Visit:
Sara Khadem | ఇరాన్కు చెందిన చెస్ ప్లేయర్ సారా ఖాదిమ్కు బెదిరింపు ఫోన్ కాల్స్ వస్తున్నాయి. కొందరు ఆకతాయిలు వెంటనే ఇరాన్కు తిరిగి రావాలని డిమాండ్ చేస్తుండగా.. మరికొందరేమో ఇరాన్ వస్తే అంతు చూస్తామంటూ బెదిరింపులకు దిగుతున్నారు. సారా ఖాదిమ్ తల్లిదండ్రులకు కూడా ఇదే మాదిరి బెదిరింపు ఫోన్ కాల్స్ వస్తున్నట్లు తెలుస్తున్నది. అయితే, ఈ వ్యవహారంపై ఇరాన్ విదేశాంగ శాఖ స్పందించలేదు. బెదిరింపు ఫోన్ కాల్స్ రావడంతో కజక్ పోలీసుల సహకారంతో చెస్ ఆటగాళ్లకు భద్రత కల్పించేందుకు టోర్నమెంట్ నిర్వాహకులు చర్యలు తీసుకుంటున్నారు. ఖడెంలోని హోటల్ గది వెలుపల నలుగురు అంగరక్షకులను కజిక్ పోలీసులు నియమించారు.
ఇరాన్కు చెందిన స్టార్ చెస్ ప్లేయర్ సారా ఖాదిమ్ ప్రస్తుతం కజికిస్తాన్లోని ప్రపంచ ర్యాపిడ్ అండ్ బ్లిట్జ్ చెస్ ఛాంపియన్షిప్లో ఆడుతున్నది. అయితే, చెస్ టేబుల్పై ఆమె తలకు హిజాబ్ ధరించకుండా కూర్చుండి ఆడుతున్న ఫొటోలు మీడియాలో ప్రత్యక్ష్యమయ్యాయి. దాంతో ఆమెకు బెదిరింపు కాల్స్ మొదలయ్యాయి. హిజాబ్ ధరించకుండా చెస్ పోటీల్లో ఎలా పాల్గొంటామని ఆకతాయిలు హెచ్చరిస్తున్నారు. పోటీలను అర్దాంతరంగా ముగించి వెంటనే స్వదేశానికి రావాలని కొందరు హెచ్చరిస్తుండగా.. మరికొందరేమో ఇక్కడికి వస్తే నీ అంతు చూస్తామని బెదిరిస్తున్నారు. సారా ఖాదిమ్ తల్లిదండ్రులకు కూడా ఇదే మాదిరి బెదిరింపు కాల్స్ వస్తుండటంతో వారు ఆందోళన చెందుతున్నట్లు తెలుస్తున్నది.
బెదిరింపుల నేపథ్యంలో సారా ఖాదిమ్ భయంతో ఉన్నట్లు కనిపిస్తున్నదని, భర్త, పిల్లలతో కలిసి స్పెయిన్కు వెళ్లాలని నిర్ణయించుకున్నట్లు స్పానిష్ వార్తాపత్రిక తన కథనంలో తెలిపింది. అయితే, స్పెయిన్లో కుటుంబంతో నివసించడమా లేదా ఆశ్రయం పొందడమా అనే దానిపై ఇంకా స్పష్టత లేదు. సారా ఖాదిమ్ దంపతులు స్పెయిన్లో ఒక ఇంటిని కొనుగోలు చేసినట్లు తెలుస్తున్నది.
