Visit:
IPL Value | ఇండియన్ ప్రీమియర్ లీగ్ (ఐపీఎల్).. పొట్టి క్రికెట్ ఫార్మాట్ అని పేరు.. క్రికెట్ చరిత్రలో.. అసలు ప్రపంచవ్యాప్తంగా క్రికెట్ స్వరూపాన్నే మార్చేసిన లీగ్ టోర్నీ ఇది. ఇటు క్రికెటర్లకు, అటు కార్పొరేట్ సంస్థలకు కాసులు కురిపిస్తున్న టోర్నమెంట్.. గత రెండేండ్లలో ఐపీఎల్ బిజినెస్ విలువ అక్షరాల 10 బిలియన్ డాలర్లకు చేరుకుంది. 2022లో ఐపీఎల్ విలువ 10 బిలియన్ డాలర్లను దాటేసింది. 2020 తర్వాత డాలర్ల రూపేణా 6.2 బిలియన్ డాలర్ల నుంచి 10.9 బిలియన్ డాలర్ల మార్క్కు చేరుకున్నది. మన రూపాయిల్లో 90 శాతం వృద్ధి నమోదైతే.. డాలర్లలో 75 శాతం దాటిందని డీ అండ్ పీ అడ్వైజరీ సంస్థ `బియాండ్ 22 యార్డ్స్ (Beyond 22 Yards)` పేరుతో విడుదల చేసిన నివేదిక పేర్కొంది.
2022లో ఐపీఎల్ టోర్నీలోకి రెండు కొత్త ఫ్రాంచైసీలు.. గుజరాత్ టైటాన్స్, లక్నో సూపర్ జెయింట్స్ వచ్చి చేరడంతో మీడియా హక్కుల వేలం రూపంలో ఐపీఎల్ మేనేజ్మెంట్కు.. దాని నిర్వాహక సంస్థ బీసీసీఐకి వచ్చిన నిధులు 10.9 బిలియన్ డాలర్లు అన్నమాట. గుజరాత్ టైటాన్స్, లక్నో సూపర్ జెయింట్స్ విలువ 1.6 బిలియన్ డాలర్లు.
`స్థిరమైన కరెన్సీ ప్రాతిపదికన ఐపీఎల్ విలువ 12 బిలియన్ డాలర్లకు చేరువలో ఉంది. అయితే ఫారెక్స్ మార్కెట్లో అమెరికా డాలర్పై రూపాయి మారకం విలువ 10-12 శాతం పతనమైంది. అమెరికా డాలర్ల రూపేణా ఐపీఎల్ విలువ పడిపోయింది` అని డీ అండ్ పీ ఇండియా అడ్వైజరీ సర్వీసెస్ మేనేజింగ్ పార్టనర్ సంతోష్ ఎన్ చెప్పారు.
ఈ ఏడాది రెండు విభిన్న రైట్స్ హోల్డర్ల మధ్య తొలిసారి వేర్వేరుగా మీడియా హక్కులను వేలం వేసింది బీసీసీఐ. ఐపీఎల్ టీవీ రైట్స్ హక్కులు రూ.23,575 కోట్లకు డిస్నీ స్టార్ గెలుచుకుంటే.. డిజిటల్ రైట్స్ వయాకామ్18 సంస్థ 23,758 కోట్లకు సొంతం చేసుకున్నాయి.
ఇక తదుపరి సెషన్ టోర్నీలో మ్యాచ్ల సంఖ్య 74 నుంచి 94కి.. తదనుగుణంగా దాని విలువ పెరుగనున్నదని ఐపీఎల్ వర్గాలు చెబుతున్నాయి. టిక్కెట్ల సేల్స్, ఇన్-స్టేడియం రెవెన్యూ రూపంలో ఆదాయం పెరుగుతుందని భావిస్తున్నారు. ప్రస్తుతం ఆడుతున్న టీమ్ల విలువ 400-600 మిలియన్ డాలర్ల మధ్య ఉంటుందని అంచనా వేస్తున్నారు.
