Asia Cup | పాక్ ముంగిట 267 పరుగుల లక్ష్యం

Asia Cup | ఆసియా కప్ లో దాయాదుల మధ్య జరిగిన మ్యాచ్ లో తొలుత బ్యాటింగ్ చేసిన భారత్ ఏడు బంతులు మిగిలి ఉండగానే 266 పరుగులకే ఆలౌట్ అయింది.

Asia Cup | శ్రీలంకలో జరుగుతున్న ఆసియా కప్‌లో భాగంగా శనివారం దాయాదుల మధ్య జరిగిన మ్యాచ్‌లో టీం ఇండియా ఇంకా ఏడు బంతులు మిలిగి ఉండగానే 266 పరుగులకే ఆలౌట్ అయింది. పాకిస్థాన్ ముందు 267 పరుగుల విజయ లక్ష్యాన్ని నిలిపింది. అంతకుముందు ప్రారంభంలో వర్షం రావడంతో రెండు సార్లు మ్యాచ్‌కు ఆటంకం ఏర్పడింది.

టాస్ గెలుచుకున్న టీం ఇండియా సారధి రోహిత్ శర్మ బ్యాటింగ్ ఎంచుకున్నాడు. రోహిత్ శర్మ 11, విరాట్ కోహ్లీ 4, శ్రేయస్ అయ్యర్ 14, శుభ్ మన్ గిల్ 10 పరుగులకే ఔటయ్యారు.25 ఓవర్లు ముగిసే సమయానికి టీం ఇండియా నాలుగు వికెట్లు కోల్పోయి 127 పరుగులు చేసింది. 66 పరుగులకు నాలుగు వికెట్లు కోల్పోవడంతో టీం పరిస్థితి నిలకడగా ఆడుతూ చక్కదిద్దే బాధ్యతను ఇషాన్ కిషాన్, హార్దిక్ పాండ్యా చేపట్టారు. షాదాబ్ ఖాన్ వేసిన 29వ ఓవర్ రెండో బంతికి సింగిల్ తీయడంతో ఇషాన్ కిషాన్ హాఫ్ సెంచరీ పూర్తి చేశాడు. 54 బంతుల్లో హాఫ్ సెంచరీ నమోదు చేశాడు.

అంతకుముందు సెంచరీ దిశగా దూకుడుగా బ్యాటింగ్ చేస్తున్న ఇషాన్ కిషాన్.. పాక్ బౌలర్ హారిస్ రవూఫ్ వేసిన 38వ ఓవర్ మూడో బంతిని భారీ షాట్ కొట్టడంతో బాబర్ ఆజామ్ కు క్యాచ్ ఇచ్చాడు. దీంతో టీం ఇండియా ఐదో వికెట్ కోల్పోయింది. 38 ఓవర్లు ముగిసే సమయానికి టీం ఇండియా ఐదు వికెట్లు కోల్పోయి 204 పరుగులు చేసింది.

ఇషాన్ కిషాన్ ఔటైన తర్వాత దూకుడుగా ఆడుతూ స్కోర్ పెంచిన హార్దిక్ పాండ్యా.. షాహీన్ అఫ్రిది వేసిన 44వ ఓవర్ తొలి బంతికి అఘా సల్మాన్ కు క్యాచ్ ఇచ్చి పెవిలియన్ దారి పట్టాడు. ఆపై రవీంద్ర జడేజా, శార్దూల్ ఠాకూర్ వెంట వెంటనే ఔట్ కావడంతో టీం ఇండియా కష్టాల్లో చిక్కుకుంది. 44వ ఓవర్ లో హార్దిక్ పాండ్యా, రవీంద్ర జడేజా ఔటయ్యారు. 45వ ఓవర్ లో శార్దూల్ ఠాకూర్, 49వ ఓవర్ లో కుల్దీప్ యాదవ్, జస్ప్రీత్ బుమ్రా ఔటవ్వడంతో టీం ఇండియా బ్యాటింగ్ ముగిసింది.