Team India | అద‌ర‌గొట్టిన అమ్మాయిలు.. అండ‌ర్ -19 టీ20 వ‌ర‌ల్డ్ క‌ప్ ఫైన‌ల్‌లో భార‌త్ ఘ‌న విజ‌యం

Team India | వుమెన్స్ అండ‌ర్-19 టీ20 వ‌ర‌ల్డ్ క‌ప్‌లో భార‌త్ ఘ‌న విజ‌యం సాధించింది. సౌతాఫ్రికాను 82 ప‌రుగుల‌కే ప‌రిమితం చేశారు.

Team India | వుమెన్స్ అండ‌ర్-19 టీ20 వ‌ర‌ల్డ్ క‌ప్‌లో భార‌త్ ఘ‌న విజ‌యం సాధించింది. ఈ విజ‌యంతో వ‌రుస‌గా రెండోసారి అండ‌ర్ 19 వ‌ర‌ల్డ్ క‌ప్‌లో టీమిండియా గెలుపొందింది. ఆదివారం సౌతాఫ్రికాతో జరిగిన ఫైనల్​లో భారత్ 9 వికెట్ల తేడాతో విజ‌యం సాధించి విశ్వ‌విజేత‌గా నిలిచింది. సఫారీ జట్టు నిర్దేశించిన 83 పరుగుల లక్ష్యాన్ని, టీమిండియా అమ్మాయిలు 11.2 ఓవర్లలో 1 వికెట్​ కోల్పోయి ఛేదించారు. గొంగడి త్రిష 33 బంతుల్లో 44 ప‌రుగులు (8×4) చేసి నాటౌట్‌గా నిలిచింది.

అంతకుముందు బ్యాటింగ్ చేసిన సౌతాఫ్రికా నిర్ణీత 20 ఓవర్లలో 82 పరుగులకు ఆలౌటైంది. భారత బౌలర్ల విజృంభనతో సఫారీ జట్టు విలవిల్లాడింది. మికీ వాన్ (23 పరుగులు)టాప్ స్కోరర్​. నలుగురు ప్లేయర్లు పరుగుల ఖాతా తెరవకుండానే పెవిలియన్ చేరారు. భార‌త జ‌ట్టు బౌలర్లలో త్రిష 3, పరునిక, ఆయూషి, వైష్ణవి తలో 2, షబ్నమ్ 1 వికెట్ తీశారు.

అదరగొట్టిన తెలంగాణ అమ్మాయి త్రిష‌

ఈ టోర్నీలో తెలంగాణ అమ్మాయి గొంగడి త్రిష అద్భుతంగా రాణించింది. బ్యాటింగ్, బౌలింగ్‌లో దుమ్మురేపింది. ఈ టోర్నీలో సెంచరీ బాదేసింది. ఫైనల్​లోనూ మూడు వికెట్లతో రాణించి, విజ‌యానికి కార‌ణ‌మై అంద‌రి దృష్టిని ఆక‌ర్షించింది. ఇక ప్లేయ‌ర్ ఆఫ్ ది టోర్న‌మెంట్‌గా, ప్లేయ‌ర్ ఆఫ్ ది మ్యాచ్‌గా గొంగ‌డి త్రిష నిలిచింది.