Visit:
పారిస్‌: వ్యాక్సినేషన్‌పై ఎలాంటి స్పష్టత ఇవ్వకపోవడంతో ఆస్ట్రేలియా ఓపెన్‌కు దూరమైన ప్రపంచ నంబర్‌వన్‌ నొవాక్‌ జొకోవిచ్‌ ఫ్రెంచ్‌ ఓపెన్‌కు కూడా దూరమయ్యే అవకాశాలు కనిపిస్తున్నాయి. ఫ్రాన్స్‌లో కరోనా ఆంక్షలు కఠినతరం చేస్తుండడంతో జోకో పాల్గొనడం అనుమానాస్పదంగా మారింది. ఫిబ్రవరి 15వ తేదీ నుంచి ఫ్రెంచ్‌ ప్రభుత్వం కొత్త నిబంధనలు అమల్లోకి తీసుకువస్తున్నది. వ్యాక్సిన్‌ వేయించుకోని వారు గత నాలుగు నెలల్లో తమకు కరోనా వైరస్‌ సోకినట్లు రుజువు చేయాల్సి ఉంటుందని ఫ్రెంచ్‌ ప్రభుత్వం ఓ నిబంధన తీసుకొచ్చింది. ఫ్రెంచ్‌ ఓపెన్‌లో పాల్గొనాల్సిన వారు ఈ పత్రం తప్పనిసరిగా సమర్పించాలని స్పష్టంగా పేర్కొన్నారు. దీంతో మే 22 నుంచి ప్రారంభం కానున్న ఫ్రెంచ్‌ ఓపెన్‌లో జొకోవిచ్‌ పాల్గొనడంపై సందేహాస్పదంగా మారింది. వ్యాక్సిన్‌పై సరైన సమాచారం అందించడంలో విఫలమైన జోకో ఆస్ట్రేలియన్‌ ఓపెన్‌లో పాల్గొనలేకపోయాడు. ప్రతిష్ఠాత్మక టోర్నీలో పాల్గొనేందుకు చేసిన ప్రయత్నాలన్నీ విఫలమయ్యాయి. అనేక నాటకీయ పరిణామాల మధ్య ఆ టోర్నీలో పాల్గొనకుండానే జొకో తిరుగుముఖం పట్టిన విషయం తెలిసిందే.
