్నా. నేను 2032 ఒలింపిక్స్‌ దాకా కొనసాగాలని కోరుకున్నా. కానీ నేను భవిష్యత్‌ను అంచనా వేయలేను. నాకు తెలిసిన, నేను నమ్మిన విషయం ఏమిటంటే నేను నమ్మిన దాని కోసం నిత్యం పోరాడుతూనే ఉంటాను’ అని లేఖలో వివరించింది.
Also Read..
Bridge Collapse | బీహార్‌లో మరోసారి కూలిన గంగానదిపై నిర్మిస్తున్న తీగల వంతెన.. ఇప్పటికి ఇది మూడోసారి
Doctors strike | హత్యాచార ఘటనపై వైద్యుల నిరసన.. దేశ వ్యాప్తంగా నిలిచిన వైద్య సేవలు
