Glenn Maxwell: గురువారం నుంచి బ్రిస్బేన్ వేదికగా మొదలైన బిగ్బాష్ లీగ్ (బీబీఎల్) లో మెల్బోర్న్ స్టార్స్కు ఊహించని షాక్ తాకింది. మెల్బోర్న్ స్టార్స్ సారథి, ఆసీస్ ఆల్ రౌండర్ గ్లెన్ మ్యాక్స్వెల్ గాయపడటంతో అతడు ఆ జట్టు ఆడబోయే తర్వాతి మ్యాచ్ నుంచి తప్పుకున్నాడు. ఈ విషయాన్ని ఆ జట్టు అధికారిక ట్విటర్ ఖాతాలో వెల్లడించింది. బీబీఎల్లో భాగంగా మెల్బోర్న్ స్టార్స్.. ఈనెల 11న పెర్త్ స్కాచర్స్తో రెండో మ్యాచ్ ఆడనుంది.
మ్యాక్స్వెల్ గైర్హాజరీపై మెల్బోర్న్ స్టార్స్ ఎక్స్ (ట్విటర్) ఖాతా వేదికగా స్పందిస్తూ.. ‘మెల్బోర్న్ స్టార్స్ సారథి గ్లెన్ మ్యాక్స్వెల్ బుధవారం పెర్త్ స్కాచర్స్తో జరుగనున్న మ్యాచ్కు మోచేతి గాయం కారణంగా దూరమయ్యాడు. అతడి ఆరోగ్య పరిస్థితిపై మేం అప్డేట్స్ అందజేస్తాం’ అని పేర్కొంది.
Injury Update: Glenn Maxwell has been ruled out of Wednesday’s clash against the Perth Scorchers after injuring his forearm muscle. We’ll provide further updates as his recovery progresses. pic.twitter.com/mBkIfe5azm
— Melbourne Stars (@StarsBBL) December 8, 2023
ఇటీవలే వన్డే ప్రపంచకప్ గెలిచిన ఆసీస్ జట్టులో తనదైన బ్యాటింగ్, బౌలింగ్తో సేవలందించిన మ్యాక్సీ.. భారత్తో జరిగిన ఐదు మ్యాచ్ల టీ20 సిరీస్లో భాగంగా మూడో మ్యాచ్లో తనదైన బ్యాటింగ్తో చెలరేగి మ్యాచ్ను గెలిపించిన విషయం తెలిసిందే. అయితే బీబీఎల్ ఓపెనింగ్ మ్యాచ్లో భాగంగా.. గురువారం బ్రిస్బేన్ హీట్ తో జరిగిన మ్యాచ్లో మ్యాక్సీ బంతితోనే గాక బ్యాట్తో కూడా విఫలమయ్యాడు. తొలుత బ్యాటింగ్ చేసిన బ్రిస్బేన్.. నిర్ణీత 20 ఓవర్లలో మూడు వికెట్లు మాత్రమే కోల్పోయి 214 పరుగుల భారీ స్కోరుచేసింది. మూడు ఓవర్లు వేసిన మ్యాక్సీ.. 44 పరుగులిచ్చి ఒక వికెట్ తీశాడు. అనంతరం మెల్బోర్న్ స్టార్స్.. భారీ ఛేదనలో 111 పరుగులకే కుప్పకూలింది. మ్యాక్స్వెల్.. 14 బంతుల్లో మూడు ఫోర్లు, ఒక సిక్సర్ సాయంతో 23 పరుగులు చేశాడు.