French Open | ఫ్రెంచ్‌ ఓపెన్‌ బ్యాడ్మింటన్‌ టోర్నీ… రెండోసారి టైటిల్‌ గెలిచిన‌ సాత్విక్‌, చిరాగ్‌ జోడీ

భారత స్టార్‌ జోడీ సాత్విక్‌సాయిరాజ్‌, చిరాగ్‌శెట్టి టైటిళ్ల వేట దిగ్విజయంగా కొనసాగుతున్నది. పారిస్‌ టోర్నీపై తమ ప్రేమను కనబరుస్తూ రెండోసారి టైటిల్‌ను సగర్వంగా ముద్దాడారు. ఆదివారం జరిగిన పురుషుల డబుల్స్‌ ఫైనల్‌ పోరులో సాత్విక్‌, చిరాగ్‌ ద్వయం 21-11, 21-17తో చైనీస్‌ తైపీ జోడీ లీ జీ హ్యుయ్‌, యాంగ్‌ పో హుసాన్‌పై అద్భుత విజయం సాధించింది.

French Open | పారిస్‌: భారత స్టార్‌ జోడీ సాత్విక్‌సాయిరాజ్‌, చిరాగ్‌శెట్టి టైటిళ్ల వేట దిగ్విజయంగా కొనసాగుతున్నది. పారిస్‌ టోర్నీపై తమ ప్రేమను కనబరుస్తూ రెండోసారి టైటిల్‌ను సగర్వంగా ముద్దాడారు. ఆదివారం జరిగిన పురుషుల డబుల్స్‌ ఫైనల్‌ పోరులో సాత్విక్‌, చిరాగ్‌ ద్వయం 21-11, 21-17తో చైనీస్‌ తైపీ జోడీ లీ జీ హ్యుయ్‌, యాంగ్‌ పో హుసాన్‌పై అద్భుత విజయం సాధించింది. 37 నిమిషాల్లోనే ముగిసిన పోరులో ఈ ప్రపంచ నంబర్‌వన్‌ జోడీ ఆద్యంతం తమదైన ఆధిపత్యం ప్రదర్శించింది. ఆది నుంచే తమదైన దూకుడు కనబరిచిన సాత్విక్‌, చిరాగ్‌..ప్రత్యర్థికి ఎలాంటి అవకాశమివ్వలేదు.

2019లో రన్నరప్‌గా నిలిచిన ఈ యువ జంట..2022లో టైటిల్‌ విన్నర్‌గా నిలిచింది. ఈ సీజన్‌లో తొలి టైటిల్‌ను ఖాతాలో వేసుకుని తమకు తిరుగులేదని ఘనంగా చాటిచెప్పారు. ఇటీవల మలేషియా సూపర్‌-1000 టోర్నీ, ఇండియా సూపర్‌-750, చైనా మాస్టర్స్‌ టోర్నీల్లో రన్నరప్‌గా నిలిచిన సాత్విక్‌, చిరాగ్‌..ఫ్రెంచ్‌ ఓపెన్‌ టైటిల్‌తో సత్తాచాటారు. రానున్న ప్రతిష్ఠాత్మక పారిస్‌ ఒలింపిక్స్‌లో సాత్విక్‌, చిరాగ్‌ జోడీ కచ్చితంగా స్వర్ణం సాధిస్తుందని చీఫ్‌ కోచ్‌ పుల్లెల గోపీచంద్‌ ధీమా వ్యక్తం చేశారు.