BCCI | టీమ్‌ఇండియాలో ప్రక్షాళన షురూ.. పది పాయింట్లతో బీసీసీఐ పాలసీ

గత నాలుగైదు నెలలుగా టెస్టులలో అత్యంత చెత్త ప్రదర్శన, ఐసీసీ వరల్డ్‌ టెస్ట్‌ చాంపియన్‌షిప్‌ (డబ్ల్యూటీసీ) ఫైనల్‌ బెర్తును దక్కించుకోవడంలో విఫలమవడం, డ్రెస్సింగ్‌ రూమ్‌లో విభేదాలు, సీనియర్ల పేలవ ఆటతీరు నేపథ్యంలో బీసీసీఐ జట్టులో ప్రక్షాళనకు శ్రీకారం చుట్టింది.

• నిబంధనలు మరింత కఠినతరం

BCCI | ముంబై: గత నాలుగైదు నెలలుగా టెస్టులలో అత్యంత చెత్త ప్రదర్శన, ఐసీసీ వరల్డ్‌ టెస్ట్‌ చాంపియన్‌షిప్‌ (డబ్ల్యూటీసీ) ఫైనల్‌ బెర్తును దక్కించుకోవడంలో విఫలమవడం, డ్రెస్సింగ్‌ రూమ్‌లో విభేదాలు, సీనియర్ల పేలవ ఆటతీరు నేపథ్యంలో బీసీసీఐ జట్టులో ప్రక్షాళనకు శ్రీకారం చుట్టింది. భారత జట్టు ఆస్ట్రేలియా నుంచి తిరిగొచ్చాక.. కెప్టెన్‌ రోహిత్‌ శర్మ, హెడ్‌కోచ్‌ గౌతం గంభీర్‌తో పాటు కొంత మంది బోర్డు ముఖ్యులతో బీసీసీఐ సమీక్షా సమావేశం నిర్వహించింది.

ఈ సమావేశంలో గంభీర్‌.. జట్టు ప్రక్షాళనలో భాగంగా పలు కీలక సూచనలు చేశాడు. వీటన్నింటినీ పరిగణనలోకి తీసుకుంటూ బీసీసీఐ గురువారం పది పాయింట్లతో కఠినమైన కొత్త పాలసీని తీసుకొచ్చింది. దీని ప్రకారం క్రికెటర్లందరూ ఈ నిబంధనలకు కట్టుబడి ఉండాలని బోర్డు స్పష్టంగా పేర్కొంది. ఇందుకు ఎవరూ అతీతులు కారని తెలిపింది.

దేశవాళీ టోర్నీల్లో ప్రతీ ఒక్కరూ ఆడాల్సిందేనన్న బోర్డు.. జాతీయ జట్టుకు ఎంపికయ్యేందుకు ప్రదర్శనను పరిగణనలోకి తీసుకుంటామని కుండబద్దలు కొట్టింది. దేశవాళీల ద్వారా స్థానిక యువతకు స్టార్‌ క్రికెటర్లతో ఆడే అవకాశం లభిస్తుందని, తద్వారా వారి అనుభవం పనికొస్తుందని పేర్కొంది.

• ప్లేయర్లందరూ విడివిడిగా గాకుండా.. జట్టుతో కలిసి ప్రయాణించాల్సిందే. దీంతో ప్లేయర్ల మధ్య సంబంధాలు మరింత మెరుగుపడుతాయి. ఒకవేళ ఫ్యామిలీతో కలిసి ప్రయాణించాలంటే అందుకు తగ్గట్లు ముందస్తుగా చీఫ్‌ కోచ్‌ లేదా సెలెక్షన్‌ కమిటీ అనుమతి తీసుకోవాల్సి ఉంటుంది.
• బ్యాగేజీ విషయంలోనూ ప్లేయర్లందరూ నిబంధనలకు కట్టుబడి ఉండాలి. ఒకవేళ పరిమితికి మించిన బరువు ఉంటే సదరు ప్లేయర్‌ అందుకు కావాల్సిన మొత్తాన్ని భరించాల్సి ఉంటుంది. దీని ద్వారా లగేజీని ఒక క్రమపద్ధతిలో నిర్వహించడంతో పాటు అనవసరపు ఖర్చులు తగ్గించేందుకు వీలు అవుతుందని పేర్కొంది. ఇలా వెళ్లాల్సిన పర్యటన బట్టి బరువు కేటాయింపులు చేసింది.
• ప్లేయర్లు తమ వ్యక్తిగత సిబ్బంది(వ్యక్తిగత మేనేజర్లు, చెఫ్స్‌, అసిస్టెంట్స్‌, సెక్యూరిటీ)ని ఆయా పర్యటనలకు తీసుకురావడంపై బోర్డు కఠిన నిబంధనలు పెట్టింది. బోర్డు అనుమతి లేనిదే ఇప్పటి నుంచి ఇవి సాధ్యం కాదు.
• షెడ్యూల్‌ ప్రాక్టీస్‌ ముగిసే వరకు ప్లేయర్లందరూ వేచి చూడాల్సిందే. ప్రాక్టీస్‌ అయిపోయిన వెంటనే వెళ్లడానికి వీలులేదు. అందరూ కలిసి ప్రయాణించాల్సిందే. దీంతో సభ్యుల మధ్య మెరుగైన సంబంధాలు నెలకొల్పే ఆసార్కముంటుంది.
• పర్యటనల సందర్భంగా ప్లేయర్లు ఎలాంటి వ్యక్తిగత షూట్‌లు, ఎండార్స్‌మెంట్‌లలో పాల్గొనేందుకు వీలు లేదు. దీని ద్వారా ఆటపై ఏకాగ్రత దెబ్బతినే అవకాశాలు ఉన్నాయి.
• భారత్‌ అవతల 45 రోజుల కంటే ఎక్కువగా ఉండే పర్యటనల్లో రెండు వారాల పాటు ప్లేయర్ల కుటుంబసభ్యులకు అనుమతి ఇస్తారు. ప్లేయర్లతో పాటు విజిటర్లకు బీసీసీఐ వసతి ఏర్పాటు చేస్తుంది. మిగతావి సదరు ప్లేయర్‌ చూసుకోవాల్సి ఉంటుంది. అదీ కూడా పర్యటన మొత్తమ్మీద ఒక్కసారికే అనుమతి ఉంటుంది. ఏదైనా కోచ్‌, కెప్టెన్‌, ఆపరేషన్స్‌ జీఎం అనుమతి లేకుండా సాధ్యం కాదు.
• బీసీసీఐ అధికారిక షూటింగ్‌లకు ప్లేయర్లందరూ ఎప్పుడు అందుబాటులో ఉండాల్సిందే. క్రికెట్‌ అభివృద్ధికి ఇలాంటి దోహదం చేస్తాయని తెలిపింది. షెడ్యూల్‌ కంటే ముందే మ్యాచ్‌లు, సిరీస్‌లు అయిపోయినా ముందే బయల్దేరి వెళ్లే అవకాశం లేకుండా అందరూ ఒకే సమయంలో ప్రయాణించేలా నిబంధనలు మార్చారు.