రెండో వ‌న్డేలో ఇంగ్లండ్ ఘన విజయం

India vs England 2nd ODI | రెండో వ‌న్డేలో టీమిండియా ఇచ్చిన‌ భారీ ల‌క్ష్యాన్ని ఇంగ్లండ్ సునాయాసంగా ఛేదించింది. 6 వికెట్ల తేడాతో విజయం సాధించింది.

March 26, 2021 / 10:03 PM IST

పుణే: కొండంత లక్ష్యాన్ని ఇంగ్లండ్ మంచినీటి ప్రాయంగా కరిగించింది. తొలి వన్డేలో భారత్ చేతిలో ఎదురైన ఓటమికి కసిదీరా బదులు తీర్చుకుంది. శుక్రవారం జరిగిన రెండో వన్డేలో 6 వికెట్ల తేడాతో భారత్‌పై ఘన విజయాన్ని సాధించిన ఇంగ్లండ్ టైటిల్ రేసులో నిలిచింది. దీంతో 3 మ్యాచ్‌ల వన్డే సిరీస్ ప్రస్తుతం 1-1తో సమమైంది.
ఈ మ్యాచ్‌లో టాస్ ఓడి ముందుగా బ్యాటింగ్ చేసిన భారత్ నిర్ణీత 50 ఓవర్లలో 6 వికెట్లకు 336 పరుగులు చేసింది. కేఎల్ రాహుల్ (114 బంతుల్లో 108; 7 ఫోర్లు, 2 సిక్సర్లు) సెంచరీతో చెలరేగాడు. కెప్టెన్ విరాట్ కోహ్లి (79 బంతుల్లో 66; 3 ఫోర్లు, 1 సిక్స్) అర్ధసెంచరీ చేయగా… రిషభ్ పంత్ (40 బంతుల్లో 77; 3 ఫోర్లు, 7 సిక్సర్లు), హార్దిక్ పాండ్యా (16 బంతుల్లో 35; 1 ఫోర్, 4 సిక్సర్లు) ధాటిగా ఆడారు. ప్రత్యర్థి బౌలర్లలో రీస్ టాప్లీ, టామ్ కరన్ చెరో 2 వికెట్లు దక్కించుకున్నారు.

అనంతరం 337 పరుగుల భారీ లక్ష్యాన్ని ఇంగ్లండ్ 43.3 ఓవర్లలో 4 వికెట్లు కోల్పోయి ఛేదించింది. టాపార్డర్ బ్యాట్స్‌మన్ జేసన్ రాయ్ (52 బంతుల్లో 55; 7 ఫోర్లు, 1 సిక్స్), బెయిర్ స్టో (112 బంతుల్లో 124; 11 ఫోర్లు, 7 సిక్సర్లు), బెన్ స్టోక్స్ (52 బంతుల్లో 99; 4 ఫోర్లు, 10 సిక్సర్లు) దీటైన ఆటతో ఇంగ్లండ్ విజయానికి బాటలు వేశారు. చివర్లో లియామ్ లివింగ్ స్టోన్ (21 బంతుల్లో 27 నాటౌట్; 1 ఫోర్, 2 సిక్సర్లు), డేవిడ్ మలాన్ (23 బంతుల్లో 16; 1 ఫోర్) మిగతా లాంఛనాన్ని పూర్తి చేశారు. ప్రసిధ్ 2 వికెట్లు తీయగా, భువనేశ్వర్‌కు ఒక వికెట్ దక్కింది.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి